Nama 148
191008

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
2 TE PIPIWHARAUROA. ma ia pariha ma ia pariha te kohi moni hei oranga mo tona ake Minita. Ka nui hoki toku hiahia kia tae atu te oranga mo te Minita ki te £100, kia nuku ake ranei. E taea ranei tenei? Ka taea ano, me ka whakaaro te iwi Maori ki nga mate o te Hahi, me ka puta to koutou uaua kia tupu haere ai taua Hahi. Tera e whai hua tona te Tahua oranga Minita tera pea hoki e tapiritia te £15 i whakaritea e te Atirikona— nga toenga ia ma koutou e whakarite kia £100 ma te Minita. Kei te tupu ake te Hahi, kati te ahua tamariki. He marama hoki ta te Kawenata Hou kia ora te Minita i nga mea hoatu noa e te whakaminenga. Ko te mea pai kia tu te kohikohi i nga Ratapu katoa, kia whakaritea hoki he Komiti i ia Pariha, i ia Pariha hei tiaki i te moni hei tukutuku tonu i te oranga mo te Minita. He mea nui hoki kia watea te Minita i nga rarurara o te mahi kai, kia whaka- paua katoatia ai tona kaha ki te mahi minita. Kahore rawa a te Atua painga ki te tikanga kia whakamutua e te Minita tana mahi Minita kia tahuri ke ai ia ki te mahi kai. 3. Whare Minita.—Tera ano tetahi mea kia mahia wawetia, ara te hanga i te whare Minita. i ia pariha i ia pariha kia whai kainga ai ratou ki te wahi e minita ai ratou, kia watea ai ratou ki te korero pukapuka. Tetahi mate o te Hahi o naianei he kore Minita, engari e kore nga tai- tamariki e pai kia whakapainga hei minita ki te kore he oranga, he whare Minita hoki. 4. Whare Karakia.—Kua rongo ahau ka nga- kau nui te iwi ki to ratou whare karakia i etahi pariha—i etahi pariha ka tukua te whare karakia kia takoto noa ana. He mea pai te hanga i te whare karakia. Pai ke atu ia te mahara ko te whare karakia he Whare ma te Atua, ko te mea pai hoki mo taua whare ko te ata tiaki, te whaka- pai tonu. Ka pehea mai te Atua me ka ware- ware noa matou ki tona Whare E kore ianei e mea he wareware tera ki a Ia ano? Ko te tikanga pai mo te whare Minita, mo te whare karakia me inihua, me tuku hoki ki etahi kai- pupuri (Trustees) hei pupuri mo te Hahi. 5. He Kai-mahi Wahine.—Ka puta taku whakawhetai ki nga wahine e mahi ana i waenga- nui i a koutou i te iwi Maori. He tumanako hoki toku kia tokomaha noa atu aua wahine. Ki taku mahara ko te mea pai kia takirua nga wahine pera ki te wahi kotahi. Ko te mea pai hoki kia mohio tetahi o raua ki te tiaki turoro. He mahi pai tenei ma nga kotiro kua puta mai i te kura i Hukarere. 6. Kai-karakia.—He mahi pai te mahi a te Kai-karakia, he taonga hoki tera mai te Hahi-— Ka nui toku hiahia kia kurangia nga Kai-karakia e nga Mihinare kia kaha ai ratou ki ta ratou mahi nui. E mea ana ahau kia tukua he rai- hana ki te Kai-karakia kei tohu he mana tona ki te mahi. 7. Kupu Whakamutunga.—He mea pai kia whakahokia nga tangata o te Hahi ki te ngakau karakia. Engari kia matua whakapainga tetahi pariha katahi ka haere te tangata ki reira whaka- oho ai, kia ata whakaarohia hoki nga hua o taua mahi whakaoho, ara kia whakaritea he karaihi Paipera, he kura hoki mo te whakau. Ko te Whakau te wa e maia ai te tangata ki te whakaae nui ko te Karaiti tona Ariki, ma reira e toko- maha ai, e ngakau nui ai te hunga tango Hapa. He tautoko taku ki tohe a etahi kia whaka- rerea e koutou te kai waipiro, ka pehia hoki nga hiahia kino katoa o te kikokiko. Ma te Atua e tohutohu, e manaaki na mahi a tenei Hui. Ma te Wairua Tapu tatou e arahi kia mahi tahi tatou kia whai-pai ai te iwi Maori. Kia mahara koutou ki te whaka- pono o o koutou tupuna me te mahi tonu i na mea katoa e tukua e te Atua hei mahinga ma koutou. TE MATENGA O TAHURIORANGI. NO te 30 o nga ra o Hune ka mate a Tahuri- orangi ki Mourea, Rotoiti. Ko ona tau i tona motenga e .67 Ko tetahi o ana tamariki ko Rev. Ropere Tahuriorangi e mahi mai nei i roto i te maara a te Ariki i te takiwa ki Waikato. Ko tetahi tenei o nga morehu kaumatua o Te Arawa. I haere tona kawai i roto i nga hapu nunui o Te Arawa, o Pikiao, Tawakeheimoa, Uenukukopako, Whakaue, Tuhourangi, Rangi- tihi, Waitaha, Raukawa, me era atu Hapu. He kaumatua ngawari, pai hoki ana whakahaere ki te iwi. Kaore te tangata e mamae i ana korero. He tangata tenei i matea nuitia e nga hapu o Te Arawa. He maha nga pakanga i uru ai tenei rangatira, ara i Tapuaeharuru, i te Kaokaoroa, i Ngatapa, i Whangamarama, i Ruatahuna, me era atu wha- whai a Te Arawa. Ko tetahi rangatira toa tenei i roto i aua pakanga. No te mutunga o na pakanga ka huri tenei kaumatua ki te hapai i nga tikanga o te whakapono. Mai i tera wa taea noatia te ra i mate ai ia, i u tonu tana pupuri i nga kaupapa o to tatou whakapono. He nui te pouri o te Arawa mo to ratou rangatira kua wehe atu i tenei ao.