Volume 0, No. 72
18880218

page 1  (12 pages)
2to next section


View the commentary of this paper

 

Te Korimako

 

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

 

NAMA 72,]

AKARANA, PAPUERE 18, 1888.

[TE UTU, 6D.

 

PANUI KI NGA KAI-TAUTOKO.

 

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me tuku tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free. Subscriptions are payable in advance.

 

PANUI KI NGA KAI-TUHI MAI.

 

Ko nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

 

NOTICE TO CORRESPONDENTS.

 

ALL communications to this paper are to be addressed to "TE KORIMAKO, Box 270, Post Office, Auckland."

 

PANUITANGA.

 

KO nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whakaatu mai kia tukua atu ano tetahi.

 

PANUITANGA.

 

HE whakamahara tenei ki nga hoa-tuhimai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka riro atu i a ia tetahi wahi o te moni. Erangi me tuku mai i te panekuini, i te nooti, i te tieki, i te moni-oata-waea ranei.

 

PANUITANGA.

 

KO te mea tika rawa me whakarite e nga kaitautoko, he Pakeha e mohio ana koutou i o koutou takiwa, hei taunga atu mo a koutou nupepa. A me tuhi mai te ingoa o te Pakeha kia mohio ai matou hei tukunga atu mo te nupepa. Me korero ranei e koutou ki nga Poutapeta i o koutou takiwa, kaua a koutou nupepa e hoatu ki tetahi tangata. Ko nga reta me nga panui katoa e tukua ana mai kia taia ki TE KORIMAKO, kia marama te tuhituhi, kia pai te wehewehe o nga kupu. Me tuhituhi nga korero ki te taha kotahi o te pukapuka.

 

Te Korimako.

 

"Kei te Atua to tatou piringa."

 

AKARANA, PEPUERE 18, 1888.

 

HE whakataukii tenei na Horomona, "He pono ki te akina te waiu, ka puta mai te pata; ki te akina te ihu ka puta mai te toto, ki te akina ano te riri ka puta mai he whawhai."

 

I penei te timatanga o enei whaikorero notemea tena nga kapua o te pakanga te puranga ake te puranga ake i nga pae o ia iwi o ia iwi o Oropi. Ko taua tangata kaha rawa ko Ruhia tenei te ohooho nei, tenei te huaki nei, tenei te haehae nei, tenei te wenewene nei, tenei te tautohe nei, ki te mana ki te paenga whenua. Ko tenei mahi kua roa nei te kawenga ka pehea ranei te tukunga iho, "He koki whare ka kitea, ko nga koki o te ngakau ma wai e taatari. E hiahia ana a Ruhia kia riro atu i a ia taua whenua kua rangona nuitia ko Purukerea otira ko te iwi nona ake te whenua e kore e pai kia riro ta ratou whenua i te tangata ke, nareira pea, kua tukua mai e Ruhia ana ope mano tini, ki nga rohe o Ateria, me era atu o nga kaainga, e noho taupa ana ki nga rohe o taua whenua, e ai te whakaaro ki te riro taua whenua, tena ka tohea kia riro te ki o Oropi ara te huarahi kuiti o nga moana e karangatia ana ko Kanatananopera (ara Constantinople) e pa nui tenei he kaha rawa noa atu, ki te riro tenei ka tere noa atu nga kaipuke o Ruhia ki taua moana i rere haere ai a Paora i karangatia i taua wa ko Te moana nui, inaianei e puru ana o ratou Kaipuke i taua pa kaha, na e noho huhua kore ana i roto i te Moana Mangu me etahi atu moana me he roto whano atu whano atu ki roto i nga tuawhenua, ko tenei pa kei taua iwi e karangatia ana ko nga Taaka (Turks) i runga i ta ratou wehi kia Ruhia kua toro atu o ratou ringa kia Ingarangi hei awhina i a ratou, e wehi ana ratou ka haere tuara mai nga ope i te whenua whakauta o to ratou pa, ki te kore tenei ka haere mai ranei ratou ra te tuawhenua i tawahi tata o taua pa pena pea ka whaiwahi i runga i te tua whenua notemea ka ahei ano kia purepotia taua pa notemea he