Volume 1, No. 7
18980524

page 2  (6 pages)
to previous section1
3to next section


View the commentary of this paper

 
TE PUKE KI HIKURANGI. Mei 4 1898, Ki te Etita O "Te Puke Ki Hikurangi" Tena Koe, Tenei kua kite iho i nga kupu o te Hui i tu ki te Waipatu, me te Pire a te Pirimia, ki taku titiro iho ki te kupu o te Hui, e penei ana, ko te tino hiahia o te Iwi Maori, kia tino Rahuitia nga toenga Whenua Maori i naianei, mo ake tonu atu, ara, ko toona tikanga e penei ana, kia kaua e tukua atu ki etahi huarahi ke, engari, ma te Maori ano e mahi te Whenua e puta ake ai ne oranga mona, mehemea ra he penei te whakaaro i oti i te Hui, ka tika taua kupu, na, mehemea ko te ingoa Rahui anake, engari me puare ano ki nga tikanga e whakaaturia, nei i roto i te Pire, kaua tatau e ki he Rahui, engari he tuku i aua toenga Whenua ki roto i etahi ropu, e huaina nei he Poari, ma ratau e whakahaere mo ake tonu atu. Na, e te Iwi, kia marama te titiro, na ko wau e penei ana toku whakaaro, mehemea e hiahia ana te Kawanatanga kia noho roa te Iwi Maori mo nga Whakatipuranga maha e haere mai nei, ko te mea tika, me Rahui nga toenga Whenua Maori, mo ake tonu atu. Ko Tuhoe he Whenua nui rawa tona, kua Rahuitia hei Whenua tuturu mona, na me nui atu he tikanga pera mo nga Iwi nunui, maha atu hoki, o te Motu katoa nei, kaore e ora te Maori i te Moni, engari ka piki ake te mate, ka whai take hoki e tango nama ai. Kaati nga kupu, ka hoha te kai titiro. Na to hoa, Na, Paratene Ngata. Hotereni Hauraki.