Pukapuka 0, Nama 75
18880516

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


Tirohia ngā kupu whakataki o tēnei niupepa

 

reira te tino pa kaha rawa o te ao me nga ope hoia a nga Ingirihi ko taua pa he mea keri i roto i te maunga toka he mea whakaana ki nga ruuma tokomaha he toka a runga, he toka a raro, he toka nga pakitara o aua ruuma me he ana kowhatu kei reira nga mano hoia horerawa e tata mai te hoa riri i te mahi o nga purepo e tete mai nga mano niho i nga kowhao i roto i aua ana kowhatu horerawa nga kaipuke e puta i te kuiti o taua wahi moana, hei huarahi, tena no nga kaipuke ki te moana nui e karangatia ana ko te Ataranatiki (Atlantic) ki te puta nga kaipuke i taua wahi kuiti kua watea nga kaipuke ki te rere ki nga wahi katoa o te ao, mehemea ka rere whakararo ka miri haere i tetahi ki nga kaainga o nga Paniora ki te kaainga o nga Wiwi tae rawa ki Ingarangi. Mehemea ka rere aua kaipuke ki te torengitanga o te ra ka whiti ratou ki Amerika mehemea ka rere ratou whakarunga ka poto katoa taua whenua a Awherika, ano ka tae ratou ki te tongi whakarunga o taua whenua nui, ka huri whakararo ka tae ano ratou ki Inia a ka rere atu i reira ki te rawhiti kua watea nga moana o Haina take rawa i taua kaainga ka huri whakararo kua tae ratou ki to ratou kaainga whakararo atu i o tatou motu o Niu Tireni, o Poihakene ara a Atereiria (Australia). Na kei reira ta ratou pa me nga manuao kotahi tekau ma ono a e kiia ana tena nga taniwha manuao e rua te hanga mai i Pitapaka (Petersburg) me ake ka rere mai ki to tatou nei moana te Moana Marino ki taua pa kua tohutohungia kei te taha whakararo ia tatou, ki te hiahia ratou ki te rere mai ki konei e kore e tae ki te marama ka u mai ratou ki tenei whenua nakonei, kei te huarahi mataara tonu o tatou tini manuao e tiaki ana ia tatou kei tae whakarere mai te hoa riri ki nga whenua i tenei moana. Waihoki kua takoto nga waea o te terekarawhe whiti noa i konei ki Poihakene tae rawa ki Oropi whiti ana i reira ki Ingarangi ahu atu ana ki te torengitanga o te ra ki Amerika mutu mai ana i reira, inaianei i te wiki nei kua tae mai tetahi kaipuke manuao hei ruri i te hohonutanga o te moana he huarahi mo te waea ki Kanata (Canada), ara ko Amerika Whakararo, penei ka u ngutu tenei waea ki nga waea o te rawhiti o Amerika ma konei ka rua nga huarahi waea tawhio noa te ao hei tiaki i a tatou ma konei e kore tatou e rokohina e te oho whakarere notemea ko nga mahi o te hoa riri ka kitea ka mohiotia e te runanga e mahi nei ki te tiaki i ana tini iwi, i ana tini reo, i ana tini tangata, e noho tirangaranga ara e noho marara ana i nga tini wahi o te ao e kore rawa te ra e torengi i ana kaainga notemea ano ka tae ki te kaainga me he torengitanga he ra whitinga tena ki tetahi kaainga penei tonu hoki tonu mai ano ki a tatou, hore he whitinga ra e kore e whiti ki nga whenua i raro i te mana o Ingarangi. He wa hopohopo tenei kei te whakakaha a Taakei i ana pa kei te whakaemi a Ruhia i ana hoia ki nga rohe katoa e patata ana ki nga whenua.. Kei te noho puhaehae nga Tiamani ki nga mahi whakawai a nga Ruhiana kia Itari me Parani a e kanga ana enei rangatiratanga e rua e nga Tiamani ahakoa e penei ana nga iwi o te ao kia mahara ano tatou ki to tatou whaikii, "Kei te Atua to tatou piringa."

 

Ko Ingarangi me Hamoa.

 

KUA tae mai nga rongo no Ranana e kii ana kua mutu te totohe a Ingarangi ki nga Tiamani, mo Hamoa tena pea taua motu ka waiho iho mo nga Tiamani. E hara i te hanga te pouri o nga tangata katoa mo tenei mahi whakaaro kore a Ingarangi ki o ratou mokai, i nga tau kua pahure nei i tae mai etahi o nga rangatira o Hamoa ki tenei Kawanatanga a tono ana e ratou kia tiakina ratou e tenei Kawanatanga. Otira kihai tenei Kawanatanga i kaha i te kore mana, ma Ingarangi e whakaae katahi ka tika to ratou whakaaetanga, na i te wa e rapurapu tikanga ana kua tae mai nga Tiamani ki Hamoa whakararurarua ana te whenua e ratou i o ratou tekateka ko te tukunga iho i riro herehere a Mareitoa kawea ana e ratou taua Kingi ki etahi o a ratou kaainga i Awherika, whakaturia pokangatia ana a Tamahihi he Kingi mo Hamoa, he tangata tera kihai rawa nga tangata o Hamoa i pai he Kingi ma ratou, na kua ahua taurekareka taua iwi i tenei mahi rikarika me tenei mahi nanakia a nga Tiamani, notemea ko nga pu me nga manuao a Tiamana ka tukua hei awhina i a Tamahihi, te Kingi pokanoa i whakaturia e nga Tiamani. E whakama ki, ana matou katoa mo tenei mahi nanakia rawa Tenei matou nga tangata katoa. o enei motu te patai. He aha penei ai te whakaaro kore a Ingarangi ki ana tamariki nana i whakaako i nga huarahi o te pono me te tika. Na Ingarangi nga mihinare i tuku atu ki taua