Volume 1, No. 6
19311201

page 65  (20 pages)
66to next section


 
Te Toa Takitini

Ehara taku tau i te toa takitahi engari he toa takitini taku toa. —Tuhoto Ariki. Registered at the G. P. O, as a Newspaper. Nama 6. HASTINGS. Tihema 1st, 1931. HE MIHI-TAURANGI. (Na Nga Etita)

E rau rangatira ma, tena ra koutou nga morehu o nga waka i whiua ki te akau-roa o Papa-tuanuku te ahuatanga o a tatou i tumanako ai, o a tatou i aroha ai, nga hoa i whawha tahi ai, i rapurapu tahi i nga tikanga o nga ra ka hori ki muri kua riro atu nei ratou ki Ranginui.

He mihi-taurangi te mihi ki a koe ra ! E tia i a roto nei he wai kei aku kamo! Te kare-a-roto ra e kai-whiria nei- He tira haere roa he maiao-kura-iti ra! (Ma koutou e whakaoti atu. )

Ahakoa te taumaha o nga homaitanga a te wa, me mihi- mihi tonu kia tatou. E rite ana te kawenga kei runga i te ao e uhi ana ki Tai a Ruatapu i korerotia ra e o tatou tupuna. Haruru ana tera i te Akau-roa o te ao! Enei homaitanga, tupono tonu ki nga ra kua whanau mai TE PIHOPA MAORI hei whakaungutu i Te Wairua Maori ki TE KAI HANGA Kororia ki TE RUNGA RAWA! Ka tika ranei kia whaka- ritia i roto i enei wa tata ano TE PIHOPA O AOTEAROA ki taua whetu na ana ra i arahi haere te hunga i rapu ra i te waahi e Whanau ai TE TAMA A TE MATUA? Kororia ki TE RUNGA RAWA! Ko taua whetu i Te Rawhiti! Huri atu. huri mai nga kanohi o Te Iwi Maori, e whai e mihi, e whai i nga hihi o TENEI WHETU, i tona maramatanga hoki, hei taanga manawa mo te hinengaro, mo nga Mihi-taurangi ina tata nei Te Ao Karaitiana, ahakoa, nga tangi ki te Tau Tawhito, te Whare Taua, i maringi ai te roimata, i haea ai te manawa, i ta ai te toto kare-a-roto, o te hinegaro, Me mihi mihi ano ra—MERI KIRIHIMETE! HAPI NU IA Kororia ki TE RUNGA RAWA!