Nama 180
191307

whārangi 1  (12 ngā whārangi)
2titiro ki te whārangi o muri


 
Te Pipiwharauroa HE KUPU WHAKAMARAMA. NAMA 180. GISBORNE. " He ao te rangi ka uhia, He huruhuru te manu ka rere." HURAE 1913 "Kui! Kui! Whitiwhitiora." KUA MEMEHA TE PIPIWHARAUROA. KI te Iwi, ki nga Kai-tautoko ano hoki o te Pipiwharauroa Tena Koutou. He whakaatu tenei ki a koutou e whakamutua ana ta tatou Manu i muri iho o te putanga o tenei nama. E mohio ana au he tokomaha nga mea e mamae, e pouri hoki mo te whaka- mutunga i ta tatou Manu i- runga i te mea kua maha rawa nga tau e rere atu ana ia ki a ratou, kua waiho ona taenga atu hei mea tumanako i roto i te ngakau; kua hoangia a ia ki a ratou; kua ohangia hoki tona ahua i runga i te mea he oha ia na nga mea kua ngaro atu ki te po. E hoa ma e kore rawa e taea te pewhea. I roto i enei tau maha i whakahaerea ai te Pipi he nui nga mea i hiahia kia tae atu ia ki a ratou he tokoiti rawa ia o taua hunga e mahara ana ki te tuku oranga mai mona. Ko matou ko te hunga e whakahaere atu ana i ta tatou pepa i konei e ruihi ana i te utunga i nga raruraru o nga perehitanga me nga tukutukunga atu. E mau tonu ake nei ta tatou whakatauki i runga, " He ao te rangi ka uhia, he huruhuru te manu ka rere." Kua maha rawa nga tau inaianei he whakamahara tonu te mahi a te Pipi kia mahara tatou ki te tikanga o taua whakatauki otira he torutoru noaiho nga mea e mahara ana. Ko ianei ra te mate o ta tatau Manu. Kaore e taea te whakamomori i runga i te mea kua roa rawa te wa e whakamomori ana. Ko matou ko te hunga e whakahaere atu ana i te pepa i konei kei te tino pouri otira e taea hoki te pewhea. E tohu ano koa ka timata te korero whakaaroha atu o te Pipi i tenei nama (180) kua hori ake nei, kaore kua tata mai tona ra matenga. He mea whakaaroha rawa tenei otira me pewhea hoki i to tatou whakaaro-kore, aroha kore. E whakaete mai ranei he tete ano i muri i te Pipi ara o tona kawai ano pewhea ranei. He pai ra kia pera. I te taenga mai o te Pihopa o Waiapu ki konei ka korero ia i tona whakaaro mo te Pipiwharauroa. I mea ia i runga i te mea kaore e ea tika ana nga raruraru o te Pipi pai atu te whakamutu, engari me whakahaere ano tetahi pepa iti iho ko nga korero mo roto hei nga korero o te Hahi me nga rongo korero hoki o te ao ara me ki taua pepa he pepa na te Hahi. Ko tenei pepa pea e pai ki etahi ki etahi ano kaore e pai ara ki te hunga kaore nei e manako ki nga korero o te whakapono. Kua maro te whakaaro o te Pihopa raua ko te Atirikona Hapata VViremu mo tenei take, a hei a Hepetema nei pea puta ai te nama tuatahi o te Pepa hou. Me ki pea ko te tete ara hou ake tenei i muri i te Pipi. Engari he aha ranei i kawa ai ki etahi ngakau Maori nga korero o te Whakapono. Kei te marama te whakautu ara he wairua mate. No reira ka mutu ano pea te rongoa hei rongoa i taua mate ko nga korero o te whakapono pai ake i te waiho tonu atu i taua wairua kia mate ana. Otira kua whakamaramatia ake ra ahakoa ka