Pukapuka 0, Nama 33
18841015

whārangi 4  (14 ngā whārangi)
titiro ki te whārangi o mua3
5titiro ki te whārangi o muri


Tirohia ngā kupu whakataki o tēnei niupepa

 

nga rerenga i te marama kotahi ka mutu aku kupu. Mau e whakaatu mai te ritenga o te mahi a te kamupene hanga tupeka mehemea heaha tana utu mo te pauna tupeka rau maroke na matou te kainga nui rawa atu te mahi i te tupeka. "Ko te utu mo te pauna tupeka rau maroke he hikipene mo te pauna." A tena hoki ka tukua atu te nama o TE KORIMAKO o Akuhata, 1883, kei taua nama nga moni me nga eka o nga whenua rahui i tenei motu.

 

Na to koutou hoa,

H. P. PARK.

MOTUEKA, NELSON,

Hepetema 25, 1884.

 

Ki a TE KORIMAKO.

 

E HOA, - Tena koe! Te tangata kaha ki te pikau i nga mea taimaha ki nga topitotanga o to tatou motu, kati ake nga kupu mihi, mau e tuku atu enei toru kupu kia kite oku hoa Maori me oku hoa Pakeha, e noho nei i nga takiwa o to tatou motu. Koia tenei nga kupu. Ae e whakaae ana e whakamiharo o ana ahau ki te panui a Henare Parata, ki te reta a Henare e Topi, a Kerei Roreika, e mea nei kia whakanekehia ake te utu mo TE KORIMAKO kia 5 hereni, kia 6 hereni ranei, otira mehemea ki te tokomaha nga tangatata e whakaae ki enei utu mo te tau e haere ake nei. Me he mea koia tenei te utu mo TE KORIMAKO, he pai ano hoki kia rua putanga i te marama kotahi. Heoi aku kupu.

 

Na to koutou whanaunga,

TE OTIMI PIRIMI

MATATA,

Hepetema 26, 1884.

 

KI A TE KORIMAKO

 

E HOA, - Tena koe ! Tenei te kupu ka tukua atu e matou e tangata o konei ara he tau toko i te reta a Henare Topi e ki nei kia nukuhia te utu mo TE KORIMAKO hia 5 kia 6 hereni mo te tau a kia rua hoki nga putanga i te marama Ko taua utu me timata i te tau hou e haere ake nei. Ko te pai o tenei utu he kore no te tangata e wehi mai, mehemea ka nuku ake ki te tekau hereni penei pea ka papahoro etahi o nga tangata i waho. Heoi ano.

 

Na TE WATENE HAPUKU, KEREAMA HUPATA, HETA WAIHOE.

POUKAWA NEPIA,

Hepetema 27, 1884.

 

[E pai ana hoki ekoro ma, ta koutou kimikimi mai i kona i te take e roaroa iho ai ta tatou manu. Kua puta te ki i te timatanga, i takea mai i te aroha tana korihirihi-haere. Tokorua nga tangata o taua kupu, ko Te No, ko ahau; kaore mana utu, kaore maku. Ko Te No kua hinga i tona hinganga nui ko ahau anake tenei e ngokihaere nei. Ko te pouaru o Te No kei tona whenua tupu kei Amerika; otiia, kua tae mai tana kupu kia rukuhia mai e ia te roa moana, raua ko tana hungawai wahine. Ko te 3 tenei o nga tau i haere ai, i whakamana ai te kupu aroha; a, e kaha nei ano ahau ki te tiaki i taua kupu. Kei te whitinga mai katahi pea koutou ka whakatakoto huarahi; a, waiho ma taku kotahi i roto i nga ra nei, e pupuri-manawanawa i ta tatou kupu, i oati ai tatou, i te orokorerenga o tenei manu Maori, ki rau-marae i Aotearoa, i Aropaoa. E koro ma, he ngakau tangata, ekore e kore te whakaaro. - Na HARE REWETI.]

 

KI A TE KORIMAKO

 

E HOA, - Tena koe ! Ekorihi, haere nei irau marae, o ia iwi, o ia hapu, e noho nei, i nga koata e wha o Aotearoa: - (1) E tautoko ana ahau i te panui a Henare Parata kia nukuhia te oranga mo kori kia 10 hereni i te tau 1885, kia 4 putanga i te marama. (2) E tautoko ana ahau i te reta a Henare Topi kia nukuhia te oranga mo te mokai nei ki te 5 hereni mo te tau 1885. (3) Ko te take a toku hiahia ki te tautoka i nga reta a ku whanaunga ko te 3 tenei o nga tau a manaaki ana ahau i ta tatou mo kai koia ka tautoko nei ahau ia Parata raua ko Topi. (4) manu kia aroha ki nga hamumu a to kai maanaki ki te tuku atu ki rau marae mate aroha hoki ka meinga, he teina, he tuakana. Heoi ano.

 

MAAKA HOORI

OHAEAWAI, BAY OF ISLANDS,

Hepetema 30, 1884.

 

Ki a TE KORIMAKO.

 

E HOA, - Tena koe ! E tautoko ana ahau i nga panui a nga tangata e mea nei kia nukuhia ake te moni ma TE KORIMAKO ki te £1 kia rima hereni ranei, kia tekau hereni ranei. Ko tehea o enei tahua e tu.

 

Na to hoa,

WIREMU WEKA.

MAHINEPUA, WHANGAROA,

Hepetema, 26 1884.

 

KI A TE KORIMAKO.

 

E HOA, - Tena koe ! E tautoko ana ahau i nga reta a nga tangata e mea nei kia whakanekenekehia ate te oranga mou kia ora koe te kotete haere i te motu nei. Engari e nga kaitautoko kahore he tikanga ia tatou, te marama, mo te tau ranei timata ai, ko toku hiahia kia tere tonu. Otira kei nga kaiwhakahaere te tikanga.

 

Na to koutou hoa,

NERI WEPU.

OMAIO. Oketopa, 4, 1884.

 

Whakautu.

 

NA "Ponui Tangihaere," no Makokomiko, Akuhata 23: E ki ana na te reti, na te hoko, na te mokete whenua, mahi Kamupene, na te Kooti Whenua Maori, na nga roia, i mate ai nga Maori. - Na "Waka Hori," i Ohaeawai, Hepetema 30: He tautoko i TE KORIMAKO. - Na "Hirini Mahura," no Pakiaka, Whangaehu, Hepetema 27: He whakaatu i te 2 hereni i tukua mai i Hurae; a, kahore a TE , KORIMAKO i tae atu ki a ia.