Nama 15
18990501

whārangi 3  (8 ngā whārangi)
titiro ki te whārangi o mua2
4titiro ki te whārangi o muri


 
HE KUPU WHAKAMARAMA. Te mutunga o tona korero ka hinga ia ki raro, hemo tonu atu. Kotahi wiki i muri mai, ka haere te kauwhau a te minita o taua whare karakia i runga i nga kupu a taua tangata, " Koi ana ranei te aru i a Ihu ?" I mea ia ki tona whakaaro, kaore ta ratou haere i rite ki ta Te Karaiti. I te mutunga o te Karakia, ka huihui etahi o nga tangata o taua whare karakia, a oati ana ratou kia mahi tonu ratou i ta ratou e mohio iho ai e pai ana a te Karaiti kia mei- nga e ratou. I oati ratou mo te tau kotahi. Ko ta ratou patai tenei, "Ka pehea ra a Ihu?" Kihai i roa kua kitea e ratou he nui nga mea me whakarere e ratou, mehe- mea e hiahia ana ratou ki ta Ihu i pai ai. I ui te minita ki a ia ano " Ka pehea ra a Ihu, mehemea ana koia te minita o taku whare-karakia ?" Na kitea ana e taua tangata e kore a Ihu e kauwhau i etahi ona kauwhau. Ko te nuinga ona kauwhau hei whakarekareka noa iho i te taringa o nga kai whakarongo, hei mea e whakamihi ai te tangata ki a ia, e korero ai mo te rawe o tona kauwhau. I muri mai ka rereke tona kauwhau, ka kauwhau mo te hara mo te ripeneta mo te tapu ara pera me tana i whakaaro ai ka kauwhautia e Ihu. Ka kaha tona mahi i tona pariha, kaore e mangere, e whakahihi, engari ka haere ki te wahi tino kino o te taone ki reira tohe ai ki te hunga haurangi. Ko te Etita o te nu- pepa i whakamutu te ta i nga mea kino ki tona nupepa. I ui ano ia kia ia ' Ka pehea ra a Ihu, mehemea ana koia te Etita o taku nupepa ?" I kitea e ia e kore a Ihu e whakapoke i nga wharangi o te nupepa ki nga mea kahore nei he painga. Tera atu te nuinga o nga tangata i ui i tenei patai ki a ratou ano " Ka pehea ra a Ihu, mehemea ra ana he penei Tana mahi me taku ?" I whakama ratou mo te nuinga o nga mea e mahia ana e ratou. E nga hoa, he mea pai ano tenei ara te ui i tenei patai ki a tatou ano, " Ka pehea ra a Ihu." Ma tenei ka mohiotia ai e tatou te tikanga o to tatou whakapono, te henga ranei. Me ui te minita, " Ka penei ranei a Ihu, mehemea ana ko Ia, te minita o tenei pariha?" Me ui te rangatira, "Ka penei ranei a Ihu me ahau, Tana whakahaere i te iwi, Tana whakatu i te tauira ki toku iwi, mehemea ana ko Ia te rangatira o tenei iwi ?" Me ui te mema o te Paremete, "Ka penei ranei a Ihu, mehemea ana ko Ia i toku turanga i te Paremete?" Me ui te tangata mahi whenua, mahi paamu, mahi toa, me era atu tini mahi " Ka penei ranei a Ihu, mehemea ana ko Ia ahau ?" Me ui nga tangata i roto i nga whare-kooti, i roto i nga whare-whakawa, " Ka penei ranei nga korero a Te Karaiti mehemea ana ko Ia •ahau?" E te hoa mehemea ana ko Te Karaiti koe, ka pehea Ia ? Ka takahi ranei i te Ratapu, ka haere ranei ki nga reihi, hoiho, ki nga kanikani, ki te purei-kaari ki nga ahuareka hua-kore a te kikokiko ? Ko tenei patai te ruri e mohiotia ai te tika te piko ranei o to tatou whakapono. Mehe- mea kei te tapahia a tatou mahi e tenei patai, kia toa, whakarerea atu taua mahi, ma te Atua e homai he mea pai atu kia koe, i tenei ao, a tae atu ki tera ao. " Ki te he ano hoki koe i tou ringa matau, poutoa, maka atu ; he nui ke hoki te pai ki a koe rite mate tetahi wahi ou, a ka kore e inaka tou tinana katoa ki roto ki te reinga." NGA WHAKATAUKI O NEHE A TE MAORI. 1. " Takee Raumati, Whakapiri Ngahuru.'' Ko te tikanga o tenei whakatauki, hei te Raumati kaore e piri mai te tangata mangere ki te taha o te tangata mahi . kai. Hai te Ngahuru, hai te takiwa whai kai, kua piri mai te mangere. 2. " Hohonu Kaki, Papaku Uaua." Hai te kai ka hohonu te kaki, hai te mahi kai kaore e kaha nga uaua. 3. " E hara ta te tangata kai he kai ti- tongi kaki, kaore ki tana kai, tino kai, tino makona." Mo te kai i te kai a te tangata kaore e tino kaha te kai; tena ki tana ake kai makona ana te kaki. 4. " He kai kowhai, hurihia ketia." Mo te kai itiiti ka kite i te ope, ka hurihia atu ko te tuara ki te ope haere. 5. " He ihu kuri he tangata haere.'' Mo te tangata haere, ka tae ki etahi kainga tauhou, ahakoa kaore e karanga- tia ki te kainga, ka peka noa atu. 6. " Eia whakaoho koe i taku moe, ko te whatu turei a rua.'' Mo te Hinau. E moe ana tetahi o nga Koroua nei. Ka whakaoho tetahi ki te kai huahua. Katahi ka oho ake. I mahara he Hinau te kai e whakaohotia ra ia e tana hoa. No te kitenga he huahua, Katahi ka whakatauki. 7. " He karanga kai, kaore e karangatia a Paeko. He karanga riri, ka karangatia a Paeko."