Charles Wilson), te rangatira o te ope i haere atu hei tuara mo Korano. Anga tonu mai nga ngutu o te pu o tera i te pa ki nga hoia o te Kuini e haere atu ra ki te whakaora i a Tienara Korano ma, huri tonu mai tenei ki ana tima i te awa o te Naira (Nile). Nohoia mai ana nga pareparenga o te awa e te hoa riri i te whatinga mai, a, na nga rere o te awa i tere-papae ai nga tima, he tonu atu. Rokohanga iho, i reira tata atu ko tetahi motutere, ka rere ki reira te ope o te Ingarihi (English) tauwhanga mai ai i te tima. No te taenga atu o te tima ki te moutere ra, ka eke katoa, ka waiho atu nga mata-rere-puku o te hoa riri kia ho-haere ana i te kikorangi. Tenei ake pea te mohiotia ai nga mea i hinga, me nga mea i kohurutia e Te Mari i te horonga ai o Katouma (Khartoum).

[No muri i te perehitanga o enei korero ka tae mai he waea i Ihipa whakaatu ana no te 26 o Hanuere ka whakatuwheratia nga keeti o te pa o Katouma e etahi ano o nga hoia Ihipiana a Tienara Korano, ka tomo mai nga mano a te Mari, ka timata tonu ki te kohuru i nga hoa a Tienara Korano. No te putanga o te Tienara ki waho o tana whare, kohurutia tonutia ki reira No konei ka huri katoa te ope a te Mari ki te kohuru i nga tane, i nga wahine, me nga tamariki o te pa. Kahore i mohiotia e hia ranei i ora.]

Nga Waiata Puru Ripene.

KUA oti te perehi te pukapuka waiata rangi Pakeha a Hare :Reweti te utu kotahi hereni o te mea kotahi. E 80 o aue pukapuka ka riro i te whaea o Te No raua ko te pouaru. Ka riro era ki Roto Tarawera, ki Te Wairoa, ki nga iwi i whakapururipenetia e Te No. He iwi kaha hoki a Tuhourangi ki te waiata i nga Puru Ripene. Ka pai.

Tawhiao.

Ko te pai o Tawhiao ki te pupuru i tana Puru Ripene, nui atu. Puta ana te whakamoemiti o nga Pakeha rangatira, mo te kaha a Tawhiao ki te pupuri i tana tika. E ai te ki he peka titoki tenei hanga a te uri tangata.

Te rongo mo Te A kua hau,

Hihii ! Hahaa !

I tuia mai i Te Kawau,

Hihii! Hahaa !

Ko Tama Hori Kerei te Hoa

Ko Tawhiao ano te Hoa,

Hapahapainga ko Te A te haere nei.

Te Putu.

No te po o te 9 o Pepuere nei ka hui mana ki te Whare-tiata he po whakamutu i nga hamumu o Te Putu (Mr. Booth) mo te Puru Ripene ki te taone o Akarana. Ko nga maimai-aroha tena, ko nga poroporoaki tena, ko nga whakanui tena i te tangata te Atua hoki. Ko Te Raihi (Rev. Mr. Rice), te tiamana, he minita no te Hahi Papatihi. Ka pai ana korero, pakipaki ana te mano hei whakanui mona. Tetahi kai-tautoko i a Te Putu (Mr. Booth) i tu ki te korero, ko Te Monoro (Rev. Mr. Munro), he minita no te Hahi o Koterangi Kia mutu, ka pakipaki te mano; hei whakanui mo tera. Muri mai ka tu hei tautoko a Te Rira (Rev Mr. Reid), he minita no te Hahi Wetereana. Kia mutu nga whai-korero o tera ka pakipaki te mano hei whakanui mona Muringa iho, ka tu a Te Hira (Rev Mr. Hill), he minita no te Hahi o Ingarangi. Kia mutu ka pakipaki te mano. Ka karanga ake te tiamana i konei, kia whakanuia a Te Putu(Mr. Booth). Ka tu maua te whare katoa i konei, ko te umere, ko te huroo, ko te karawhiuwhiu i nga aikiha, i nga pukapuka, mawewe kau ana te hanga nei a te aikiha, me he tu-ngarahu ta maua mahi. Kia mutu nga whakautu a Te Putu (Mr. Booth) ka whakanui ano maua. Te hiku rawa, ko te inoi, ko te whakapai ki te Atua.

Te Paranihi.

E KI ana te nupepa Pakeha i haere a Te Kooti ma ki Kihikihi ki te powhiri i a Te Paranihi, te Minita mo te taha Maori. Nga taonga i horahia atu ki a Te Paranihi e Te Kooti he Ihupuni he patu-paraoa. I whakahokia e te Minita nga mihi, me nga taki, i puta te kupu whakawhetai mo nga taonga hora. Puta ana te kupu whakanui o te tokomaha ki a Te Paranihi mo te pai o ana hamumu ki nga hui Maori i Kihikihi.

Meiha Te Wheoro.

No te 3 o nga ra o Pepuere ka tae a Meiha Te Wheoro ki Te Ia, e ahu atu ana ki Waikato I korero raua ko Hare Reweti i reira, ki atu ana e Te Wheoro na te matao, na te kohu, na te purorohu i pana mai i Ingarangi; ko te hiku o ta raua korero ko Tawhiao, i waihotia ki a Rori Tapere, ki a Te Kohi. ki te runanga rangatira katoa. Tenei ake te ata rongo ai a Aotearoa i te tukunga iho o ta Tawhiao ma haere ki Ingarangi.

Hori Ropiha.

KEI te mahi haere a Hori Ropiha i te mahi Puru Ripene. I tona hokinga mai i Ingarangi ka timata tana mahi, a, e mahi nei ano. No te 9 o nga ra o Pepuere ka u mai ki Akarana, i tona kainga i Waipaoa. Ki ana mai ia i tana nohoanga ki te hui nui a Te Putu i roto i te Whare-tiata, ko nga tangata o Wairarapa i tuhituhi i runga i te Ture Puru Ripene, e 900 tangata. No Manawatu ko nga tangata i tuhituhi, e 800 tangata. No tetahi taha o Heretaunga, e 500 tangata i tuhituhi. E ki ana hoki a Hori kei te 24 o te marama nei ka haere ia ki Turanga whakahuihui ai i nga iwi kia whakaaetia te Puru Ripene. Ko te tino putake ia o tenei mahi, ko te Whakapono. Kia kaha, kia maia, kia toa.