Volume 0, No. 38
18850316

page 1  (12 pages)
2to next section


View the commentary of this paper

 

TE KORIMAKO

 

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

 

NAMA 38.] AKARANA, MAEHE 16, 1885. [TE UTU, 6D.

 

PANUI KI NGA KAI-TAUTOKO.

 

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me toku tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free. Subscriptions are payable in advance.

 

PANUI KI NGA KAI-TUHI MAI.

 

Ko nga pokapuka katoa mo tenei nupepa me penei te tuhi mai ki "TE KORIMAKO , Pouaka 270, Poutapeta, kei Akarana."

 

ALL communications to this paper are to be addressed to " TE KORIMAKO, Box 270, Post Office, Auckland."

 

PANUITANGA.

 

Ko nga panui katoa e ahu mai ana i nga Maori ma te Etita e whakaae e whakakahore ranei, a me tuku mai te moni me te panui, ko te utu, tekau hereni (10s.) mo te koramu kotahi. Ko nga korero katoa kahore e tika ana mo te tautoko i te nupepa mo nga korero ranei mo te awhina i te iwi Maori kia haere i nga huarahi o te tika ka utua ano ki taua utu ki te tekau hereni (10s.) mo te koramu.

 

PANUITANGA.

 

KUA tae tenei ki te toru a e haere ana ki te wha o nga tau e rere ana te manu nei ki o koutou marae e rui ana i ana purapura ki a koutou maara. He whakamarama tenei kia koutou mo te wha hereni (4s.) kua karangatia nei hei oranga mo ta tatou mokai.

 

Ko nga tangata i toku mai i a ratou rua hereni (2s.) i mua atu i te 15 o Hanuere, 1885, ka haere tonu te nupepa kia ratou a tae noa ki nga marama kotahi tekau-ma-rua. Otira ko nga tangata e taku mai ana ia ratou rua hereni (2s.) i muri i te 15 o Hanuere, 1885, kua rongo nei ano ratou i te whakanekehanga o te wha hereni (4s.), ka tukua atu te nupepa mo nga marama e ono. A kia mohio koutou e nga tangata kahore e tae atu ana a koutou nupepa me tuhi mai kia mohio ai matou, a kia tukua atu ano tetahi.

 

TE KORIMAKO.

 

"Kei te Atua to tatou piringa."

 

MAEHE 16, 1885.

 

Ko nga rongo nui o te marama kua pahure nei, e taumaha ana i nga mea e mumura ai e pawera ai te ngakau o nga puwhakaaro o te ao nei, mo nga rongo e ahu mai ana i Ihipa mo te horonga o te pa o Katouma me te matenga o Tianara Korano, te tangata a te Kuini e noho ana i roto i taua na. Ko tenei tangata, ko Tianara Korano, e titiro whakamoemiti ana te ao ki ana mahi i mahi ai ia, notemea he tino tangata whakapono ki te Atua, horerawa ia e awangawanga, tika tonu atu irunga i te huarahi piri tonu ki tona Atua na reira i kore ai ia e wehi ki te mate. Ko tona hoari me tona pu he kareao iti hei tohutohu kau i ana hoia ki te huarahi o te pakanga e hiahiatia ai e ia kia whawhai. Ia ia e whakahaere ana i nga hoia i Haina he mano tini nga pauna moni i tukua e nga Hainamana mana, a ko aua mano pauna kahore i waihotia e ia hei rangatiratanga mona, engari he mea hoatu e ia aua moni ki ana hoia i haere ai i tu tahi ai i roto o nga pakanga i waenganui i te matotoru o te riri. Ko nga tino take i haere ai tenei tangata ki te whawhai, mo te kino e tupu haere ana i nga wahi i haere ai ia, ki te motumotu i nga taura e herea ana nga tini tangata, ki te wewete i nga mekameka o nga whakarau, mo tona hiahia kia puta ai te Rongo Pai ki nga tangata ki nga tauiwi katoa o te ao. Tetahi o nga rongo nui e kitea ana ki roto i nga nupepa, ko Ruhia e tohe ana ki tera whenua nui ki Inia kia riro ia. E toru tekau mano hoia kua tukua e te Kawanatanga o Ruhia ki nga rohe o Inia, a kua tae te kupu a Ingarangi kia Ruhia kaua hei tapepa mai ona waewae ki roto ki nga rohe o Inia kei ara he pakanga nui kia rana, ko te whakahoki mai tenei a Ruhia, e noho ana ratou (nga Ruhiana) i runga i te atarangi o te hohou rongo (kowai ka tohu). Ko te Kawana ara ko te komihana a Ingarangi e noho ana i aua whenua kua kii atu ki nga Awhekana (Afghans) ara ki te iwi o taua whenua me whawhai ratou ki nga Ruhiana mehemea ki te tohe tonu ratou ki te haere mai. A mehemea ki te kore e rongo a Ruhia penei kua ara te kauae o te pakanga ia Ingarangi.

 

Ko nga eka kua riro i te Kuini i roto i te porowini o Akarana, e rua miriona e ono rau mano eka.

 

Kua tukua atu e Wahanui te kupu ki te Minita Maori i Poneke, kua pai nga Maori kia timataria te kari i te rori o te reriwe.