Nama 42
19010801

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA, TE KURA KOTIRO MAORI.

Te taenga o Peneti ki Otepoti. KI TE ETITA o TE PIPIWHARAUROA.

TENA ra koe e mahi mai na i nga mahi pai mo te iwi Maori. Heoi te mihi. Tenei etahi kupu hei whakaatu i te whakaaro o nga pakeha o toku kainga mo te Maori. I kitea to ratou whakaaro pai i te taenga mai o Peneti ki konei ki te kauwhau mo te kura kua rongo atu nei au kua takoto te kohatu o te kokonga i te mokopuna a Kuini Wikitoria. Kua tae noa mai te rongo ki konei kei te haere mai te toa o.Taranaki a Peneti ki te kawe mai i te korero o te kura hei whakama- haratanga ki te kuia pai ka taha ake nei. Tera ano i konei e tahi tangata e whakawatea ana i te ara mona. He tokomaha nga karere i tonoa i mua, engari ko te tino karere nana i whakaoho a Otepoti katoa ko te ' Nupepa.' Ahakoa he aha te nupepa, kaore i whakapara- hako ki te kawe i te rongo o te autaia i taria atu na. Ko te Nupepa a te hahi Kotarani, tetahi i manaaki i taua take. I tae mai a Peneti i te ahiahi o te Paraire, i te 9 o nga Haora o te po, a, kawea tonutia atu e nga kai-whakatau i a ia kia kite i te etita o te tino pepa o konei. I te ata o te Hatarei, ka puta te rongo ki te pa katoa tenei a Peneti ka tae mai ki te homai korero ki te iwi. I panuitia hoki e kauwhau ana taua tangata ki nga whare karakia o te hahi o Ingarangi i te Ratapu. I te ata o te Ratapu, i te 11 o nga haora, ka tu te karakia tuatahi. Ki katoa te whare karakia, kia mohio mai koutou, kaore tenei iwi te pakeha e tino kai-ngakau ana ki te haere ki te karakia i nga ata; hei nga ahiahi anake. Na konei tino miharo rawa atu matou i te tomonga o taua whare nei. I te minita ano • nona te whare te karakia, engari ko te kauhau i a Peneti. E hoa he taru aroha te putanga mai o Peneti ki runga o te pourangi, ano he putanga morehu. Katahi ano te minita Maori ka kitea ki runga o te pourangi whare karakia pakeha. Nga kanohi o te pakeha kei a ia katoa. Tena pea o ratou na whakaaro huhua, ko wai ka mohio atu. Kei te panga mai o te reo o Peneti, ngahoro katoa e tahi whakaaro ke ka paepae te taringa ki te whakarongo ki nga kupu a taua tamaiti Maori. E te iwi puta ana nga whakaaro ki te wa i nui ai te tangata. Nga kupu a te morehu nei ngako katoa, a kaore te pakeha i whakapara- hako. " E te ao te rangi ka uhia, he huruhuru te manu ka rere !" He whai huruhuru te manu nei, na reira ko tona rere kaore i hakahaka mai ki raro. Kaore e whai takiwa inaianei hei tuhinga atu i nga kupu o te kauwhau, engari i penei te whakaupokotanga :— 1. Te tu o te Maori o mua. 2. Te taenga mai o te Mihinare. 3. Te taenga mai o te pakeha kino. 4. Nga pakanga ki te pakeha. 5. Te Matemate o te Maori. 6. Te kore rawa o te pakeha ki te awhina i te Maori. Tana whakatauki: " Ka pu te ruha, ka hao te rangatahi." Heke ana te werawera i te rae o te pakeha i te whakama. Taumaha ana nga tawai a taua nanakia a Peneti, ka tuohu te pakeha ki raro, ka ki: " He aha o pakeke i kore ai e haere mai i era tau atu." Ko te tu tonu tenei o ona whai-korero katoa. Tetahi mea tino pai ko te tononga mai a nga rangatira o nga kura wahine e toru kei konei ki a haere atu a Peneti ki te kauwhau i tana take ki a ratou tamariki, no te mea he kura wahine te kura ka whakatungia mai nei. I Girton College, £10 i kohia; i S. Kilda, kara o nga tamariki o te Hahi o Ingarangi, e £2, i te Girls' High School, kua takoto te whakahau. kia tu he hokohoko, ko nga moni me tuku mo te take a Peneti. Kaore i rikarika te aroha o te tamariki pakeha ki o ratou whanaunga Maori. Te tino kai-awhina ano o te mahi a Peneti ko nga nupepa. Na reira, ko ana whai-korero ki tena, wahi ki tena wahi ka korerotia e. te katoa. Tera atu ano etahi hui-ana-. Ko nga ngakau o te iwi o Otepoti, tuwhera katoa ki te Maori. Kua eke ki te £200 te moni o konei. I noho a Peneti ki te kainga o Akuhata Hamutana, Kai-Rehita o te Kura Nui o Ote- poti, he tangata hoki e aroha ana ki te Maori, e awhina ana i a ratou nei mahi. He mema honore ia no te Kotahitanga o Te Aute. Ki te ki a etahi o tenei iwi, ki te haere mai a Peneti a muri atu, me haere mai hoki he tamariki wahine Maori, kia rua kia toru ranei e pai ana, hei tauira ki a ratou i te mahi ma te kura hou nei. Heoi ena kupu. Kia ora te Maori. Kia ora hoki o tatou whanaunga te pakeha hei awhina i a tatou. Kia ora to tatou matua a Mihi Kiiti ( Miss Keith) raua ko tona hoa ko Mihi Ereti, na raua tenei ohu i karanga, tenei taua i whakataka. ' He toa te wahine.' Na to hoa, na TUTERE WI REPA.