Pukapuka 2, Nama 40
18641224

whārangi 2  (4 ngā whārangi)
titiro ki te whārangi o mua1
3titiro ki te whārangi o muri


Tirohia ngā kupu whakataki o tēnei niupepa

 
TE WAKA MAORI O AHURIRI.

tohunga nana i hanga; kua mahia katoatia

ki te kapa a raro, me nga titi hoki he kapa

katoa ano, ekore e waikuratia. He rewa

tahi taua kaipuke; ko te tu kaipuke kake

ki te hau ia. He kaipuke rahi ano; ko

nga utu i utua ai £700. Haere tau, e

Ihaka!

Ko te Whitimoa tena kua riro ki Ingarani

e korerotia ana. Kei a te Makarini anake

nga mahi o Heretaunga inaianei.

Ko Pitiera Kopu raua ko Hamana Taiapa

tenei kua tae mui ki Nepia nei, i runga kai-

puke, kia kite i a te Makarini. Ko te

kaipuke a Hamana, ko te " Reeri Paata, "

kua retia e ia ki te pakeha, kia Ropata

Pakita, he pakeha no tona kainga ano.

Nga utu mo te reti o taua kaipuke e hoatu

ana ki a Hamana e iwa pauna (£9) i roto i

te marama—ia marama, ia marama.

HE WHARANGI TUWHERA MA NGA

NOA TUHI MAI.

Patangata Tihema 14 1864.

KI A TE KAI TUHI O TE WAKA MAORI.

E HOA, —He kupu naku ki a koe tenei.

Kua rongo au i te korero o te Atua hou o

Taranaki, a, tae mai ki Waikato. Kua tae

mai hoki inaianei ki konei whakaakotia ai

nga karakia me nga kura hoki. Ko te

ritenga o taua Atua, hei whakamate katoa i

tau taha i to te pakeha. Taihoa tatou ka

rongo i te tika o nga korero a taua Atua ki

te ritenga o ta raua mahi ko te Tianara.

Penei nga korero e rongo ana au ko te

karakia tenei o taua Atua; —

Tangi Kerei; paata mai—me rire.

Tangi Kerei; paata mai—me rire.

To rire, rire.

He karakia whakamutunga tenei: —

Kororia, me te paata.

Ekore e taea e au te korero nga karakia

me te kura te tuhi atu, me nga ritenga hoki

o taua Atua.

Na HORI NIA NIA.

[He tika tau e Hori. Ekore ano koa

koe e taea te korero i ena mahi porangi;

kowai koia te tangata whakaaro tika e

mohio ki ena mahi ? E ki ra koe ko tena

Atua me tona ' paata, " me tona " tangi

Kerei, " me tona parau atu, hei huna i au !

Katahi ra ia te mahi kuare rawa atu ! Ko

au tenei ko te tangata nana i haere te moana

nui, te waha o te Parata; kua taea e au a

runga i te rangi, a raro i te whenua; kua

kitea e au nga mea ngaro o te ao; a, kore

ana an e mate i ena mahi nunui, kia ngaro

noa au i tenei moutere paku, i tenei Atua

parau ? Koi noho noa te tangata, whaka-

rongo noa ki tena mahi pohehe. Kaore

ano koutou kia mohio noa ki te mahi a

Waikato, he whakataki mate mo te motu

nei? No te timatanga o tona mahi Kingi

he kaha tangata tona kaha; no te matenga

ka kiia he kaha Atua. I hea ranei ona Atua

e ngaro ana i te timatanga o tona mahi, te

puta mai ki te whakaatu i re mate e tako

ana mai ki mua; te rironga o te whenua i

te pakeha; te maunga o te tangata i te

herehere ? No te matenga katahi ano ka

puta mai, ka ki mai; —" He oranga tenei! "

Te whakaaro a Waikato i te whakaturanga

o tona Kingi tera e eke nga iwi katoa o te

motu ki runga ki tana tikanga. No te

korenga, no te matenga, katahi ka whai ki

nga tikanga whakawehi i te tangata kia

tahuri mai ki a ratou—ara, ko nga tikanga

Atua. Otira me waiho ratou me o ratou

Atua kia mahi ana. Engari ko nga tangata

whakaaro totika kaua rawa e whakapono ki

enei mahi, koi waiho hei raru mona i muri

iho. • Otira e mohio ana matou ki nga

tangata o Heretaunga, he iwi matau; e

kore e ware ona whakaaro—inahoki; —" E

kore e ware nga mahara o te Kai Ahura-

hanga. "]

Pourerere, Tihema 1864.

KI A TE KAI TUHI o TE WAKA MAORI.

He kupu atu tenei kia koe kia tukua

atu e koe ki te Waka Maori kia rongo

mai oku hoa maori o te Kawanatanga

kei Mohaka, kei te Wairoa, kei te Mahia.

E hoa ma kia rongo mai koutou, e hoki-

kohi katoa ana nga tangata o Heretaunga

nei i te rawa, i te taonga; ahakoa Kingi,

ahakoa Kawanatanga e kohikohi tonu ana

i te taonga mo Waikato. He kore ra hoki,

kaore ratou e pai ki te pakeha me ona

taonga; tahuri ana ratou ki te kino. Muri

iho tahuri ana mai ki nga maori o konei

hei hoko rawa atu mo ratou. Ko tana utu

taonga tenei mona, koia, ra tenei, kua tau

ki runga ki a ratou a Ihowa hei tuara mo

ratou, whakatikaia ana e nga tangata o

Heretaunga nei. Ki au he parau tahi, he

patipati taonga mo ratou. Whakarongo

mai iana ki toku whakahoki, he waiata na

Whiuwhiu; —

Hoake rawa nei nga mahara kia puheto au.

Koi tua iti e oroa ana mai ki nga mahi a raro,

a Tangiteruru.

Ki te pati, ki te kai, ki te rore, ki te hanga,

Kia whiwhi ai ia, kia moe ai ia i te moenga o

Titaka

I a karipiripi, i a karaparapa, i a konohi rau.

—I te waru o nga ra o Tihema ka tikina

te rakau, 55 putu te roa me te 4 inihi, mo

te haki o te Kuini. E waru maero te roa

o te kainga i tikina ai taua rakau. Hari

ana oku pakeha me oku maori ki toku

haki. Heoi ano.

Na MORENA Kai Whakawa o te Kawa-

natanga. ____________

Wairarapa, Noema 1864.

KI A TE KAI TUHI o TE WAKA MAORI.

Ko nga korero tenei o te Hui a Wi Tako

Ngatata ki tana hui ki Waikane i te 27 o

nga ra o Oketopa 1864.

Kei runga ko Heremia te Tihi; —" Wha-

karongo mai e aku hoa ki te ritenga o te

hui o to tatou hoa. Koia tenei, me tuku

mai tenei tau ki a ia mo tana mahi kia

mahi ia ki a te Kawana i tenei tau, kia ki-

tea te whakaaro o te Kawana inaianei.

Hei reira tatou mohio ai ki te mate o Nui

Tireni; hei reira tatou mohio ai ki te wha-

kaaro o to tatou hoa. Engari me tuku e

tatou tona whakaaro kia puta ki tona hoa. "