Pukapuka 2, Nama 33
18640903

whārangi 2  (4 ngā whārangi)
titiro ki te whārangi o mua1
3titiro ki te whārangi o muri


Tirohia ngā kupu whakataki o tēnei niupepa

 
TE WAKA MAORI O AHURIRI.

taea e au nga ritenga pai e hiahia nei au.

Ahakoa manawanui noa au, ahakoa tupato

noa au, kua tupu ake ano te tautohe, te

puhaehae, te whawhai marire ano. He aha

ra i penei ai ? Ki hai tenei hanga te tanga-

ta i kiia hei hanga tautohetohe, hei hanga

whawhai, tetahi ki tetahi, me te kuri nei

ano te ahua. Taukiri koe te Maori! nga

uri o Maui! E hoatu ana he pai ki a

koutou; e meatia ana kia hapainga tou

ingoa ki roto i nga iwi o te ao—he rere

anake i a koe !

Otira ko te tino take i tupu mai ai nga

he, me nga kino, ki ta matou titiro, ko nga

whenua kaore ano kia puea ake i roto i te

maoritanga; nga iwi e pupuri tonu

ana i nga tikanga o namata. Otira,

e kore e oti tena taha o te korero i tenei

nupepa; waiho, hei tera nupepa whakaoti

ai.

TENEI matou ka rongo ki etahi maori e

korero ana kua whakahengia, e nga pakeha

o Ingarani, te tikanga o te Kawanatanga o

tenei motu ki nga maori. E ki ana meake

whakahengia ai a Kawana Kerei e te

Kuinitanga, ka whakatikaia nga maori; ko

te whenua ekore rawa e riro tetahi wahi.

Nawai rawa enei korero horihori i ako ki a

ratou ? Na te hau noa atu ano pea.

Na, me whakatikaia e matou ena korero

kia ata tika, koi tinihangatia tonutia kou-

tou e te tangata rupahu.

Kua tae mai nga rongo o Ingarani ina

tonu nei—i nga meera o reira mai. He

tika ano te korero i roto i te Runanga o te

Kuinitanga mo te whawhai i Niu Tireni

nei—he kimi i te take o te kino ki konei.

Heoi, mahia ana e ratou, whakaotia iho ana

ko te mana o te Kuini, o te Ture, me

hapai ki runga i tenei motu—kia kotahi

Rangatiratanga, kia kotahi Ture, ko to te

Kuini anake. Ko te tikanga o Kawana

Kerei kia tangohia etahi o nga whenua o

nga iwi tutu, kua whakaaetia hoki tena.

Engari ko te aroha, e nui ana te aroha; e

mea ana kauraka e hunaia rawatia nga iwi

tutu; kauraka e tangohia katoatia te

whenua; ko te iwi i iti te hara, kia iti te

whenua e riro; ko te iwi i nui te hara, kia

nui te whenua e riro. A, ko te tikanga

ano tena a Kawana Kerei; e rite tonu ana

tona whakaaro ki to te Kuinitanga. Tena

ano ra nga pakeha o Ingarani i mea kia

kauaka rawa atu te whenua mauria; otira

kaore i puta ta ratou whakaaro i te tokomaha

te pehi. Ko tenei, kia rongo mai koutou, ka

riro ano etahi wahi whenua o nga iwi tutu;

ka hapainga ano te Ture o te Kuini hei

pehi i nga tutu, i nga kino katoa o konei,

kia kore rawa e tupu ake i muri, kia noho

rangatira te tangata—pakeha, maori hoki.

Tera ano pea matou e hoki ki enei

korero i tetahi nupepa.

HE WHARANGI TUWHERA MA NOA

HOA TUHI MAI.

Akuhata 24, 1864.

KI TE WAKA MAORI, —

Kua kite matou i tau reta e Morena. Kaore

he korero. Kua oti nga tikanga i roto i te Pa-

whakairo; kua korerotia i roto i nga hui katoa

ki kona te he o taua tikanga Kingi. E tohe tonu

ana ratou ki taua tikanga; kati, me waiho ratou

i kona haere ai, mana e tahuri mai ki to tatou

tipuna, ki a te Kuini. Ko nga ritenga kua kore-

rotia i mua. Kaore he kiminga ritenga inaianei.

Ka rere te weta o te Kingi, me ona wahi katoa

kua riro i te ringa o Aitua.

NA NGA TANGATA o MOHAKA.

Pourerere, Akuhata 18, 1864.

KI A TE KAI TUHI O TE WAKA MAORI, —

E hoa tenakoe. Ko te take o tenei reta i tuhia

atu ai tenei kua kite au i etahi korero i roto i nga

nupepa ki au. Tenei te korero i rongo ai ahau

ko te hokonga whenua a Tareha i te Kaweka.

Tenei hoki tetahi, ko te hokonga a te Hiratau

i Manawatu; ko te hokonga a Ngaitahu i Wai-

nui oru tetahi. Na, kua kite ahau i te hokonga

whenua i tenei hokonga hou e hokoa na ano ki a

te Kuini i te takiwa o te Kingi maori nei. Kei

te pehea nga runanga nana nei au i tiki mai i

nanati toku kaki; nga tangata nei a Morena, a

te Paraone, a Rota, a Karaitiana, a Karauria, a

Matenga Ruta o Waikato, a Apiata, a Paora Ro-

piha, a te Herewini ? Me haere ena tangata, kua

tuhia nei ahau o ratou ingoa, ki te nanati i te

kaki o Tareha, o te Hirawanu. o Ngaitahu i Wai-

rarapa, kia mohio ahau he kaha to ratou ki te

tiki i ena nga moni. Na te ahua iti pea i au i

haka mai ai koutou i tenei haka na: —

Toroa e! Toroa whakapai tangata!

Huia e! Huia tangata kotahi!

—I waiata ai i tenei waiata hoki, na: —

Ki kona te rahurahu tupu noa mai ai,

Kia piki ake au ki runga te kiritoi.

Na, e ta ma, ko te take o tenei korero i whaka-

houtia ai be whakahoutanga ano no te hoko

whenua inaianei. Huritu.

He kupu ke tenei, he whakapai noku ki nga ko-

rero a Tamatea i te nupepa o te 9 o Hurae, a

Paora hoki ratou ko tona iwi ko Ngatipahauwera.

E tama, e Paora, ka pai koutou ko tou iwi, ka

noho ki te mana o te Kuini. E Pitiera Kopu, e

Paora te Apatu, e whakapai atu ana ahau ki a

koutou. Inahoki, no koutou anake nga tipuna

ingoa nunui nei, a Tamatea, a Kahungunu. Koia

hoki tenei, kia mau ki te oranga o te pani, o te

pouaru, o te rawakore, o nga tamariki hoki.

Heoiano. Na to koutou hoa aroha.

E Hemi Wuru. Tukua atu e koe toku reta ki

te Waka Maori kia rongo mai o tatou hoa maori,

pakeha hoki—kei hoha koe, tukua katoatia atu.

Na EREATANA TE KURU.

Pourerere, Akuhata, 1864.

KI A HEMI WURU, —

E ta, tukua atu e koe taku reta ki te Waka

Maori kia kite o taua hoa maori i Mohaka.