Pukapuka 4, Nama 3
18450301

whārangi 9  (4 ngā whārangi)
10titiro ki te whārangi o muri


Tirohia ngā kupu whakataki o tēnei niupepa

 
TE KARERE O NUI TIRENI [Na te Kawana i mea kia taia]

Vol 4] AKARANA, HATAREI, MAEHE 1, 1845. No 3.

I korerotia i te nuipepa o Pepuere te tutu a Hone Heke ki te kara o Pewairangi ata korerotia e koutou nga korero i raro iho nei, he wakapauakanga i te tikanga o taua kara kia mohio ai koutou katoa. Otira kua wakaarahia ano e matou to tatou kara ka hua nei hoki te kino. Kei mea nga tangata katoa na matou na te pakeha i poka noa ki te haere mai ki konei kahore na koutou ma te tangata wenua i karanga mai i haere mai ai. Inahoki te pukapuka i tuhituhia e Ngapuhi ki a kingi Wiremu koia matu i mea ai, he ngakau tutu ano na etahi o Ngapuhi i pokanoai ai ki te kino. Otira kei wakaaro nga Tauiwi ko katoa o Ngapuhi e tutu ana kahore he rangatira ano e noho pai ana he tangata ano e noho tutu ana. Ahakoa ra ko te tangata e mahi ana i te kino, tona utu akuanei he mamae mona. Tena ko te tangata e mahi ana i te pai, ka wiwi hoki ia ki tona utu he pai hoki mona. Heoi ra ata wakaaroa marietea nga korero o raro iho nei. Haere ra e te pukapuka nei ki nga tauiwi katoa o Nui Tireni. E hoa ma tena pea koutou na ka rongo ki te kara kua waiho nei hei take riri ma te Kawana ki a Heke ma. Kua rongo ano pea koutou ki te taenga atu o te Kawana ki Tokerau i mua ra, i tukua ai te karere ki Poihakena ki te tiki hoia. Ka utaina nga hoia ki runga ki te kaipuke ka rere mai a ka u ki Kororareka. Ka rongo a Ngapuhi ka wehi ka huihui ratou ki te Waimate ka komiti a ka houhia te rongo a te Kawana ki a ratou ka wakahokia nga hoia. I taua huihuinga ra i wakapuakina mariretia e te Kawana te tikanga o te Kara o Ingarangi nei ki nga tangata maori, i wakatupatoria hoki ratou kei pokanoa ratou ki taua kara, kei hua te kino. Heoi ka noho marire a Ngapuhi na wai ra, ka hoki a Heke ki tana mahi kotia pukutia ana te kara i te po. Koia ra, kua tupu ra te kino ka hui nei i raro i a Ngapuhi. Koia ra ka wakapuakina nei te tikanga o te kara nei kia koutou, koia tenei, I mua ra ka rongo a te Kuini ratou ko nga rangatira o Ingarangi kua wakamine mai nga tangata o to matou iwi ki Nui Tireni ka rongo ra ki te mano o a ratou mahi tutu ki nga tangata maori ka tupu to ratou aroha ki a koutou kei wakataurekarekatia koutou e tetahi iwi atu ranei, e etahi o matou ranei ka wakaritea e ratou a te Kawana tuatahi, kua mate ra, kia haere mai ki tenei wenua hei Kawana. Heoi ka u ia ki Waitangi, a