No. 169
191206

page 1  (12 pages)
2to next section


 
Te Pipiwharauroa HE KUPU WHAKAMARAMA. NAMA 169. GISBORNE. ' He ao te rangi ka uhia He huruhuru te manu ka rere. HUNE 1912. " Kui Kui Whitiwhitiora ." HE UHUNGA. Piko nei te matenga, Tau mai ko te pouri nui; E te Tama a te Atua, Tenei arohaina mai. Ngaro nei o matou hoa, Riro atu ki te po; Tangihia i muri nei, Tenei arohaina mai. WIREMU PARAONE TUREI. I WAENGANUI po o te Turei te 25 o nga ra o Hune nei ka moe a Rev. W. Paraone Turei i te moenga roa. He nui te pouri me mamae o te ngakau, i runga i te taha ki to te tangata whakaaro, mo tenei rongo kino. He tama a Paraone na Rev. Mohi Turei raua ko Kararaina. He kaumatua rongonui tenei i roto i te Hahi Maori i Niu Tireni katoa. I kuraina a Paraone ki Te Aute. I te mutunga o tana kura ka haere ki Te Rau kura ai mo te mahi minita. No te tau 1908 ka whakapakia hei Rikona, ka whakanohoia hei minita mo te Pariha o Hikurangi. I te tau 1910 ka whaka- pakia hei Piriti. He tangata ngakau nui a Paraone ki te mahi i tana mahi, ahakoa te nui o tona Pariha, e taea ana e ia te haere nga wahi katoa. He tamariki tonu a Paraone, engari ko ona whakaaro me ana mahi he whakaaro he mahi na te pakeke. He tangata tinana pakari ia, e tino mohiotia ana hoki e nga tangata o Turanga tae atu ki Nepia mo tona toa ki te purei whutupooro. E whitu ona tau e purei ana mo te tuma nui o Turanga, e kiia nei te ingoa he repe. Otira hei aha te pakari o te tinana ki te mate, he poto te wa kua ngaro atu i te tirohanga. I a ia i te kura, tae noa mai ki te wa i Te Rau kaore e pangia ana e te mate, tena koa i tenei he taniwha tonu nana ia i tukua ki raru. I roa rawa raua ko tona mate i riri ana, i mahara ia ko nga mate hauarea noa nei, kaore i pai ki takoto; tae noa ki te wa i kaha ai tona mate, haere tonu ia. I taua wa i kaha ai, whakaaro tonu ia he rewharewha noa pea taua mea e whaka- ngoikore nei i tona tinana, ka mea ia kia haere atu i tona kainga ki Waipiro ma raro tonu. Ko te tawhiti e wha maero. Ko tona mea kia werawera ia ka pai, kia hoki mai ka kaukau, ka moe ai, kia oho rawa ake i te ata kua pai. Ko tana rongoa tenei mo te rewharewha; ka rewharewha ka haere ki te \whutupooro, te hokinga mai ka kaukau, oho rawa ake i tahi ra kua pai. Te taenga ki Waipiro ka kaha rawa tona mate, ka haere ki te Takuta ka kiia mai he piwa. Ko tona hokinga tera ki te kainga, tae rawa atu ki te kainga kua kore he kaha, ka hinga iho ki te keeti o tona whare, ngaro tonu atu nga mahara, he mea mau atu ia i reira na te tangata ki runga i tona moenga. E rua ano ona wiki e takoto ana ka mate. Ko tetahi tenei nga tangata kaha o te Ropu