Pukapuka 0, Nama 20
18831015

whārangi 1  (17 ngā whārangi)
2titiro ki te whārangi o muri


Tirohia ngā kupu whakataki o tēnei niupepa

 

TE KORIMAKO

TE KORIMAKO
He Nupepa whakaatu i nga rongo o te ao katoa, nga tikanga o Te Whakapono, me era atu mea.
NAMA 20.] AKARANA, OKETOPA 15, 1883. [TE UTU, 3D.
WHANAUTANGA.
No te 24 o Hepetema, ka whanau waewae mai te tamaiti tane a HORIANA TE REREKINO, Na Hamiora Tumutara i tuhi mai.
HE MATE.
No te 5 o nga ra o Hune, ka mate ki Karatia, Parengarenga, a EMERE HARE, tamahine a Ngakura Hare. Ko te kononohi i waihotia mai; otira, na Ihowa e tuku mai, nana ano i tango atu.
No te 14 o Hune, ka tomo ki tana okiokinga a MARAMA, te hoa aroha a Wiremu Te Waha, i Kareponia, Te Awanui. I haere i runga i te aroha ko ona iwi i te tai Rangaunu.
No te 8 o nga ra o Hepetema, ka moe ki Te Umuhika, i Te Matata, a RETIA, te tamahine a Karaitiana. I hui mai ki te tangi a Taupo, a Patea, a Pukeko, a Awa, me te tini atu. Na Arama mai ano te mate e taea te pewhea? Me tapapa tonu ki a te Karaiti.
PANUITANGA KI NGA KAI TUHI MAI.
Ko nga pukapuka katoa mo tenei nupepa me penei te tuhi mai ki "TE KORIMAKO, kei Akarana, Pouaka Poutapeta 270."
ALL communications to this paper are to be addressed to " TE KORIMAKO Auckland, Post Office Box 270."
Ka taia TE KORIMAKO ia marama, ia marama, a ka tukua atu ki nga tangata e tuku moni mai ana, e rua hereni mo te tau. Me tuku mai te moni mo te tau i te timatanga.
PANUI. - Ki te mea ka tukua mai kia taia ki tenei nupepa he kupu whakaatu mo te marenatanga, mo te whanautanga, mo te hemonga, o te tangata me takai marire mai te hereni kotahi. He pane-kuini te moni tika.
HE KUPU WHAKAATU. - Ki te hiahia etahi kia hokona he mea i runga i nga Panui taonga o tenei nama o TE KORIMAKO, me whiu te ingoa o TE KORIMAKO ki nga pukapuka tono, te take kia mau ai nga Panui a nga Pakeha ki te nupepa nei, na te mea, he utu ta nga Pakeha mo aua Panui.
TE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing "TE KORIMAKO, P.O. Box 270," or by leaving their subscriptions with Messrs. Champtaloup & Cooper, Stationers, No. 76 Queen-street.
PANUITANGA KI NGA TANGATA TANGO I "TE KORIMAKO."
KIA mohio nga tangata tuku moni mai, ki te tae nga KORIMAKO ki te 12 heoi ka mutu nga nupepa mo te tau kotahi, ki te hiahia te tangata kia tukua atu ano TE KORIMAKO mo te tahi tau me tuku mai nga panekuini mo te rua hereni, ko te ingoa o te tangata nana te tono kia marama te tuhi.
HE mea atu tenei ki nga tangata tuku tono mai kia marama te tuhi i nga ingoa tangata, kainga hoki. Kua maha nga pohehetanga he kore kahore e mohiotia etahi o nga tuhituhi.
Te Korimako
" Kei te Atua to tatou piringa."
OKETOPA 15, 1883.
KAORE ano ra i whakamowairokirokitia te moana o nga Kingitanga o te ao, e tutu tonu ana te heihei. Ahakoa e karekare noa eke ana te mate o te tai i etahi takiwa, ka whakakeo te ngaru i tetahi takiwa; a, rere ana mai ki te ngakau te ihiihi i te huhukatanga o nga tuatea, ki tenei, ki tenei moana, ano e kahaki-whakarere ana nga wai o nga rangatiratanga ki te waha o te parata, whakatoremi ai i nga nui, i nga tika. Ka hua ra, ma te Whakapono e tara te rangi, e whakatatu i te mauri o tera iwi, o tera iwi, tena ko tenei, kiano ngoto noa ki te manawa o nga Kingitanga nga tikanga whakaora o te Karaipiture; kei waho noa iho e putu ana, mei te ahua.
Tetahi whawhai i naianei kei Tonakune (Tonquin), he whenua kei Ahia, ki te Marangai-ma- Tonga, ungutu ana te rohe ki Haina, i te Tuaraki. Ka nui te tangata kua hihinga, ta te taua, mete tangata-whenua; a, e kekeri mai nei ano. Ko tetahi kekeritanga kei Matakahaka (Madagascar) he motu nui kei te Moana Iniana (Indian Ocean) e tu ana i waho o te tuawhenua o Awherika (Africa). Kua mate te tokomaha i konei, te taua hapai atu, me te tangata-whenua; a, e mahi mai nei ano i tana mahi ki te tua i te tangata. Me he mea, he tua rakau te hanga, tika tonu, pai tonu; no te tahuritanga ki te tua i te tangata, katahi ka puta te umere, E! kei hea te mana o te kupu e komemetia nei e te tini, " Kia aroha ki to hoa; ano, ko koe."

E ki ana nga nupepa, kei te ohooho a Haina (China), kei te ohooho a Roumania, kei Oropi (Europe) tenei rangatiratanga, kei te whawhai tonu a Haiti (Hayti), he motu tera no nga Inia-a-Auru (West Indies). Haunga hoki ra etahi atu whenua e kupukupua ana. Ko nga take o enei tu hanga, e whakatakotongakau nei nga iwi o te ao kia whakaarahia te kauwae o te pakanga, ki tenei whenua, ki tera whenua, e ngaro ana; ko ratou pea e mohio ana, aua ra nei.
Nei te kupu ki a taua e noho nei i Aotearoa, kua oti te whakamoe nga patu ki te whare, waiho i kona kauki ai, kurupopo noa atu. Ahakoa matakana noa a nunui ma, a roroa ma i Oropi me nga wahi katoa, me whakawhirinaki taua, me tapapa tonu atu ki te Matua, ko Ia anake hoki te matapune o te pai.