Pukapuka 0, Nama 68
18871015

whārangi 1  (12 ngā whārangi)
2titiro ki te whārangi o muri


Tirohia ngā kupu whakataki o tēnei niupepa

 

TE KORIMAKO

 

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

 

NAMA 68.]

AKARANA, OKETOPA 15, 1887.

[TE UTU, 6D.

 

PANUI KI NGA KAI-TAUTOKO.

 

KO te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me tuku tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free. Subscriptions are payable in advance.

 

PANUI KI NGA KAI-TUHI MAI.

 

KO nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

 

NOTICE TO CORRESPONDENTS.

 

ALL communications to this paper are to be addressed to "TE KORIMAKO, Box 270, Post Office, Auckland."

 

PANUITANGA.

 

KO nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whakaatu mai kia tukua atu ano tetahi.

 

PANUITANGA.

 

HE whakamahara tenei ki nga hoa-tuhimai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka riro atu i a ia tetahi wahi o te moni. Erangi me tuku mai i te panekuini, i te nooti, i te tieki, i te monioata-waea ranei.

 

PANUITANGA.

 

KO te mea tika rawa me whakarite e nga kaitautoko, he Pakeha e mohio ana koutou i o koutou takiwa, hei taunga atu mo a koutou nupepa. A me tuhi mai te ingoa o te Pakeha kia mohio ai matou hei tukunga atu mo te nupepa. Me korero ranei e koutou ki nga Poutapeta i o koutou takiwa, kaua a koutou nupepa e hoatu ki tetahi tangata. Ko nga reta me nga panui katoa e tukua ana mai kia raia ki TE KORIMAKO, kia marama te tuhituhi, kia pai te wehewehe o nga kupu. Me tuhituhi nga korero ki te taha kotahi o te pukapuka.

 

TE KORIMAKO

 

"Kei te Atua to te tatou piringa."

AKARANA, OKETOPA 15, 1887.

 

KUA oho whakarere nga tangata katoa o nga Motu me nga Koroni katoa e takoto tawhio i to tatou nei kaainga, hee ana nga manawa o nga iwi katoa mo te mahi pokanoa a Tiamani ki taua motu a Hamoa, i tera nama o TE KORIMAKO mo Hepetema, i whakahaerea etahi o nga korero mo te mahi pokanoa a taua iwi. I u ano a ratou manuao ki Hamoa haere ana ratou ki utu i te kainga e karangatia ana ko Apia, whakaekea ana e ratou taua kaainga otira kahore he hoariri notemea kua whakaakoria nga tangata-maori o taua whenua e nga Merikana me nga Ingirihi, kia kaua ratou e tohe ki te whawhai kei whaitake a Tiamani i runga i te pakanga ki aua motu, whakaturia ana e taua iwi a Tamahi he Kingi, notemea i hiahia ratou kia whakanuia taua tangata kia hinga ai a Mareitoa te tino Kingi o aua motu, ko tenei tangata a Mareitoa kua mohiotia kua whakaaetia e Ingarangi me Amerika, ko ia te Kingi o taua moutere, na kua turakina te Kingi e aua Tiamani, a kua panuitia a Tamahi he riwhi mo te torona a Mareitoa. Ma reira pea ka riro ai te mana o aua moutere i a Tiamani. Rapu noa ana nga Tiamani i a Mareitoa mo nga ra e hia ranei kihai i kitea, whai atu ana nga Amerikana me nga Ingirihi kia haere ia kia tuku atu tona tinana ki nga Tiamani kia kaua ai te whawhai, kia kaua ai te mate, ko te mahi tika me tatari kia kitea te tukunga iho, ina ka tino rangona tenei mahi nanakia e Ingarangi me Amerika i te rongo tonu tenei Kingi rangatira ki nga whakaakoranga o aua Pakeha he tino Karaitiana taua Kingi kahore ona hiahia kia heke huhua kore te toto o ana tangata, haere atu ana ia ki te Manuao o Tiamani e karangatia ana ko Te Arara (Adler). Rere ana taua manuao ki Kukitaone (Cooktown) rokohina ana to ratou manuao a Te Toroa (Albatross) eke ana ia ki taua kaipuke a kawea ana taua Kingi ki Oropi. E nui ana te miharo me te whakatakariri o nga Koroni mo tenei mahi, na teaha ra a Ingarangi te arai i