Nama 27
19000501

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
HE KUPU WHAKAMARAMA. TE MIHINI TUKU KORERO

Kua whakaaturia ano e matou etahi o nga mahi a te mihini tuku korero, ahakoa kaore kau he waea. Ko te mea tino whakamiharo atu tenei o enei ra. Tenei ano etahi o nga raweke maha a tenei mihini, engari me wha- kaatu i te tuatahi te take i rere noa ai te korero i te takiwa e kore e taea te tino whakamara- ma, heoi ra ko te ahuatanga.

Te haerenga o te korero. Ki te pangaia te kohatu ki waenganui o te roto iti, ka pokare- kare te wai ; ko nga pokarekare ka taiawhio i te wahi i toremi ai te kohatu ; i te tuatahi he ririki nga pokarekare, ka roa ka rarahi, nawai a ka pa ki te whenua i nga taha o te roto. Na he penei ano te haerenga o te korero i te takiwa. Kei roto i te mihini te hiko ara te electricity ; kei roto ano tenei mea i nga mihini tarekaraawhe, tarewhone. Ko te roto kua korerotia i runga ake nei e rite ana ki te takiwa noa iho ko te wai e rite ana ki te ea. Ka korero te tangata ki roto ki te mihini ka whakapokarekaretia te ea e te hiko i roto i te mihini ; ka haere nga pokarekare o te ea, a te paanga atu ki te mihini e puritia ana e tetahi atu tangata, ka panapanaia, ka rite tonu te panapana ki te korero i tukua mai na, ko te maunga o te korero te tuhituhi !

E 66 maero ki te moana. Te ingoa o te tangata nana i hanga tenei mihini ko Makoni ( Marconi). I te reihitanga o te ' Shamrock ' te iata o Ingarangi, me te ' Columbia ' te iata o Amerika mo te kapu o te ao katoa, i mate ai a te ' Shamrock,' na Makoni i whakaatu ki nga tangata o nga nuipepa i te tuawhenua, nga korero o te reihi, i te wa ano e rere ana nga kaipuke i te moana nui. Ko Makoni i runga tima. I tona hokinga mai i Amerika ki Ingarangi, i te whaawhai o te mano o te pahihi kia wawe te ' rongo i nga korero o te whawhai ki Taranawaara, no te mea kua maha rawa o ratou ra ki te moana i kore ai e rongo korero, e 66 maero te tawhiti o te tima ki te moana ka hopukia e te mihini a Makoni nga korero hou o te whawhai i tukua mai e tetahi mihini i uta. I whakaaturia mai ano etahi atu korero. I whakaaturia atu e Makoni kei te pai katoa nga pahihi, i tukua atu hoki nga korero a nga pahihi ki o ratou hoa i uta ; kotahi te tangata i korero atu ki ona hoa i uta kia takaina mai he hakari mo tona unga atu. Ka 45 maero te tatanga o te tima ki te tuawhenua ka taangia e Makoni ki te nupepa o te tima nga korero katoa i tukua mai i uta ; e 4s. 2d. te utu o te nu-pepa kotahi, ko nga moni i hoatu, e ia mo nga mahi aroha. Ka kino te haere a te pakeha ! Ma wai koe e te pakeha e whaiwhai atu !

He kaipuke pakaru. Tenei ake ano etahi o nga hanga a tenei o nga atua o te pakeha. Kei te tomokanga atu ki te tuwheratanga o te Te- eme, te awa nui o Ingarangi, e tu ana a Rana- na. Kei taua tomokanga atu, etahi tahuna, he akau kei te moana. Pakaru iho, pakaru iho te kaipuke ki enei tahuna i ia tau, i ia tau. Kua pungaia e te Kawanatanga he kaipuke- raiti ki runga i enei tahuna, hei whakatupato i nga kaipuke. I tetahi marangai nui, i te kaha rawa o te kohu, kaore i kitea te kaipuke-raiti, u ana tetahi kaipuke nui ki runga tahuna. I te kore kaore e kitea atu a uta, ka tukua mai te korero e te mihini i runga i te kaipuke-raiti i roto i te kohu : " He kaipuke nui kua pakaru,, haere mai te poti whakaora."

Rangona ana e uta te korero, maanu, ana te poti hei riri ki te hau, ki te ngaru,. Kaore i te kitea mai, i te mohiotia hoki e te kaipuke kei te haere atu, te poti-whakaora i roto i te kohu, na te kokiri tonutanga o te ihu o te poti i kite ai nga pahihi me nga heramana e ko te ora tenei.

Tukua te karanga. E te tangata e noho tonu nei i roto i te hara, kei te mohio ranei koe kei te toremi koe ki roto o te hohonutanga o te mate mutunga kore ? Me he mea kei te mohio koe, hohoro te tuku, atu i roto i te mihi- ni o te ngakau, he karanga mau ki te rangi, pera me te karanga a ia tangata i tuku ai : " E te Atua tohungia ahau te tangata hara." Ahakoa e karapotia ana a Ihowa e nga mano o te rangi, e karanga ana te ao katoa ki a ia, ka titaha mai ano tona taringa ki to karanga, ina pupu ake i roto o to ngakau. Ka pa tona ngakau, i te aroha. Otira e te hoa kaore te ora i tawhiti rawa, kaore i te rangi i te hohonu ranei, engari kei to taha tonu. " Aua e mea i roto i tou ngakau, Ko wai hei kake ki te rangi ? ( ara ki te tiki atu, i a te Karaiti ki raro) ko wai ranei hei heke atu ki te hohonu ? ( ara ki te tiki atu i a te Karaiti i roto i te hunga mate.) E pehea ana oti ? E tata ana ki a koe te kupu, kei tou mangai, kei tou, ngakau ko ia ia ko te kupu o te whakapono e kauwhau nei matou; ara ki te whakaae tou mangai ko Ihu, te Ariki, a ka whakapono tonu ngakau na te Atua ia i whakaara ake i te mate, e ora koe. Ma te ngakau, hoki kia whakapono ka tika ai ; ma te mangai kia whakaae ka ora ai." ( Roma x. 6 10.) R. T. M. K.