Pukapuka 0, Nama 33
18841015

whārangi 3  (14 ngā whārangi)
titiro ki te whārangi o mua2
4titiro ki te whārangi o muri


Tirohia ngā kupu whakataki o tēnei niupepa

 

He Kupu Tuku Mai.

 

Ki a TE KORIMAKO.

 

E MAKO, - Mau e kauwhau tenei Rongopai ki au wahi e haere ai koe, koia ka tuhia iho ki raro nei. Kei konei a Hirini Taiwhanga e kohi moni ana ara kei Kaikohe, kei Ohaeawai ara kei nga takiwa i pooti ki aia. Ko te moni kia toru tekau pauna hei hamene ia Henare Maketu, ia Wiri Marena. KO te utu ma taua hunga e ai te ki kia kotahi mano pauna (£1,000), kia rima rau ma te mea kotahi o raua. Hoi ena. I te rua o Hepetema nei ka hui nga tangata ki Ohaeawai ki te whakawa whenua ka tu a Hirini ka mea, kia whakapuaretia te Tiriti o Waitangi kia turakina a Ihaka Te Tai, a Wiremu Katene, a te Te Parihi, me te Tane Haratua, kia hoatu he tangata hou hei tiaki i nga mahi a te iwi. Hoi tuturu ana te ki hei te Maehe e haere ake nei taua mahi. Kia kite ra koe e te tangata whakaputa kei te kai tou mangai i te kai a kei te hari tou ngakau. Titiro atu ra kei te tu mai te raru mou i mua i tou aroaro, na wai koe e manawa poto kia kata koe kia manawa roa. Ka rite koutou ki te kupu tupua e ki nei, "A nana! taka iho ana koe e Tawera e te whetu o te ata."

 

Na HARE MATENGA.

WAIMATE,

Hepetema 4, 1884.

 

Ki a TE KORIMAKO.

 

E HOA, - Tena koe ! E hiahia ana ahau kia puta tonu TE KORIMAKO kia au i nga wiki katoa o te marama, mehemea e pai ana koe ki tenei tuhia mai tau utu e pai ai koe mo te tau mehemea e 8s., 1s., 12s., e pai ana ahau hei te Hanuere e haere ake nei timata ai, erangi me tuhi mai koe ina tae atu tena reta i to whakaae ranei, i to kahore ranei.

 

Na to hoa,

TAMATI WAIHI

MATAIWAKA,

Hepetema 7, 1884

 

Ki a TE KORIMAKO.

 

E MANU, - Tena koe ! Tukua atu aku korero ki nga pito e wha o te ao nei kia rongo nga taringa kia kite nga kanohi. Na, e hoa ma, me whakanuku ake te moni ma TE KORIMAKO kia ono hereni i te tau kia kohi atu ai hoki nga wharangi kia rua ai hoki putanga i te marama mehemea ka waiho tonu e tatou kia penei ana ka mate ta tatou mokai e kore e kaha ki te rauna i te motu nei. Heoi ano.

 

Na TE AOREWA PATIRA.

HAUKAPUA,

Hepetema 21, 1884.

 

Ki a TE KORIMAKO.

 

E HOA, - Tena ra koe ! Te tangata pai ki te tuku mai i nga korero o nga tini motu o te ao nei. Taku kupu kia koe, e tautoko ana ahau i te korero a Rapana Inia, o Kaikohe, e ki nei kia nakuhia ake ki te 6 hereni nga moni ma te mokaikai nei ma TE KORIMAKO a tenei tau e haere ake nei 1885. E tautoke ana ahau i te kupu a taua tangata notemea tetahi kupu a nga tupuna mo te whare. "Ki te kore he pou o waenganui ka hinga te whare." Waihoki ki te kore he kai ma te tangata hei pou mo roto i te tangata ka mate ia. Waihoki ki te kore he hereni ma TE KORIMAKO ka kore e ia e kaha ki ta hari i ona pikaunga. Otira kei nga kai tautoko he ritenga mo taua kupu a tae atu hoki kia koe. Ki te whakaae koe ki te ono hereni mo tenei tau e haere ake nei ka tukua atu e ahau nga hereni. Heoi nga kupu kia koe, kia tau te aroha noa o to tatou Ariki o Ihu Karaiti kia koe Amine.

 

Na WIREMU TE KAHU.

MOHAKA,

Hepetema 25, 1884.

 

Ki a TE KORIMAKO.

 

E KORO, - Tena koe te manu tanga pai ! I te takihanga o te ata tae noa ki te toonga o te ra i tenei wa. Tena koe te manu, kaha ki te hari i nga rongo korero o te ao katoa. Tenei hoki etahi kupu, ma au e hari atu ki nga wahi katoa, mo nga kupu o te panui a Henare Parata, me nga kai tautoko i muri mai. E hoa ma, e oku hoa Maori tena koutou, kua kite au i a koutou panui. E mea nei kia nukuhia te utu mo to tatou matua mo TE KORIMAKO, ki taku mahara a kaua to tatou matua hei nukaia. Waiho maana e mutu; waiho tona aroha ki a tatou ki te iwi Maori. Inahoki kua tae rawa ta koutou whakaritenga utu ki te tekau hereni (10s.) mo te tau. Kia mohio koutou ka mutu tata te aroha o TE KORIMAKO kia tatou. E kore hoki e whena tonu, to koutou whiwhi i te moni, a enei tau e haere ake nei, no tenei tau kua mea koe kia nukuhia ake te utu kia maha ai nga putanga panui i te marama a era tau kua mea koutou he nui rawa te utu, a, te mutunga iho ka mahuetia e ratou to tatou matua. E pai ana to koutou whiwhi moni i naianei waiho hei oranga mo a tatou tamariki. Ki taku mahara waiho i te huaanga nui i te rua hereni (2s.) mo te tau. Kia maha ai nga ringa hei rahurahu mo ta tatou manu. Heoi ano.

 

Na to koutou hoa,

Na TE METE RAUKAWA.

PETEREHAMA, TAURANGA,

Hepetema 24, 1884.

 

Ki a TE KORIMAKO.

 

E HOA, - Tena koe, me to manu ! E hoa, ma e nga kaitautoko i te manu nei ki toku whakaaro ka nui te kaha o te manu nei inahoki kua kite au i nga utanga i maua mai e ia kia au, a kua kite ano hoki au i nga utanga o runga i te waka Maori ki taku titiro e nui atu ana nga utanga a TE KORIMAKO i nga utanga o te waka Maori. Na, e hoa ma, kua hiahia nei koutou kia hoatu ano tetahi oranga mo ta tatou manu, a ka whakaatu au i taku moni mo te tau tekau ma rua hereni me te hikipene kia wha