Volume 0, No. 19
18830915

page 1  (16 pages)
2to next section


View the commentary of this paper

 

TE KORIMAKO

TE KORIMAKO.
He Nupepa whakaatu i nga rongo o te ao katoa, nga tikanga o Te Whakapono, me era atu mea.
NAMA 19.] AKARANA, HEPETEMA 15, 1883. [TE UTU, 3D.
HE MATE.
No te 25 o nga ra o Maehe ka hemo, ki Mangawhai, a ANI KANARA TE AWHETEKI. He wahine aroha ia ki nga iwi tuku mai.
No te 18 o nga ra o Akuhata ka hemo, ki Whangape, a TE AOMARAMA, ona tau 21. He tamahine na Taraiti Te Wewehi, te iwi ko Ngatipou. Ko te roimata tenei, ko te pouri tenei; ko nga taonga enei i wahotia iho.
Ko HUIHANA TE ARAWAERE te hoa Tino Aroha, o Hoone Karawe, i mate ki Kikowhakarere, Karamaene, i te 46 ona tau, i te 6 o nga ra o Hepetema. He tamahine na Hopa Te Wheko, hei Mokopuna kia Ta Harangi, tetahi o nga rangatira o te Ngare Tauranga. Haere e HUI i to mate, ki te ora, ora, ora! Waihotia iho, e tai, ko te puna-roimatu ki a matou.
PANUITANGA.
Kua oti te whakatuturu i naianei te kupu tuatahi e mea nei, ko nga pukapuka katoa e tukua mai ana ki tenei nupepa, me tuhi mai ki "TE KORIMAKO, Poutapeta 270." Ki te rere ke, kowai ka kite i te tutukitanga mai.
PANUITANGA KI NGA KAI TUHI MAI.
Ko nga pukapuka katoa mo tenei nupepa me penei te tuhi mai ki "TE KORIMAKO, kei Akarana, Pouaka Poutapeta 270."
ALL communications to this paper are to be addressed to "TE KORIMAKO, Auckland, Post Office Box 270."
PANUI. Ki te mea ka tukua mai kia taia ki tenei nupepa he kupu whakaatu mo te marenatanga, mo te whanautanga, mo te hemonga, o te tangata me takai marire mai te hereni kotahi.
He pane-kuini te moni tika.
HE KUPU WHAKAATU. Ki te hiahia etahi kia hokona he mea i runga i nga Panui taonga o tenei nama o TE KORIMAKO, me whiu te ingoa o TE KORIMAKO ki nga pukapuka tono, te taka kia mau ai nga Panui a nga Pakeha ki te nupepa nei, na te mea, he utu ta nga Pakeha mo aua Panui.
THE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing "TE KORIMAKO, P.O. Box 270, or by leaving their subscriptions with Messrs. Champtaloup & Cooper, Stationers, No. 76 Queen-street.
PANUITANGA KI NGA TANGATA TANGO I "TE KORIMAKO."
KIA mohio nga tangata tuku moni mai, ki te tae nga KORIMAKO ki te 12 heoi ka mutu nga nupepa mo te tau kotahi, ki te hiahia te tangata kia tukua atu ano TE KORIMAKO mo te tahi tau me tuku mai nga panekuini mo te rua hereni, ko te ingoa o te tangata nana te tono kia marama te tuhi.
HE mea atu tenei ki nga tangata tuku tono mai kia marama te tuhi i nga ingoa tangata, kainga hoki. Kua maha nga pohehetanga he kore kahore e mohiotia etahi o nga tuhituhi.
TE take pea o etahi he, he tiki noa atu e te tangata nga nupepa o te hunga e utu tika ana.
KI a J. MIDDLEMAS, Whitianga, ki a TAMATI WAAKA, kei Omaio, Opotiki; ki a PAURO NGAMUKI, no Opotiki; ki a ATAMA TE HARA, no Mangonui: No te Nama 14 ka pau nga 2 hereni i tukua mai nei; a, kaore i whakataua mai a muri koia i mutu ai te rere atu o te manu nei. No te Nama 13 ka mutu te wahi ki a PENE NGAHIWI, kei Hamutana, Waikato.
I TUKUA tikataia ki Te Pohi, i ia, i ia marama nga nupepa mo REREMOANA TOHIKURA, no Whanganui, me W. K. LEWIS, o Dargaville, me E. WEBB, o Opotiki.
KI a KOORO KINAHURU: Kaore kau he tono nupepa, kaore hoki he pane-kuini tae mai.
Te Korimako.
"Kei te Atua to tatou piringa."
HEPETEMA 15, 1883.
MAWAI e whakaaro nga tini tikanga o nga Kingitanga o tenei ao, e ohooho nei, e huaki nei, e kohaehae nei, e wenewene nei, e tautotohe nei, ki te mana, ki te paenga-whenua, ki tenei mea a ratou, ki tera mea? He koki whare ka kitea, ko nga koki o te ngakau mawai e taatari? I hewa te ngakau, ma te mohiotanga nui o nga iwi o Oropi, o Ahia, e pehi te manawa-whakatara, me te aumarotanga ki te whaiwhai mana; a, ma nga kupu o te Karaipiture e patu te hiahiakino o nga iwi ki tenei hanga, ki te hapai pu, ki te hapai hoari. Tena ko tenei, e nui-haere ana nga tikanga a nga iwi Pakeha ki te whakakinokino i a ratou ano, wareware noa te ngakau o nga iwi o Oropi me era atu whenua o te ao, ki te Ture nui i tukua iho i te rangi: "Kaua koe e patu."
I nga ra tonu nei, kua karangaranga riri a Haina raua ko te Wiwi. Kua karangaranga riri a Parani ki a Tiamana e ai ta nga waea. Kei Matakahaka tetahi pakanga a te Wiwi, kei te paenga-rohe o te Kingi o Anama raua ko Haina tetahi pakanga a te Wiwi. Haunga hoki te raru ki Paniora, ki Hangare, ki Ruhia, ki hea, ki hea. I runga i enei tikanga whakaoho-mauri, whakahopi i te ngakau, kua tino matauria e nga pu-whakaaro, kua heke-haere nga ture pai a nga iwi; a, kua whakahaweatia e nga Kingi nunui, nga Ture whakaora tangata a te Atua.
NA mua, na nga kahika te pepeha e ki nei, "Kai a te tangata, he kai titoi kaki; mahia e tona ringa, tino kai, tino makona."Ka pai tenei ako mai a nga tupuno. E karanga tonu ana tenei whakatauki kia ngawari te