Volume 0, No. 39
18850415

page 1  (12 pages)
2to next section


View the commentary of this paper

 

 

Te Korimako

 

He Nupepa whakaatu i nga tikanga o te Whakapono' nga Rongo o te Ao katoa, me era atu mea.

 

NAMA 39.] AKARANA, APERIRA 15, 1885. [TE UTU, 6D.

 

PANUI KI NGA KAI-TAUTOKO.

 

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te takunga atu ki te Poutapeta. Ko nga moni me tutu tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free Subscriptions are payable in advance.

 

PANUI KI NGA KAI TUHI MAI.

 

KO nga pukapuka katoa mo tenei nupepa me penei te tuhi mai ki TE KORIMAKO, Pouaka 270, Poutapeta, kei Akarana."

 

ALL communications to this paper are to be addressed to "TE KORIMAKO, Box 270, Post Office, Auckland."

 

PANUITANGA.

 

Ko nga panui katoa e ahu mai ana i nga Maori ma te Etita e whakaae e whakakahore ranei, a me tuku mai te moni me te panui, ko te utu, tekau hereni (10s.) mo te koramu kotahi. Ko nga korero katoa kahore e tika ana mo te tautoko i te nupepa mo nga korero ranei mo te awhina i te iwi Maori kia haere i nga huarahi o te tika ka utua ano ki taua utu ki te tekau hereni (10s.) mo te koramu.

 

PANUITANGA.

 

KUA tae tenei ki te toru a e haere ana ki te wha o nga tau e rere ana te manu nei ki o koutou marae e rui ana i ana purapura ki a koutou maara. He whakamarama tenei kia koutou mo te wha hereni (4s.) kua karangatia nei hei oranga mo ta tatou mokai. Ko nga tangata i tuku mai i ratou rua hereni (2s.) i mua atu i te 15 o Hanuere, 1885, ka haere tonu te nupepa kia ratou a tae noa ki nga marama kotahi tekau-ma-rua. Otira ko nga tangata e tuku mai ana ia ratou rua hereni (2s.) i muri i te 15 o Hanuere, 1885, kua rongo nei ano ratou i te whakanekehanga o te wha hereni (4s.), ka takua atu te nupepa mo nga marama e ono. A kia mohio koutou e nga tangata kahore e tae atu ana a koutou nupepa me tuhi mai kia mohio ai matou, a kia tukua atu ano tetahi.

 

Te Korimako

 

"Kei te Atua to tatou piringa."

 

APERIRA 15, 1885.

 

Ko te uira o te waea e ahu mai ana i tawahi, ko te whatitiri i me nga kapua hinaki-pouri e noho whakamarumaru ana irunga i nga rangi o nga tauiwi katoa o te ao. Ko te hohonu o te moana kei te kawe haere i nga taonga whawhai me era atu mea ki ia wahi, ki ia wahi o te ao hei whakangaro tangata. Ko te kainga i mate nei a Tianara Korano (General Gordon) kei te ngaua tonutia e te mataa raua ko te hoari, kei te whati haere te Poropiti Teka i te wehi ki nga ope hoia a te Kuini e haere atu ana ki tana whenua, me tona mataku ano ki tona iwi ake kua anga atu ki a ia irunga i te ara tinihanga, a tenei e rite tana Poropiti ki te kupu nei, " ko te tangata e hapai ana i tona hoari ka mate ano ki tana rakau." Ka mutu ta tatou matakitaki i tenei whenua i Houtana (Soudan), a ka ahu ano ta tatou titiro whakarunga ki tera pito o taua whenua-nui o Awherika, e rongo ano i nga parikarangaranga o te whawhai e rere haere ana ki nga wharua me nga maunga o tera whenua o Peke-huarana (Bechuanaland) me nga tini kainga e paatata ana ki reira, ko taua whenua no nga mangumangu, erangi e nohoia ana e nga heke Pakeha o Tiamani me Horana, a tenei ratou te tautohe mai ra mo taua whenua, ahea ranei mutu ai ! Mahue mai a Awherika ka anga atu o tatou kanohi whaka-te-pawhakarua ki Inia whakauta, tera he whenua e apohia ana e nga Ruhiana e karangatia ana ko Awhekanitana (Afghanistan). I tapoko rawa mai taua iwi ki nga rohe o tana whenua irunga i te nukarau me te tinihanga. E kii ana ratou (ina ka ui atu a Ingarangi) e noho ana ratou irunga i te rangimarie, otira kihai ratou i rongo ki te kupu atu a Ingarangi kia hoki atu ratou. Katahi ka waeatia atu e Ingarangi ki te Amia (Ameer) ara ki te Kingi o taua whenua kia mataara ia, a kua tukua e ia ana ope hoia e toru tekau mano (30,000) hei arai atu i nga Ruhiana, a e toru tekau kaipuketima i whakaritea e te Kawanatanga o Ingarangi hei kawe i ana hoia ki ia wahi, ki ia wahi o te ao e hiahiatia ai. Ko nga kiko-piiwhi (he mea mahi ki nga tiini) o te taone i Hikako (Chicago), i Amerika, i pau katoa te hoko, me nga kai aha noa o ia kainga, me Niu Tireni nei, kei te mahi nga tini tangata nei oranga mo nga ope ki te whawhai. Waihoki ko nga tini manuao kua tonoa e te Kawanatanga o Ingarangi kia rere ki ia wahi, ki ia wahi o te ao, ki nga wahapu o nga awa me nga moana kia mataara ki nga manuao a Ruhia