Nama 73
190403

whārangi 1  (12 ngā whārangi)
2titiro ki te whārangi o muri


 
Te Pipiwharauroa,

he kupu Whakamarama.

NAMA 73- GISBORNE. MAEHE, 1904.

NA TE ETITA.

Kua tae noa mai ki a matou nga korero o te hui a Ngatiapa, i korero ai a Te Ratana raua ko Te Kahu mo nga panui i taia ki TE PIPIWHARAUROA, kahore te ingoa o te tangata nana nei aua korero i tuku mai i tuhia, heoi ano te ingoa i tuhia ko " Nga Karere a Ma- huru." Ki ta matou whakaaro kia kaua aua korero e panutia, kahore he tikanga e rongo ai era atu iwi i nga ngangare a te whanau kotahi. Kua puta nga panui a nga taha e rua kua korero hoki a Te Kahu raua ko Te Ratana, he kanohi ki te kanohi, na reira ma- tou i mea ai me whakamutu tenei take, kaati noa i te mea kua puta nga korero. Ki ta matou whakaaro e whakaae a Te Ratana ra- ua ko te Kahu ki tenei. Kia ora koutou e

Ngatiapa!

Hei tera marama ka taia te wahi tuarua o te korero o " Te Haerenga o te Manene," ko te wahi tuatahi i puta i a Hanuere nei. Na te paanga o te Etita e te mate i kore ai e maaro tonu te takoto o taua korero. E mea ana matou ki te iwi kia ata korero i -'Te Haerenga o te Manene," no te mea ko tetahi tenei o nga tino pukapuka a te pakeha, e whakamaoritia nei, ko tenei te pukapuka kei raro iho o te Paipera te nui o tona taanga. Ko Te Wiremu Eruera kei te whakamaori i tenei pukapuka mo TE PIPIWHARAUROA.

Kei te kite iho pea nga hoa i etahi he o te tainga i ta tatou pepa, tenei he tangata hou kei te ta i enei ra, otira a muri atu i tenei ka whai matou kia tino iti nga he. E nga hoa, ahakoa kotahi putanga o ta tatou manu i te marama kei ngakau-kore koutou. Ko nga korero o TE PIPIWHARAUROA he mea ata whakatakoto, kahore e taupatupatu. Ko nga korero o te whawhai e takoto taupatupatu ana i roto i nga nupepa pakeha, otira pau

rawa ake te marama kua takoto maaro; kua kitea nga korero tika me nga korero teka, na konei i tika ai nga korero o TE PIPIWHARAU- ROA. Kahore kau he pai o te nui o te korero mehemea he korero he.

E whakamihi ana matou ki nga korero a Wikiriwhi te Tuaahu, o Te Whakarewarewa. I tana tukunga mai i ana hua kareao ma ta tatou manu, i tapiritia mai e ia enei kupu:

" E hoa, kia ora koe! Kei te whakamihi ahau mo to kaha, kaati tena he whakaaro noa iho noku ki ta tatou manu te take i tukua atu ai no te mea ko taku nupepa he nupepa pakeha ko te " Auckland Weekly News" me te " Niu Tireni Herara " i etehi wa. Kati ko te pai ano hoki o ta tatou Pipi ko etahi o nga korero kaore i roto i nga nupepa pakeha. Kia ora koe!" He tangata whai"whakaaro a Wikiri whi. E mea ana etahi tangata e korero ana ratou i nga nupepa pakeha heoi e kore ratou e pai ki nga nupepa maori. Kaore a taua nei korero e taia e nga nupepa pakeha a he aha te pai ki te korero taua i a te pakeha anake korero ka mahue a taua nei ake korero. I rongo matou i tetahi rangatira Maori e whakaatu ana ki etahi atu Maori he pirimia a Hohepa Tiamurini no Ingarangi! Mehemea taua tangata i korero i TE PIPIWHARAUROA e. kore ia e pohehe. Ehara a Hohepa Tiamu- rini i te pirimia, engari he Hekeretari mo nga Koroni, i tona mutunga ka tu ko Riritana hei hekeretari. I te matenga o tona papa keeke o Rore Tapere (Salisbury) ka tu ko Aata Parawhoa (Balfour) hei pirimia. Pai ke atu te matauranga iti he tika i te matauranga nui

he he.

Ka hoha pea koutou i te nui rawa o nga kupu a te Etita, kaati he kupu whakamutu- nga ko tenei: Kia hihiko te tuku pua kouka mai hei manawa mo ta koutou manu kei tau ki runga i te kowhai " ka kari te haunga."