Nama 18
18990801

whārangi 2  (10 ngā whārangi)
titiro ki te whārangi o mua1
3titiro ki te whārangi o muri


 
Te Pipiwharauroa, He Kupu Whakamarama. Nama 18.GISBORNE. Akuhata 1899. HE POHIRI. " Haere mai ra e te Pipiwharauroa, haere mai me tou take ! Naumai ki tenei marae hou, hei atawhaitanga, hei mau kinotanga ma te tangata. " E te iwi he pohiri atu tenei i te manu ohooho nei, no te mea ko Turanga he tauranga mona inaianei. Kua tukua mai ta tatou pepa ki Te Raukahikatea nei ta ai. He nui rawa atu to matou koa, me to matou whakawhetai kia Rev. Hapata Wiremu mo tana whakaaetanga mana e ta ta tatou pepa ki tana perehi. Ka tino pai rawa atu te taanga inaianei, ka mutu hoki te hehe i te pakeha. Ta matou tumanako inaianei ko ta tatou tao- nga kia tipu, kia nui haere. Ko te mea hoki e tetere ai, e kaha ai ta tatou manu ki te rere haere, ma te kaha tonu o te iwi ki te whangai. I tenei tau he mea mahi tuara noa iho ta tatou pepa. I te aha? I te nui o te raruraru ki nga etita. Ehara tenei i ta matou mahi tu- turu, tera ke atu ano a matou mahi; ko tenei he mea whakamomori. Kaua koutou e riri mai i te korenga e rite o te pepa ki ta koutou i hiahia ai; whakaarohia o matou taumahata- nga. E tumanako ana "ano matou kia maha nga wharangi, kia rua hoki nga putanga i te marama; kia eke katoa nga korero mo te wa- irua, mo te tinana, mo te hinengaro, tae noa ki te whenua. E kore e taea kite kore kou- tou e hihiko mai ki te awhina. Kei pohehe koutou ina homai i a koutou hereni, e homai ana hei painga mo matou, kahore, engari mo koutou ano, ara hei utu i ta koutou pepa. Kore rawa tetahi pene kotahi e puta mai ana ki nga etita, heoi ano kia matou ko te mauiui, ko te hoha, ko te taunutia e te tangata. Otira e te iwi e kaha ana ta koutou manaaki i a Te Pipi. Kua whakamotuhaketia e matou he tangata hei ta i tatou pepa, a kua whaka- ritea he oranga mona. Na tenei kia mohio mai koutou e utu ana matou mona, mo te pe- rehi, mo nga pepa, mo nga pane kuini. Kei pohehe koutou i te mea kua tae mai nei ki te pua Kahikatea e nui ana te kakano, kahore, ko te Raukahikatea anake ehara i te huakahik- atea. Kia matau. I roa ai te putanga o tenei nama na te hikita- nga mai i Whakatu ki konei. Hei muri atu i tenei ka rite tonu te puta. Kaati nga kupu. Tena koutou e te iwi. Whakaarohia te wai- rua, te tinana, te hinengaro, me te whenua. ETAHI TAMARIKI MAORI. ( He apiti mo te Nama 12. ) Ko etahi tamariki o Te Aute kei te karaka i roto i nga tari pakeha, ko Walter Grainey i te toa rino o Tati i Poneke, ko Lionel Williams iramutu o Timi Kara, i te Whare-whakawa i Turanga; ko Tiwana Turi, i te tari roia i Tu- ranga. Ko Erueti Rangiuia he kai whakaako ki te waiata me te whakatangitangi piana i te taone o Kihipane. Ko Rawiri Tione he he- ramana kei runga i a te S; S. Kapu. E mea ana ia ki te ako mo te turanga o te mete. Ko Tame Erihana o Poneke te Maori tuatahi ki te tu hei roia. Ko James he tino teera kei te- tahi toa nui i Panera. Ko Retimana Porau- mati no Te Arawa he karaka no te Hupirimi Kooti i Akarana. Ko Hone Heke anake, ki taku whakaaro, te taitamariki Maori kua uru ki te Paremete. I Tipene ia e kura ana i tona itinga. Ki taku titiro no Tipene te nuinga o nga tamariki kua whiwhi ki nga mahi ringa a te pakeha, no Te Aute ki nga mahi nunui. Engari.kia whakaaro tatou ko etahi tamariki o Tipene i whakatutukiria to ratou kuranga ki Te Aute. Taihoa ra pea ko tetahi apiti ano. Kei te piki te matauranga o te Maori, apopo te kitea ai. Ka hoki ake ano taku kupu ki aku hoa kaore nei nga ingoa i tuhia. Ehara i te whakaha- wea i kore ai engari na te waka pakupaku. Ahakoa kaore a koutou mahi pai e kitea e te tangata, engari ra kei te kitea e to tatou Ma- tua i te rangi ; Mana tatou e atawhai e wha- kakaha.