Pukapuka 0, Nama 73
18880316

whārangi 1  (12 ngā whārangi)
2titiro ki te whārangi o muri


Tirohia ngā kupu whakataki o tēnei niupepa

 

Te Korimako

 

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

 

NAMA 73.]

AKARANA, MAEHE 16, 1888.

[TE UTU, 6D.

 

PANUI KI NGA KAI-TAUTOKO.

 

KO te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me tuku tuatahi mai.

 

NOTICE TO SUBSCRIBERS.

 

THE price of TE KORIMAKO is four shillings (4s.) per annum, post free. Subscriptions are payable in advance.

 

PANUI KI NGA KAI-TUHI MAI.

 

KO nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

 

NOTICE TO CORRESPONDENTS.

 

ALL communications to this paper are to be addressed to "TE KORIMAKO, Box 270, Post Office, Auckland."

 

PANUITANGA.

 

KO nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whakaatu mai kia tukua atu ano tetahi.

 

PANUITANGA.

 

HE whakamahara tenei ki nga hoa-tuhimai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka riro atu i a ia tetahi wahi o te moni. Erangi me tuku mai i te panekuini, i te nooti, i te tieki, i te moni-oata-waea ranei.

 

PANUITANGA.

 

KO te mea tika rawa me whakarite e nga kaitautoko, he Pakeha e mohio ana koutou i o koutou takiwa, hei taunga atu mo a koutou nupepa. A me tuhi mai te ingoa o te Pakeha kia mohio ai matou hei tukunga atu mo te nupepa. Me korero ranei e koutou ki nga Poutapeta i o koutou takiwa, kaua a koutou nupepa e hoatu ki tetahi tangata. Ko nga reta me nga panui katoa e tukua ana mai kia taia ki TE KORIMAKO, kia marama te tuhituhi, kia pai te wehewehe o nga kupu. Me tuhituhi nga korero ki te taha kotahi o te pukapuka.

 

Te Korimako

 

"Kei te Atua to tatou piringa."

 

AKARANA, MAEHE 16, 1888.

 

KEI hoha koutou ki nga whakataukii a Horomona he tino ruanuku ia o te mohiotanga, he tino tohunga ia mo nga matauranga katoa o te ao ahakoa no nga wa tuarangi tenei tangata keihea koia te mea i hapa i a ia te whakahaere, ahakoa he whawhai, he rongomau, he hanga pa, he mahi paamu, koura, hiriwa, ahanoa, ahanoa, tera taua tangata te whakapuare i ana whakaaro me he awa e rere tonu ana i te au i te ia o te hinengaro, tau marire ana aana whakaaro katoa ki tenei whakapaparanga ki tera whakatupuranga, a horerawa te ha o ana kii e mutu, reka tonu ana ki nga tangata e aru haere ana i te matauranga. Kua oti te whakapapa i etahi whaikorero mo te ao nei, me nga tangata e pa ana ki te runanga o nga whenua i runga i tenei tuunga korero o taua ruanuku inana! e ai tana " He aroha ki te kino to te tangata e aroha ana i te ngangare; te tangata e whakaneke ake ana i tona kuwaha e rapu ana i te whakangaromanga."

 

Kua kite ano koutou i te mahi tohe tonu a te Ha, te Emepara o Ruhia, mo nga tau e hia ranei kua mahue nei, tenei ia te hiahia ki te whenua, a ka anga atu ona kanohi apo ki tera wahi ki tenei kaainga ki tera kaainga. Kua roa tona tohenga kia riro i a ia te mana me te Kawanatanga o Purukearia. Ko te iwi nona te whenua, e kore e pai kia pononga ratou kia Ruhia. Waihoki kahore nga iwi o Oropi e whakaae kia riro taua whenua mana e whakataki i te Kawanatanga, notemea i pakeke nga iwi ki ana whakaaro, ka mahi whakatenetene taua taniwha, e hiahia ana ia kia horongia nga ika nonohi e rere haere ana i te aroaro o tona waha nareira i whakaemi e ia ona mano tini ope hoia ki nga rohe katoa o nga whenua e ungutu ana ki tona, nakonei ka tu mataara nga iwi katoa hei awhina tetahi i tetahi kia tika ai to ratou kakaro i nga rakau katoa o ia ahua o ia akua e mauria mai ana e Ruhia ki nga wahi e patata ana ki nga tangata e noho mataara e noho tupato ana ki taua ika nui.