Nama 73
19200228

whārangi 3  (8 ngā whārangi)
titiro ki te whārangi o mua2
4titiro ki te whārangi o muri


Tirohia ngā kupu whakataki o tēnei niupepa

 

Te Kopara.

 

GISBORNE.

 

NAMA 73.

 

PEPUERE 28, 1920

 

"Iti te Kopara, kai takirikiri ana i runga i te Kahikatea."

 

 

Te Karakia Hauhau.

 

Na R.T.K.

 

KA kohurutia mai ra a Te Wakana e te Hauhau ki Opotiki, ka poutoa te matenga, ka hikarohia nga whatu ka kainga e Kereopa, kiia tonutia atu ia ko Kereopa Kaiwhatu, ka poua te tinana ki te puare o te whare-nohinohi, ko te matenga ka mauria hei ito, ka huri te ope a te Hauhau ki te Whanau-a-Apanui ki Ngatiporou. Ko nga rangatira o te ope ko Patara Te Tuhi he papa ki a Mahuta, ko Te Wiwini raua ko Te Wao he rangitira no Taranaki. Ko te pa i noho ai te Hauhau ki roto o Waiapu ko Pukemarie. I pakaru a Ngatiporou ko te wahanga nui i huri ki te Hauhau He maha nga pakanga i roto o Waiapu, hei te pakanga ki Hungahungatoroa ka mau herehere a Ngatiporou hauhau ko Taranaki i mawhiti, engari ko Te Wao i hinga ki Makeronia ko Te Wiwini ki Pukemaire. Kaore te Hauhau i whiua i runga i te aroha o Mokena Kohere. E ai te korero whanui i tapae moni a Te Makarini ki a Mokena mo nga raruraru o te whawhai engari i te titiro o te Mokena ka mate te whenua ko tana kupu tenei ki a Te Makarini, "Mauria te moni, naku tonu taku riri, ehara i a koe i te pakeha." Ka whai kupu hoki a Te Mokena ki a Ngatiporou, "E hoki i ia iwi i ia iwi ki te tahu i tana ahi i tana ahi." Ko te oranga tenei o te whenua o te tangata. I muri mai ka huri etahi o te Hauhau ki te taha Kawanatanga ka uru ki te riri i Waerenga-a hika i hinga ai te Hauhau.

 

Ko enei korero hei whakaupoko noa iho mo taku tino korero ara mo te karakia hauhau - me he mea he karakia. He taunu ki te kupu karakia te ki he karakia to te Hauhau engari pea ko te kupu tika he pao. Ka kitea i runga i tenei pao te rorirori o te Maori ki te whakapono noa ki nga mahi hangarau. Ahakoa i raru a Ngatiporou i taua karakia kaore ano kia mataara, kia mohio kei te whai tonu nga uri i nga mahi tinihanga i nga korero teka a nga tohunga katoa ahakoa ko wai te tohunga, ko Wereta, ko Hikapuhi, ko Rua, ko Hori Kingi, ko Tutekohi ranei ko wai ranei. Kotahi tonu to ratou parani - he korero parau katoa. He ahua tonu no te tangata te hoha ki te mea tawhito ka whai ki te mea hou.