Nama 30
19000801

whārangi 1  (12 ngā whārangi)
2titiro ki te whārangi o muri


 
Te Pipiwharauroa, he Kupu Whakamarama, NAMA 30. GISBORNE. AKUHATA 19oo. TE PIPIWHARAUROA.

I runga i te ngakau kaha o te Komiti whakahaere o TE PIPIWHARAUROA kia piki haere ai te painga o te manu a te iwi Maori, na kua whakaurua e matou he whakaahua, te whakaahua o Rore Rapata me Tianara Piriti, a hei tera putanga ko to Rore Kitini me to Tianara Patene-Pawera, nga toa e hau mai nei nga rongo i Awherika. He nui te utu o enei whakaahua, he mea tono ra ano ki Merepana. Mehemea ana i penei te kaha o te iwi Maori ki te tautoko i a tatou nu-pepa me to matou manawanui, tera e tino kaha rawa o tatou reo ----- nga reo whakaako i te iwi Maori. Kaore o matou hiahia ki te whakaako i to matou iwi ki te kaiponu, ki te whakaaro tutua. Na reira matou ka mea ki te kore te tangata e utu i te pepa mai a ka whakamutua e matou te tuku atu, engari ka tukua atu ano he whakaatu, ara E rua putanga atu o te pepa he mea takai ki te awhi whero, hei muri atu whaka- mutua te tuku atu.

HE HUI NA TUHOE. Ki te Etita o TE PIPIWHARAUROA, E manu, kia ora koe ! Ma te Atua koe e tiaki, e whakakaha, kia kaha ai ki te kawe haere i nga rongo korero o te ao. Tenei kei te whakarongo reka te taringa me te ngakau ki te pai o nga kawenga a TE PIPIWHARAUROA e kawe haere nei ki nga marae o Hine whakaparekareka ai i te iti i te rahi. Tenei ka tukua atu etahi kupu ruarua nei mau e kawe atu kia kite oku hoa. I waimarie ahau ki te tae atu ki Rangitahi, wahi o Karatia. No te iwa o nga haora i te po ahau i tae atu ai. I whaia ahau e te po ki Ponana, i tae ahua tinga atu toku hoiho. I a au e haere ana i te po ka tae mai ki a au te wehi o te taipo. I a au e huri ana i tetahi koki o te rori ka kite ahau i tetahi koroua e tu ana i te taha o te rori. I a au e maharahara ana koia nei pea te taipo, kua karanga mai " Ko koe tena ;" mohio tonu atu ahau ko taku koroua tonu tenei ko Hamiora. No konei e hoa, kua kore au e whakapono ki tenei mea ki te taipo. No te waru o nga ra o Aperira i te Ratapu, i te 12 o nga haora, ka takoto te hakari. Ko nga kai o tenei hakari he tawa, he pihipihi, he tuna, he huahua kereru, he toroi kuku, he aruhe, me era atu kai a te Maori, haunga hoki a te pakeha kai he kaipukahu. Ko nga tangata i tae ki te kawanga o tenei whare 1500. I puta nga mahi ahuareka i tenei hui : te haka, te whakaturakau, me era atu mahi a te 'ori. Tutu ana te puehu. Ka tepi tana haere ! Kotahi te tamaiti tane i puta i tenei hui mo te haka me era atu mahi ngahau a te Maori, ko Paruru Tamaikoha. Ko te ingoa o tenei whare ko Tuwhare he ingoa tipuna. Na Tangiharu ko Tuwhare, na Tuwhare ko Kauae, ka puta mai ki te wahine nona tenei whare, ara kia Mereana Peraniko. Ko te roa o tenei whare e 36 putu, ko te wha- nui e 20 putu ; he papa nga taha, he haeana a runga. Heoi ano, na W. R. WHATANUI. Te Whaiti-nui-a-Toi.