No. 65
190307

page 1  (12 pages)
2to next section


 
Te Pipiwharauroa,

he kupu Whakamarama.

NAMA 65.

GISBORNE.

HURAE 1903.

HE WHAKATUPATO.

[KO TE PUKAPUKA TENEI A TE TIATENE I TUHITUHI AI KI TE HUI A WERETA I TU KI PAKIRIKIRI.]

KUA puta te whakaaro i a au i runga i te inoi kia whai kupu ahau ki a koutou katoa i runga i te aroha, i a koutou kua huihui mai nei ki tenei wahi. I puta ai tenei whaka- aro i a au he pera ano me te nuinga o koutou hoa Maori hoa pakeha e whakaaro nei i te pai mo koutou, ara he tino mohio noku kaore tenei mahi i ahu mai i te Atua e kore hoki e puta mai he painga ki te Iwi Maori. Ehara tenei tu mahi i te mea hou—kua maha nga mahi penei kua puta ki tenei whenua ki era atu whenua o te ao. No nga ra ano i a te Karaiti enei mahi a mohoa noa nei; ko enei nga mahi i whakatupato ra a te Karaiti i mea ai, " He tokomaha hoki e haere mai i runga i toku ingoa, e mea,' Ko te Karaiti ahau,' a he toko- maha e mamingatia "E whakatika hoki nga Karaiti teka me nga poropiti teka, a ka hoatu e ratou nga tohu nunui, me nga mea whaka- miharo; a mehemea e taea, ka mamingatia ano hoki te hunga whiriwhiri."

He nui toku pouri mo te nui rawa o nga rangatira Maori e tautoko nei i tenei mahi, he hokinga whakamuri tenei ki te ahua o mua ehara i te haerenga whakamua. No taku taenga mai ano ki Niu Tireni i nui ai toku whakaaro ki te iwi Maori, e hari ana hoki toku ngakau ina kite anau e haere whakamua ana ratou, otira hei taku kitenga i tenei mahi he tohu iwi no te hoki whakamuri ka nui toku awangawanga mo te Iwi Maori a nga ia e tu

mai nei.

Me whakaatu e au nga take i whakahe ai au ki te take o ta koutou nuihuinga.

1. No te mea e pama ana tenei mahi ki te ingoa whakapono. Kaua rawa te Iwi Maori e tautoko i tetahi tikanga hou o te karakia, kei tino kaha rawa to koutou noho wehewehe. Ko te mea hei whainga ma te Iwi Maori ehara i te mea he tikanga hou mo te karakia, engari he tautoko tonu he whaka- kaha i te tikanga tawhito ara i te Rongo Pai e hou tonu nei i nga ra katoa. Ko te mea nui e matea ana e te tangata ehara i te mea he mahi hou engari ko te tupu o te tika, ko te piki o te tapu, ara ko te Karaiti tonu, ko te nui o te nohoma o te ngakau e te Wairua Tapu. Kei roto katoa enei mea i te Rongo Pai tawhito. Kaore ano kia tino kitea e au tetahi tohu he tangata tapu a Wereta, a e kauwhau ana ia pera me Hoani kai •Iriiri i kauwhau ki te tangata ki a ripeneta. Ki te kore te tangata e mea ki te tohe kia whakarerea e te tangata te hara kia huri ki te Atua, ehara taua tangata i te mea whakahau na te Atua hei kaiwhaka- ako. E rite ana hoki te mahi whakahua noa a Wereta i te Ingoa o te Tokotoru Tapu, ki te takaro ki nga mea tapu, ano he rite ki te tangata e whakahua nei i nga ingoa o ona atua maori.

2. No te mea kei te whakananua nga whakaaro maori ki nga kupu tapu. He tika- nga na nga tangata o mua, na nga tangata i whakatu karakia hou te whakamanu i te pono ki te tinihanga, a i te wwhakarongotanga o te tangata ka kumea e nga kupu i whakaritea nei ki te pono, e nga kupu'whakamanawareka, otira i te mea i whakananua ki te tinihanga horomia ana ano e ratou nga korero teka. He penei te ahua o te karakia Hauhau. Ko te hunga i tahuri ki te hauhau kaore i mohio ki te whakapono Karaitiana, nui ke atu to ratou whakawhirinaki ki a ratou ano i whakaaro ai i to ratou whakawhirinaki ki ta te Atua i pai ai. Ki taku whakaaro he penei te tikanga o