Nama 119
190802

whārangi 2  (10 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA. Ko Nirai Runga, ka 26 nga tau o tona Minita- tanga, he kaumatua, he ahua turoro, koia i whakaritea ai ko W. T. Pereiha hei mahi ki tera Pariha, ki Moteo. Ko Te Matenga Waaka, kua kaha-kore te tinana i te matemate, kua tae mai hoki a Abipene Rangi ki tona takiwa, ki Tu- ranga. No te 30 o Hepetema, 1906, i motuhia ai hei Rikona a Te Poihipi Kohere raua ko Henare Te Wainohu; no te 22 hoki o Tihema ka mahue ake nei i motuhia ai hei Rikona a Te Reweti T. Kohere ratou ko W. P. Rangi- huna, ko Ehekiera Te Raro: nonanahi nei hoki a Riwai Tawhiri i whakauaua ai ki taua mahi Minita. Te take o enei huihuinga o tatou, he wha- kaneke ake i te mahi a te Hahi i to tatou nei takiwa, he mea i te hunga e mau ana ki nga tikanga a Te Karaiti kia kaha te whakaputa i te uaua; he whakaoho i te hunga e. akuto ana; he kukume mai hoki i te hunga e tahuri ke ana kia maro te haere i ta Te Karaiti hua- rahi i whakatakoto ai. He maha tenei nga mea i to tatou nei wahi o te Hahi kihai i rite ki ta Te Karaiti tauira. He mea enei i tika ai te whakaiti i a tatou i te aroaro o Te Atua, e hono ai te inoi ki a ia kia whakawhiwhia nuitia mai tona Wairua e taea ai te whakarere i nga mea e he ana, " te wha- kau i nga mea e toe ana, ka tata nei te mate." E kiia ana kua nui haere te haurangi waipiro ki etahi wahi; ko nga he o te taha ki te marena kei te mau tonu; he tokomaha nga tamariki e iriiria ana, he tokoiti noa te hunga e tae ana ki te Whakau; ko etahi kainga e hapa ana i Whare-karakia, ko etahi hoki o nga Whare- karakia e ahua mate ana, ko te Pariha e hapa ana i te whare tika mo te Minita (ehara nei hoki i te mea tika kia waiho ma te Minita e whaka- aro he whare mona, engari ma te Pariha tena e whakaaro); ko te kohikohi moni hei whaka- tau i te "wero" a Te Wiremu Atirikona kua kore e maharatia; ko nga tamariki o etahi wahi kahore e whakaakona ana ki te Rongo- pai o Te Karaiti; he tokomaha te hunga e kumea ketia ana i runga i te huarahi tika e te tohunga Maori. He tohu enei tu mea katoa no te ngoikore, he mea e whakama ai tatou. He oranga ngakau ano ia te manaaki a Te Atua kua tau mai nei ki etahi wahi. Kua oho ake nei etahi wahi o Heretaunga, kua tahuri ki te whakaora i nga Whare-karakia, kua hiahia kia kakama te haere i ta Te Atua huarahi. Tetahi ko nga Whare-karakia kua maranga ki Maungatapu, ki Waimarama, ki Te Ngae, ki Mourea, ki Tokaanu, kua kore rawa nei he Whare-karakia o ena wahi i mua ake nei. He mea enei e puta nui ai te whakawhetai ki Te Atua. Ko te mahi ki te hunga kua peau ke nei i te whakapono ki a Te Karaiti, e mohiotia ana e tatou katoa, he mahi uaua. Hangai tonu nei tetahi wahi o tenei ki to tatou aroaro. He whakahau tenei na Te Atua i a tatou kia whakaputa i te uaua ki tenei mahi. Ko te hunga o tatou e tata ana ki te Ringa-tu, me tohe tonu ki te kukume mai. Kia puta hoki te whakaaro o tatou katoa ki te whakakaha i nga Minita, i nga wahine hoki, kua whakano- hoia ki roto ki nga iwi pera. Tetahi whaka- kaha, ko te whakawhiwhi ki nga mea hei oranga mo te tinana; tetahi ko te inoi ki Te Atua kia meinga ta ratou mahi kia whai hua. Ko taua mahi, he mahi he-manawa ki te tangata; otira e mohio ana tatou ko ta Te Atua kupu, e kore e hapa i te hua. Ta te tangata, he whakato i te purapura, ma Te Atua ia e mea kia tupu. Koia ahau ka mea nei kia maharatia tonutia i roto i a tatou inoi i nga wa katoa o tatou nei hoa mahi, a Ratema Te Awekotuku, a Turuturu Ngaki, a Mihi Toera raua ko tona hoa, ko Rotu. Ko te uaua o te mahi, kei a ratou, ko tatou kei te whanga e tu atu ana. Tetahi mahi pera kahore nei e maharatia nuitia ana e tatou ko te mahi ki nga motu o Melanesia. He mahi uaua ano tena kua ho- mai e Te Atua hei whakaarohanga ma tatou. Kahore e tika kia wareware tatou ki tenei; engari ko te kohikohi moni tetahi, ko te inoi tetahi ki te Ariki nana te kotinga kia tonoa e ia he kai-mahi ki tana kotinga. Ma te tuku moni ka kitea ai te pono o te inoi; kua ki mai nei hoki Te Atua, ma tatou, ma te tangata, e whakatutuki tana mahi, mana ano ia tatou e whakakaha. Tena tetahi korero mo tenei mahi, kua rongo pea koutou, ko te haere o Te Hokena raua ko Hone Papania ki te toro i etahi o nga motu e tata nei te reo ki te reo o Aotearoa nei. Te take o to raua haere, he rapu na te Pihopa o reira me kore e ahei kia haere etahi o nga tangata o konei hei whaka- ako i nga tangata o aua motu ki te Rongo-pai o Te Karaiti. He pai kia haere etahi o o tatou nei taitamariki ki taua mahi, ma reira hoki tatou ka tino mohio ai ki taua mahi, he mea whakahau mai na Te Atua ki a tatou. Tena hoki tetahi korero mo nga kura i Te Aute, i Hukarere. Kua puta te panui a nga Trustees, he whakaatu i te mate kua pa mai nei ki aua kura inaianei. Kei te mohio koutou ki te oranga o aua kura, ko te whenua o te kura i Te Aute. Te mate nui inaianei kei nga whare i Te Aute. Ko nga papa raina o aua whare, kua pau katoa i te popo. Me tango katoa mai nga rakau kua he, me wha- kauru hoki he rakau hou, katahi ka ora. Tera