Nama 126
190809

whārangi 3  (12 ngā whārangi)
titiro ki te whārangi o mua2
4titiro ki te whārangi o muri


 
HE KUPU WHAKAMARAMA.

Te taenga atu ka tu raua i te taha o te ma- taaho i waho. Ka unuhia ona tarahau, ka kakahuria tona kakahu, ka horoia tona kanohi ki te kaikaha tu ra, ka tiaina ona pare, ka ruia te wai o ona tarahau, ka pokaia—me te kaikaha tii ra ano ki roto—ka mauria ano e ia, ka tae ki te paepae toanga o te tatau, ka tukua iho e ia ona tarahau me tona tokotoko, ka tuturi nga pona, ka matakitaki atu. Ka rawe te iwi rangatira e noho ra, ka oti te whakakakahu ki nga kakahu rangatira, he aurei katoa te here o nga kakahu. Ko Tapuae, he paepaeroa, ko te mahiti ki waho. Kitea te nui o te aurei, o te kuru pounamu ki runga ki te pakihiwi o Tapuae, te here o nga kakahu o te mahiti, me te wahine a Tapuae, he wahine rangatira hoki, he kakahu kiwi te kakahu, me nga kotore huia te rakai ki tahi taha, ki tahi taha, o te mahuna, ko te tiki ki te poho, ko nga tautau tongarerewa ki tahi pakihiwi, ki tahi.

Ka mihi mai a Tapuae me te tokomaha, ka pohiri mai ki a raua. Ka whakatika a Taha- rakau, ka mau ki ona tarahau ki tona toko- toko, ka ki ki te hoa kia tomo, no muri ia. Ka tau raua ki te wahi i whakaritea mo raua. Ka kite iho ia i te urunga mona, ka utaina iho e ia ona tarahau me tona tokotoko ki runga, ka noho ia, ka meatia e ia hei pae mona te urunga ra me ona tarahau, kua pai tona noho. Ko Te Angiangi, kei te noho kopiri, huiki i te maku o ona kakahu.

Kihai i roa ka puta te kai. Ana, kihai i arikarika. Ka mahi te iwi rangatira ki te taka i te kai, he huahua, he manu, he kiore, he piharau, he tuna, he manu patu hou, he taro, he kumara, me era tu tini o te kai. Ka titiro a Tapuae ki te nui o tana kai, ka rere tana patai tuatahi ki a Taharakau, " E Taha, hua atu nei kia nui te tira kia tau ai?" Ka whaka- hokia e Taharakau,

"E nui tira e awhea mai ki aku pureke tarahau." Me te tohu iho ano tona ringa ki ona tarahau.

Ka whakaaro a Tapuae ka raru ia i te whaka- hoki a Taharakau. Ka pataitia ano e Tapuae tana patai tuarua, " E Taha, he aha anake nga kai o Turanga?" Ka whakahokia e Taharakau,

" He ahi kouka i te ao, He — wahine i te po."

Katahi a Tapuae ka mahara kua raru ia i a Taharakau, i te utu o ana patai. Katahi ka kai katoa, ka mutu te kai. Ko te nuinga ia o te kai, tu tonu. Katahi a Tapuae ka rui i nga aurei me nga kuru pounamu whitiki i ona kakahu, ka pataitia tana patai tuatoru," Taharakau he aha tohu o te tanata rangatira?" Ka whakahokia

e Taharakau,

" He whare maihi tu ki roto ki te pa tuwatawata, he tohu no te rangatira:

whare maihi tu ki te wa ki te paenga, he kai na te ahi."

He whakahawea mo Taharakau nga patai e toru a Tapuae. He whakanui kau mona kei nga whakahoki a Taharakau, ka iti a Tapuae.

Na MOHI TUREI.

Na TE ETITA—

I tapiritia mai e Mohi Turei ki aua korero mo Taharakau tana kupu awangawanga kei riri te tangata ki te ki tonu o te pepa i ana korero, ki ta matou whakaaro ia e hari te hunga whakaaro nui mo enei korero, mo te marama o te whaka- tako, mo te kaumatua o te kupu hei titiro ma te tamariki e whai nei i nga korero toto a te pa- keha. E whakawhetai ana te Komiti ki te kaha o Mohi Turei ki te tuhi mai i enei korero i runga i tona tuara, i roto i ona mauiuitanga tau- maha, me te inoi ano kia whakamarietia tona ngakau e te Atua o nga whakamarietanga katoa. Me whakamutu pea nga korero o Taharakau i konei ki te kore ano ia he kupu a Ngatikahungunu. Tukua mai he korero hou, ka parekareka t.e tangi o a taua korero ki te hoi o taringa. Kia

ora!

Kua tae mai te reta a Taite te Tomo o te Mahia, he tata i te kaki o te Etita mo te korenga o ana korero whakahe mo te Momona i taia. E taea hoki te aha, e te tau, i te poto- poto rawa o nga parirau o te manu nei i te titohea o te hua kareao—he moa ianei e ki noa te puku i te ngongonga i te hau moana. Tetahi he maha rawa no a taua korero mo te Momona, kei patua taua e tangata nei e Nikora. Otira taria marietia me kore he ngaru puku ka kokiri ai i to taua tiwai kia hongi ki nga ngaru nunui o Nukutaurua o te kauanga i Waikawa. Kia

ora, ano!

HE PANUI.

KI na hoa kua tukua atu nei he reta kia awhina mai i te mahi hokohoko (Bazaar) kei Turanga, a tenei marama e tu mai nei. I whakaaturia i roto i taua reta, te hawhe o na moni o tana hokohoko ka tukua ma te Hahi Maori, inaianei kua kitea e he ana tenei korero. He koata (¼) o te moni e tukua ma te Hahi Maori ma nga mihinare hoki i oa mou- tere. Ahakoa ka iti te wahi ma te Hahi Maori, me awhina ano tatou i na mahi mihinare, kia awhinatia ai taua e te pakeha; na konei tukua mai na mea kua hiato. Heoi.

Na TE KOMITI WHAKAHAERE.

Te Kau Kareti; Gisborne. Hepetema 21. 1908