Volume 0, No. 71
18880120

page 1  (12 pages)
2to next section


View the commentary of this paper

 

Te Korimako

 

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

 

NAMA 71.]

AKARANA, HANUERE 20, 1888.

[TE UTU, 6D.

 

MATENGA TANGATA.

 

Kua riro a KATARINA WIREMU WEKA, tona iwi a Ngatipukenga, me te whanau a Apanui, te hoa wahine o Wiremu Weka. I mate ia ki Te Wainui, Whangaroa, i te 15 o Tihema, 1887. He nui rawa te pouri o tona iwi o Ngatirua raua ko Ngatitorehina.

 

PANUI KI NGA KAI-TAUTOKO.

 

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me tuku tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free. Subscriptions are payable in advance.

 

PANUI KI NGA KAI-TUHI MAI.

 

Ko nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

 

NOTICE TO CORRESPONDENTS.

 

ALL communications to this paper are to be addressed to "TE KORIMAKO, Box 270, Post Office, Auckland."

 

PANUITANGA.

 

KO nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whakaatu mai kia tukua atu ano tetahi.

 

PANUITANGA.

 

KO te mea tika rawa me whakarite e nga kaitautoko, he Pakeha e mohio ana koutou i o koutou takiwa, hei taunga atu mo a koutou nupepa. A me tuhi mai te ingoa o te Pakeha kia mohio ai matou hei tukunga atu mo te nupepa. Me korero ranei e koutou ki nga Poutapeta i o koutou takiwa, kaua a koutou nupepa e hoatu ki tetahi tangata. Ko nga reta me nga panui katoa e tukua ana mai kia taia ki TE KORIMAKO, kia marama te tuhituhi, kia pai te wehewehe o nga kupu. Me tuhituhi nga korero ki te taha kotahi o te pukapuka.

 

PANUITANGA.

 

HE whakamahara tenei ki nga hoa-tuhimai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka riro atu i a ia tetahi wahi o te moni. Erangi me tuku mai i te panekuini, i te nooti, i te tieki, i te monioata-waea ranei.

 

Te Korimako

 

"Kei te Atua to tatou piringa."

 

AKARANA, HANUERE 20, 1888.

 

Ko taua Ruanuku ara te tau 1887 kua poto ona ra, kua rere atu ia ki te ana i haere ai nga wairua o era tau kua ngaro nei i te akeaketanga whakamuri. Oho ana te ngakau ki nga puna o te aroha mo te atawhai o te Rungarawa kia tatou e ora nei, heke ana nga roimata mo era o tatou kua ngaro nei ki taua kaainga kahore he hokinga mai. He maha nga tumanakotanga kahore pea i ea ko aua whakaaro i tuputupu kau ki te hinengaro kihai i kitea nga hua i whakaaro ai tatou e taea ano e tatou te kohi i nga tini ra o taua tau. Ahakoa kua he pea te manawa kua pouri nga kanohi kua taimaha nga ringa kua mauiui te tinana, kua kaha kore nga waewae, kua takoto maaro atu pea te tinana i te ngaruru o te matenga. Ahakoa kua pa mai enei aitua ki a tatou katoa, kia kaua rawa tatou e whakamutu i to tatou whakawhirinaki ki a Ia e titiro tonu ana ki ona tamariki me titiro atu tatou ki tera taha o te pae kapua, ko reira ano tatou kite ai i te ra o nga mea tino pai e haere whiti mai ana i nga taupa me nga maunga i ahua kapo ai o tatou kanohi, ano ka whiti te ra, ka mama ake nga pikaunga, kua marama nga whakaaro, a ka tohe ano tatou kia whiwhi ai tatou i nga mea i whakaaro ai e riro mai i tera tau, kia manawa nui kia eke ano tatou i te huamo o nga ngaru o te tau hou nei, mei kore e u o tatou waka ki utu ki nga wahi o te whiwhinga ki nga wahi o te oranga me te raneatanga o nga tini hua e ora tahi ai, te wairua me te tinana. Kua timata ano enei mea i uru nei ki o tatou whakaaro, ina nga tini mahi whakahari kua kite nei tatou i enei toru ra kua mahue atu. Timata ana i te Manei o te tauhou nei; ara, o tenei Ruanuku te tau 1888 ko te koa mo tenei tau i tomo ki te nuinga o nga tini tangata i ia wahi i ia wahi. Ko te tangata hoiho i haere ki ona reihi me tona whakangaro