Nama 48
19171012

whārangi 3  (12 ngā whārangi)
titiro ki te whārangi o mua2
4titiro ki te whārangi o muri


Tirohia ngā kupu whakataki o tēnei niupepa

 

Te Kopara.

 

NAMA 48. GISBORNE. OKETOPA 12, 1917

 

"Iti te Kopara, kai takirikiri ana i runga i Kahikatea ."

 

Te Hinota o te Pihopatanga o Waiapu.

 

I TU te Hinota nui o te Pihopatanga o Waiapu ki Nepia i te 24 o nga ra o Hepetema. Engari ko te ra i tino huihui ai nga minita o te taha pakeha me te taha Maori ko te 20th. I te he ra nohopuku no nga minita. I te 7.30 i te ata ka tango Hapa ratou i te Cathedral. I te 10 o nga haora he karakia ki reira ano, ara ki te wahi iti o te wharekarakia i hanga nei hei whakamaharatanga mo te houhanga o te rongo o te whawhai ki nga Pua i Awherika. I te 11.30 he karakia ano. I te 2.30 ko te Ritani, i te 4 p.m. ko te karakia whakamutunga. I enei karakia katoa kotahi te tangata nana nga kauwhau, ara ko Rev. H. Watson o Poneke. Kaore he korero noa a te tangata mai ano i te ata a tae noa ki te mutunga o nga karakia.

 

I te Hatarei ka hui katoa nga minita ki te aroaro o te Pihopa i te wharekura o te Cathedral ki reira whakahaere ai i nga. take e pa ana ki nga mahi o te Pihopatanga.

 

I te Ratapu ko te karakia tango Hapa i te 8 a.m. I te 10 ko te karakia o te ata. I te 11 a.m. ko te karakia nui o te Hinota. I tukuna e te Pihopa kia Rev. P. Peneti te kauwhau. I te 3 o nga haora he karakia mo nga tamariki. I te 7 p.m. ko te karakia ahiahi, ko te kauwhau i te Pihopa.

 

No te 4 p.m. i te Manei ka whakapuaretia e te Pihopa te Hinota. Ko tana whaikorero kotahi haora me te hawhe e panui ana. I te ata o te Manei i hui nga mema Maori mo a ratou take ki te Pihopa. I te ata o te Turei ka hui nga mangai-reimana me nga kai-karakia ki te aroaro o te Pihopa ki te whakahaere i nga take e pa ana ki a ratou. I te 4 p.m. i tena ra i tena ra ka hui te Hinota nui a tae noa ki te 10 o nga haora o te po. No te 11 p.m. i te po o te Taitei katahi ano ka mutu nga mahi a te Hinota.

 

He nui nga take o te Hinota kaore e taea te whakaatu katoa i te perehitanga kotahi o Te Kopara. Engari ka taea te ki penei koinei tetahi Hinota i tino pai nga whakahaere i ngawari te whakaotinga o nga take i puta ai hoki he hua nui ki te Hahi Maori.