Nama 3
19211001

whārangi 1  (12 ngā whārangi)
2titiro ki te whārangi o muri


 
Te Toa Takitini (I tipu ake i roto i Te Kopara) Ko te Kopara na Te Pipi-wharauroa Ko Te Pipi-wharauroa na Te Kupu Whakamarama o te tau 1898. Registered at the G.P.O as a Newspaper. NAMA 3 HASTINGS OKEPOTA 1. 1921 Nga Kaupapa o te Pepa. I rite te tangata ki te Atua i tetahi ahuatanga, ara i te kupu o te Rawiri e ki ra :—" Me whakaae ki te Toko-torutanga : otiia kaua e wehea te Kotahitanga." Kei te mohio a tatou tamariki ki nga tohu o nga pukapuka a te Y.M.C.A., ara ki te tohu tapatoru e kiia nei he "triangle." Ko tera tohu hei whakamahara ki nga wahi e toru o te tangata, ara ki te tinana, ki te hinengaro ki te wairua otiia kotahi tonu aua mea e toru ara he tangata. Ko nga kaupapa enei hei whakapiki ma " Te Toa Takitini.'' Kaore te tangata e tipu tika mehemea ko te tinana anake hei whakatipu mana. Kaore hoki he painga mehemea ko te matauranga mo te taha ki te hinengaro anake hei manaaki ma tatou. Kaore hoki e rite te tau mai o te waka mehemea ko te taha wairua anake hei mahi ma tatou. Ka titaha te waka. E toru nga wahanga o te tangata. Enei wahanga e toru me whakatipu katoa ka rite ai tatou mo nga huarahi o tenei ao tae atu hoki ki te ao wairua e kiia ai tatou " he tangata whenua," mo tera wahi. I roto i nga korero o ta tatou pepa tera ano nga wahi kua whakaritea mo te taha ki o tatou tinana, tera ano hoki mo te hinengaro, tera ano etahi wahi ka pa ki te taha wairua. Ka uru enei kaupapa e toru ki nga kape katoa o Te Toa Takitini. Ko te whakaaro nui kei roto i nga mahara o nga kaihautu o ta tatou pepa, he whakapiki i te iwi Maori. Kaore nga kupu tawai, whakatoi, takahi ranei i etahi o tatou e whakaaetia ki tenei pepa. Engari ano nga kupu whakahe mo nga pohehetanga, me nga whakatikatika. No reira e nga hoa kia kaha ra ki te awhina mai i tenei taonga a tatou. Waiho mui ma nga Etita e whakaaro te wahi hei perehi, me te wahi hei whakarere o nga korero. E koro ma, manaakitia mai ta tatou pepa ki nga korero nunui kei nga papa-kikokiko e mau ana kei tere to koutou haere, a ka ngaro ena matauranga. E