Nama 40
19010601

whārangi 2  (16 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA, HE TANGI MO KUINI WIKITORIA.

(Na REV. MOHI TUREI.) KAORE hoki e te aroha pakatokato ana te paanga mai ki roto ra. Ka tu ki runga ra ka taka te whenua. Ka hoki whaka- muri te mahara ki nga rangatira o Porourangi ka ngaro nei ki te po. E hoa ma e, whakarongo ake ra ki te harurutanga mai o te pu repo e tuki mai i Ingarangi. Tera te uira o te waea te rere nei i te moana he homai i nga rongo e panuitia mai ra e te Puke-ki-Hikurangi, e tiorotia mai ra e Te Wharauroa, ko Kuini Wikitoria kua moe atu i te moenga roa i a koutou, ka rongo te taringa ka hiki te mauri, ka hotu te manawa. He hanga makuru noa te wai o te kamo ki waho ra e ai te wai korari, e ruiruitia mai ra e te ata rarangatanga mai o te hau moana. Whakatika ake ra e Porourangi i te riu o Waiapu, tangihia Wikitoria; tangihia i roto i o whare nunui, i o whare whakairo, i roto i o whare karakia i nga whakawhetaitanga i te ata i te ahiahi. Tangihia ra te Kuini i waiho ai koe hei rae tiparetanga mo tona Karauna Tapu I haria ai koe i Waikare Taheke, ka tu kei runga o Panekira ka pono e koe ki roto ki Waikare Moana. Ka whakairia ki runga i Tauwharemanuka i Maungapohatu. Ka whiti ko te ra ki runga ki a Te Urewera ka kowha- wha mai Tamakowhawha i roto ra. Ka whiua e koe ki te pu o te tonga ki runga o Rangipo i Patea, ka poni takati ai ara te take o Taranaki ka mau ko te rongo ko nga Waka Taurua. Ka namunamua haeretia i ara i te takutai o te Tai-Rawhiti ka huri i te motu, ka whakapu- kaitia ki te riu o Waiapu ka hipokina iho ki tou mana e iri ra i runga "ko Atareta," ka rawe te ingoa ko te Kuini Nui. Haere ra e Wikitoria ki tou Ariki Tapu i te rangi i waiho ai koe hei mata mo tana rakau tapu, mo te rangimarie mo te rongo pai e, mo te rongo mau, he rongo taketake te rongo o Rakaikoraahi, he rongo tama wahine. Waiho ra- e kui ma o tamariki pakupaku meroiti e mahi mai ra i te kareti o Te Aute mana e hui te kotahitanga kia tino mau. Tonoa ake ra e Porourangi to manu meroiti rawa, te Tihitihi pounamu a hai tiki ake ra i te rakau tapu kakara-nui a Tane, i pona ki Hikurangi, mau- nga nui, maunga tapu, maunga o nga whaka- tauki nui; mana e mau mai te rau o te taramea a hai ruirui haere ki nga marae whare o te Ika-a-Maui, ka pawa te kakara. Whakatika ake ra e Porourangi kawea te tangihanga nui ki tou Ariki e takoto mai i runga o te atamira, te "tuahu," te "toma" tapu ona tipuna o mua iho. Tikina ake ra nga rau o te wao o Tane, te tohu o te whare mate o te whare taua o te whare pongarau o Hine Te Iwaiwa utaina atu ki runga i tou waka tapu ia Nukutere te waka o to tipuna o te Whirowhiro Nui, mauria ki to ringa nga hoe tapu "Arapangateatinuku," a "Arapangatea- tirangi" hai patu atu ra i nga tai o Tangaroa i waiho i waho ra i te moana nui a Kiwa, mo te "ihinga," mo te "wharenga," mo te "mara- ra," mo "tai-pupuni," mo "tai wawana," mo "tai-aropuke," mo te "autukemiha," mo te "aukorimiha," mo te "auripomiha," ka puta ki waho ra te whaka-wiringa o Tutewaianu. Waerea to ara te awa o to tipuna o Ariki tapu, kia inu atu koe i te wai o "whakatau." Wha- kahaerea iho te kakau o to hoe ko maninitua ko maniniaro, ka tangi te kura ka tangi wiwini ka tangi te kura ka tangi wawana. Werohia ki waho ra te urauranga o te ra te poho o Ha- waiki ka tuhakehakea te "kowiwini" katuha- kehakea te "kowawana," ka whakahangai ki te awa nui o Ingarangi ka rere koe i runga i te tai whakaaro i te tai matauru i te tai pakato i te tai whakaki ka u ra koe te waapu turanga manuao o Ranana ko taane ka haruru tutu Whano ! Whana! Haramai te toki, hauma. Hui e! Taiki e! Ka to ra koe i tohou waka ka whakatakotoria te rango tapu ko Manu Tawhiorangi; ka ta- patapa hau koe i tahau ngeri ka pane kei a wai ka pane kei a itu ka hauhau te toki mata- po ia. Huri te po; moi marire mai.

Ka tu ra koe i te tohu he Kura-takai-puni he ra whanake i te rua ka ahu atu koe ki te ata- mira o tohou Ariki tapu ka tukua e koe i runga te poupou tahi te tuku tahi te whana tahi ka tangi te titi haoa, haoo, ka mau ra koe nga rau o te wao nga tohu o te whare mate o te whare taua o te whare pongarau o Hine Te Iwaiwa ka whiua ki runga ki te atamira o tou Ariki te ta o te tutumoko te ta o te raurenga te rau o te heketara o te wharangi o te kumara kai torouka, ka whiua e koe te rito o te kawakawa, te rau o te kawakawa te ta o te kawakawa. Kawa—Te Angiangipu. Pikipiki Tawhaki kakekake Tawhaki kia re- re mai he tini kia rere mai he rangi, he rangi mata ra ki te uru rangi whatitiri takataka wha- ngainga te marama papamai. Kawa—Te Angiangipu. Ka tau a te rangi ki te kohukohu ka tau a te rangi ki te riri wai tangarowai takina whatu ruiruia te kawa whatu takina te kawa. Kawa—Te Angiangipu.