Nama 22
19230501

whārangi 2  (16 ngā whārangi)
titiro ki te whārangi o mua1
3titiro ki te whārangi o muri


 
TE TOA TAKITINI Registered at the G.P.O, as a Newspaper. Te Utu mo te Pepa 6/6 i te tau. Me penei nga reta " Te Toa Takitini," Box 300. Hastings. NAMA 22.HASTINGS. Mei 1, 1923. TE KANOHI KOREKOREKO O TE MAORI. HE kaumatua rongo nui a Te Peehi (Elsdon Best) i waenga- nui i te iwi Maori me te pakeha. Kei runga atu tona mohio ki nga korero tawhito o te iwi Maori i te nuinga o tatou koroua Maori. Kua hoki mai ratou ko ona hoa i te Tai-rawhiti. I tae rawa ratou ki Waiomatatini ki te rapu haere i nga korero tawhito o era hapu o tatou. Kotahi marama o ratou ki reira e tuhituhi ana i nga-korero mo te putake mai o Ngati Porou tae noa ki a ratou karakia, a ratou waiata, me o ratou whakapapa. Tenei te whai-korero a Te Peehi ka perehitia hei matakitaki ma tatou. Kanui nga korero mo era atu hapu o tatou kaore ano kia tuhituhia. Mehemea tera ano tetahi kaumatua mohio kei te hiahia ki te tuku iho ki ona uri i nga korero tawhito kei a ia e matau ana, tukuna atu he kupu ki a Elsdon Best, Wellington, a mana e whiriwhiri tena take. Ko te tumanako o Te Toa Takitini kia tino manaakitia te kaupapa korero a Te Peehi, a kia tahuri tatou nga morehu o tenei wa, ki te hopu haere i nga pitopito korero mo o tatou tipuna. Ka tika te korero a Te Peehi e ki nei " I ahua korekoreko nga kanohi o te Maori i te kitenga i nga taonga whakamiharo a te pakeha, mahue ana nga taonga Maori, whiua ana ki tahaki." E nga iwi o Aotearoa me Te Waipounamu tae atu ki Whare- kauri, e hoki tatou ki te kohikohi mai i nga taonga o a tatou matua i whakahaweatia nei e tatou i te korekoreko- tanga o tatou kanohi. Mirimiria o tatou kanohi kia kite marama ai tatou he taonga tonu ia nga mea i whiua nei e tatou ki tahaki. Whaia ko te Matauranga.