Nama 29
19000701

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA, TE AROHA PUMAU.

He korero kua tawhitotia ki te pakeha otira kaore ano ki te Maori, te whakarerenga a Piriniha Ohaka (Oscar ) tamaiti a te Kingi o Huitini (Sweden), i tona karauna i tona aroha ki tana whaiaipo, i te kore ona matua e whaka- ae kia moe ia i taua wahine ware. He maha nga wahine e noho ana i roto i te whare-kingi i Huitini, hei hoa mo te Kuini, hei mahi hoki i ana mahi ko etahi o aua wahine he momo kingi, he momo rangatira, ko etahi he ware noa iho. I roto i te rarangi ware a Mihi Manga ( Miss Munck), he kotiro tino pai atu te ahua. Ehara te ataahua o Mihi Manga i te mea no waho anake, engari no waho tae atu hoki ki roto, no te mea he wahine tino whakapono ia. Tera ano tetahi mea i tino kake ai tona pai, ara he reo-reka ki te waiata. Ka pai te ahua, ka painga whakaaro, ka reka te reo, ka tino kino te haere ! I tetahi ra ka rongo te kuini i taua kotiro e waiata ana, tetahi reo tino reka atu,, ko taua kotiro ia kaore i mohio kei te whakarongo te tangata ki a ia. I runga i enei painga o taua kotiro, ka arohaina e Piriniha Ohaka, tama a te kingi. I tetahi ra, i te mea kua tino kaha te aroha o Piriniha Ohaka, ka whakaaturia e ia ki ona matua. Te tino riringa o te kingi me te kuini o Huitini, ka mea e kore rawa raua e whakaae, i te mea ehara a Mihi Manga i te momo kingi. Ko Ohaka hei kingi i muri i tona papa, a ki te moe ia i a Mihi Manga ka he to ratou kauwhau kingi; he mea whakama rawa ki a ratou. Otira kaore i ta-matemate te whakaaro me te aroha o te piriniha. I mea ia ki ona matua, hei aha mana te kingitanga, te torona, te karauna, kei runga noa ake i enei mea katoa a Mihi Manga. Ka tukua e ia tona turanga kingi mo tona teina. He nui te pouritanga o ona matua. I mea raua ki a Mihi Manga kia kaua rawa e korero atu ki ta raua tamaiti, e titiro noa atu ranei. Ko te piriniha i tonoa kia eke ki runga manuao, kia haere ki nga whenua, me kore noa e ngaro tona aroha, e wareware ranei ona whakaaro ki tona whaiaipo. I a Mihi Manga te papa-a-Hikitai. Hua noa i tuku atu ai i tona ngakau me ona wha- kaaro katoa ki te tama a te kingi tera ano e ata whiriwhiria, tena ko tenei i runga tonu, e haere ana ka whakakorea mai ia e nga matua o te piriniha i runga i tona taha ware. Me he mea he kotiro maori tenei kua waiatatia te mea nei na : Na te aha ra I kore ai e paingia He ware pea No taku kaupapa e ... ! He roa te ngaromanga katahi ka hoki ki te kainga. Hua noa nga matua kua wareware, kaore, katahi ra ka tino nekehia atu. I runga i te kaha o te piriniha ka whakaae tona papa, engari kaua te ingoa pirinihehe hei eke ki runga i a Mihi Manga, me ki ia he wahine iti na te piriniha. I tino riri a Piriniha Ohaka ki tenei tikanga a tona papa. Kaore ia i wha^ kaae kia kiia te wahine i arohatia e ia i runga ake i nga wahine katoa i te ao he wahine iti, engari me ki tonu ko tana wahine rangatira, i te mea hoki kaore ona hiahia ki tetahi atu wahine i te ao katoa, ahakoa momo kingi. Ka tohe te piriniha, me ,te kaha tonu ona matua ki te whakakore ; ko ta wai ra akuanei e tutuki, me ata tatari e tatou. He tangata pirangi nui te kingi ki te waiata, ki nga mahi whakatangitangi ; i tuhituhia ano e ia etahi waiata me nga rangi. I tetahi po ka karangatia e te kuini he po ngahau ki te whare kingi, he waiata he whakatangitangi nga mahi. Ko Mihi Manga tetahi o nga kai- waiata ; i whiriwhiria e ia ko te tino waiata kai -ngakau a te kingi he waiata mana. Ko taua waiata, he waiata aroha, pouri te tu, o nga kupu, a i te waiatatanga a taua kotiro, i te aroha pea e ngau, kino ana i tona ngakau, i tona kite atu hoki i tona whaiaipo piriniha, i tino pai atu, he hanga whaka-aroha, ngoto ana ki roto ki nga ngakau o te hunga e wha- karongo ana. I tona nohoanga ki raro ka tuohu, ka tangi, me te awhi ano ona ringa ki tona uma. Katahi taru aroha ko te tamahine a te tangata ki te tangi ! Mehemea he kotiro maori kua paoa te mea nei na : He nui no te aroha I tangi ai au, e ..., E rua aku ringa Ki te tawhi kau ra ... ! Kore rawa he waha i kiki, engari i whaka- mau katoa nga kanohi ki te kingi, ki te kuini. Tera kua pa te aroha ki te ngakau o te kingi, i te pai o te waiata a te kotiro e whakapa- rahakotia ra e ia. Tona whakatikanga ake ki runga, me te puataata ano te roimata i ona whatu, ka mau, ki te ringa o tana tama, o Piriniha Ohaka, ka arahina ki a Mihi Manga, ka whakaarahia ake, ka honoa o raua ringa- ringa. I muri tata iho ka marenatia raua. E kiia ana e nga nu-pepa, ko tenei tangata raua ko tona wahine nga tangata nui atu, te hari kei Uropi ahakoa kaore raua i roto i te whare-kingi inaianei. Ta raua tino mahi inaianei he haere ki te kauwhau haere i te aroha o te Karaiti ki te tangata, he atarangi