No. 105
19300601

page 2069  (24 pages)
2070to next section


 
TE TOA TAKITINI Registered at the G. P. O, as a Newspaper. Nama 105 HASTINGS Hune 1. 1930 ATIRIKONATANGA O TAURANGA PARIHA O RUATOKI

No te ahiahi o te Wenerei te 21 onga ra o Mei. ka tae mai te Pihopa o Aotearoa, me Kenana W. G. Williams B. A. o Wanganui, kia Tuhoe i Ruatoki. No taua ahiahi ano. ka eke mai hoki nga minita, nga kai-karakia, me nga mangai-reimana, o ia wahi, o ia wahi o te Atirikonatanga.

MIHANA WHAKAOHOOHO No te po i te 7 onga haora, ka timata nga mahi o te Mi- hana whakaohooho. Na te Pihopa o Aotearoa i whakatakoto nga kaupapa o nga kauhau, o nga kupu tohutohu, me nga kupu nunui, hei whakaoho i te hinengaro. Ko Kenana Wiremu te hoa o te Pihopa nana i whera- whera nga whakaakoranga hohonu o nga kupu karaipiture. Henui nga purapura o te kupu, i ruia ki tenei o nga mara a te Ariki, i roto i tenei mihana. Henui nga mea pai o tenei mihana i kitea, i runga i te taha tinana me te taha whaka-te- wairua. He mea nui te mihana, hei whakaoho i te ngakau moe. hei whakaaraara i te tinana e ruhi ana. e ngoikore ana. Hei whakapuare i nga manawa o te hunga e hihiko ana ki te rapu pono i te huarahi o te maramatanga pono. Hei tuho- nohono i nga mahara huhua o roto i te ngakau, hei tauhere i nga mahara motumotu, o nga kokonga maha o te ngakau kua wareware ki te whai haere i nga mea e whiwhi ai i nga painga a te Atua.