Nama 176
191303

whārangi 1  (12 ngā whārangi)
2titiro ki te whārangi o muri


 
Te Pipiwharauroa HE KUPU WHAKAMARAMA NAMA 176. GISBOR-NE. " He ao te rangi ka uhia, He huruhuru te manu ka rere." MAEHE 1913 HE PANUI!. HUI O TE HAHI MAORI—PIHOPATANGA O WAIAPU. Takiwa. o Turanga me te Takiwa o Heretaunga. KA tu te Hui o te Hahi Maori mo te Takiwa o Turanga me tera mo te Takiwa o Heretaunga ki Manutuke a te 9 o nga ra o Maehe, 1913 Ko te ra hoki tera e whakapuwaretia ai te Wharekarakia o Te Tokotoru Tapu. Na HAPATA WIREMU, Atirikona. HE AITUA NUI NO TE WHENUA HUKA. NO tenei ra ano te tekau ma tahi o nga ra o Pepuere ka tae mai te rongo o te aitua nui i pa ki a Kapene Kooti ratou ko ona hoa, i mate i te whainga kia tae ratou ki te pito whakamutunga mai o te ao o te taha ki te tonga. Kei te mau mahara pea koutou ki korero i roto i tetahi putanga o ta tatou Pipi e whakaatu ana i reira i te taenga o tetahi tangata ko Kapene Amundsen tona ingoa ki taua wahi i poua ai e ia ki reira te haki a tona iwi a te Nowitiana hei tohu ko ia ko te Nowetiana kua tae wawe ki reira. Kei te mau mahara koutou ki nga korero o tona haerenga, hokinga mai hoki. Koiara ano te wahi i whaia nei e Kapene Kooti kia tae ia ratou ko ona hoa. I tae ratou, engari no to ratou hokinga mai ka aitua nei to ratou ope. I akina haeretia ratou e te huka a ko Kapene Kooti tonu tetahi o nga mea i mate tuatahi no muri iho ko etahi. I te rongonga o Kapene Amundsen kua mate taua tangata ka mea ia," Katahi te rongo tino kino, ki toku whakaaro tena atu ano te mate i pa mai kia ratou," ara i korero penei ai ia he mohio nona i runga i te mea kua haerea e ia taua wahi e kore e riro ma te huka a Kapene Kooti ratou ko ona hoa e patu, engari pea ma etahi tu mate weriweri i pa mai ki o ratou tinana. No te Hanuere o tera tau ka tae a Kapene Kooti ratou ko ona hoa ki te pito whakamutunga o te ao. I mohiotia ai i tae ratou ki reira, na runga na nga korero tuku mai a Kapene Kooti me nga tohu hoki i waitohu ai ia i roto i aua whakaatu mai. I kite a Kapene Amundsen i aua korero aua me ana waitohutanga ano hoki, a whakatika ana ia, me te mea ano, ko te wahi tenei i waiho atu nei e au te haki a taku hapu a te Nowiti- ana kia iri ana. Ko tenei mate no te Ingarihi, kati kei te aue katoa nga wahi katoa mo tenei aitua nui, whakaaroha hoki. TE AITUA O KAPENE KOOTI. NO tenei rate 12 o Pepuere katahi ka tae katoa mai nga korero o te aitua o Kapene Kooti ratou ko ona hoa. Kitea ana te toa o tenei iwi o te Pakeha kahore ona wehi mo te mate i runga i te whainga kia whiwhi to ratou iwi ki te kororia ki te honore. Tokowha nga tangata o Kapene Kooti i whiriwhiria e ia hei hoa haere mona ki te pito whakamutunga o te ao a ko te nuinga o to ratou ope i whakahokia mai i te huarahi ki to ratou tino pu pahi. Nga ingoa o nga tangata i whiriwhiria e Kapene Kooti hei hoa mona koia enei—