Pukapuka 0, Nama 45
18851015

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


Tirohia ngā kupu whakataki o tēnei niupepa

 

te rawakoretanga me te kore mahi, ma enei raruraru ka whai mahi ona ope me aua tangata e haere ana i runga i te ara he. Otira mehemea ka tahuri o ratou ruanuku ki te hanga i nga ture kia tika, penei kua ara te pai, kua aroha tetahi ki tetahi, penei ka rite ano enei kupu, " Ko nga huarahi o te matauranga he huarahi ataahua e arahi ana ki nga puna o te orangatonutanga."

 

Ka mutu enei raru, a ka huri ano o tatou kanohi ki tera whenua ki Houtana (Soudan), e rongo ano i te pari-karangaranga o te pakanga i runga i nga maania onepu o taua whenua. Ko etahi o nga hoia a te Kuini kei tana whenua ano e noho ana, notemea kua hui ano nga ope mangumangu, a tera pea e ara ano te kauae o te pakanga ki reira. Waihoki e ai te kii, kua whawhai ano taua whenua inaianei. Tera tetahi taone e karangatia ana ko Kahara (Kassala) e whakahorotia ana e nga Arapi, e tawhiotia ana te pa, e tukua ana ma te mate-kai e patu te hunga o roto i taua pa. Puta ana te aroha o Kingi Hoani, te Kingi o tera whenua o Apahinia (Abyssinia), tukua atu ana e ia etahi o ana hoia mangumangu hei awhina i te hunga o roto i tana pa. Ano ka tae ona hoia ki te pa, tuuria tonutia atu te whawhai, whati ana nga Arapi i aua hoia, i neke atu i te toru mano nga tupapaku i mate o nga Arapi. He mea whakaeke te pa me nga awakeri e aua mangumangu, a he tini ano o ratou i mate. I muri o te whatinga a nga Arapi, ka kitea, i mate hoki taua nanakia a Ohimana Tikana te tianara o nga Arapi, a he tino hoariri hoki ia no te Ingirihi i nga whawhai a te Ingirihi raua ko te Poropiti Teka, ko ia hoki tetahi o nga tianara whakahaere i nga ope a taua Poropiti. No te timatanga o te whawhai tae noa ki te matenga o te Poropiti, kihai taua Ohimana Tikana i mahara, kua mate tona rangatira me hohou te rongo, karangatia ana e ia nga mano o nga Arapi kia tohe tonu ki te arahi i te pakanga, a tona mutunga iho, kua huri atu ano te mata o tona hoari hei whakamate i a ia. Kua kitea ko ia tonu tetahi o roto i nga tupapaku e toru mano. Tera pea kei te whakamoemiti nga kingitanga o te ao ki te Kingi o Apahinia, mo runga i tona aroha ki te tuku atu i ona hoia hei awthina i te hunga e ngoikore ana ki te whakahoki atu i te tao a te hunga kaha.

 

Waihoki me whakawhetai tatou mo te noho pai o nga tangata o to tatou-motu, me te tupu haere o te matauranga pono e kite nei tatou i te Karaipiture, me nga tini mahi o te Puru Ripine, o te Ope Whakaora, o te Kuru Tepara, me nga Tiitotara.

 

Nga Mahi o te Paremete.

 

No te 21 o nga ra o Hepetema, ka pakaru nga mema o nga Whare o te Paremete, kua tae hoki ki te ra i whakaritea hei mutunga. Haere ake nga ra e hui ana e ono tekau ma iwa, ko nga haora e toru rau e iwa tekau ma rima. Ko nga pitihana a te motu i tae atu: -Na te taha Pakeha, e toru rau e toru tekau ma tahi; na te taha Maori, kotahi rau ma tahi; hui katoa nga pitihana, e wha rau e toru tekau ma rua. Ko nga ripoata a nga komiti i tae atu: -Na te Komiti Ture Pitihana, kotahi rau e iwa tekau ma iwa; na te Komiti Maori, e iwa tekau ma tahi; na te Komiti o nga Whenua kaore ano kia mahia, e toru tekau ma waru; na nga Komiti o nga Koura Maina, e toru tekau ma teru; na etahi Komiti atu, e ono tekau ma waru; hui katoa nga ripoata a nga komiti, e wha rau kotahi tekau ma iwa. Ko nga pire i paahi i nga Whare; huihui katoa, e waru tekau ma toru. Ko nga pire kihai i paahi, e whitu tekau. Ko etahi enei o nga ingoa o nga pire i paahi: - (1) Ko " Te Ture mo nga Urupa Tupapaku"; (2) ko " Te Ture mo te Katimauhe "; (3) ko " Te Ture mo nga Taonga o te Tangata Mate "; (4) ko " Te Ture mo nga Kura "; (5) ko " Te Ture mo te Mahi Ika"; (6) ko " Te Ture mo nga Koura Maina"; (7) ko " Te Ture mo nga Haawhe kaaihe o te Waipounamu"; (8) ko " Te Ture mo nga Kamupene Mahi Koura "; (9) ko " Te Ture mo nga Tangata Hokohoko Waipiro "; (10) ko " Te Ture mo nga Ngahere o Niu Tireni"; (11) ko "Te Ture o te Whenua Rahui mo te Turanga o te Kura Nui o Akarana"; (12) ko " Te Ture mo nga Marenatanga ki Katapere me Otakou, i te Waipounamu"; (13) ko "Te Ture mo te Pupuhi Rapeti." Ko nga ingoa enei o etahi o nga pire kihai i paahi: (1) Ko " Te Ture mo te Puremu"; (2) ko " Te Ture mo te Paipera kia Korerotia i roto i nga Kura "; (3) ko " Te Ture mo , nga hara Kirimina "; (4) ko " Te a Ture mo te Wehe i te Marenae tanga"; (5) ko " Te Ture Whakakaha i te Kooti Whenua Maori "; e (6) ko "Te Pire a Te Paranihi o mo nga Whenua Maori"; (7) ko " Te Ture mo nga Mahi Rongoa";(8) ko " Te Ture mo te Hoko i a nga Rongoa Whakamate. "

 

Te Kura i Ohinemutu.

 

I RUNGA i te ahua iwikore o te kura i Ohinemutu, puta ana te hiahia o te Tumuaki a te Kawanatanga kia whakamutua tana kura, notemea he torutoru no nga tamariki e haere ana ki te kura. Otira kua tonoa ano e Te Kerehi, mema o Tauranga ki te Minita Maori, kia puare tonu taua kura tae noa ki te mutunga o tenei tau.

 

Ko te Tuati (Sir A. Stewart), tuakana o te Pihopa o Waiapu, te Pirimia o te Kawanatanga o Poihakene, kua whakamutu ia i tona pirimiatanga i runga ano i tona tono, i te ahua mate ona.