Pukapuka 0, Nama 67
18870920

whārangi 3  (12 ngā whārangi)
titiro ki te whārangi o mua2
4titiro ki te whārangi o muri


Tirohia ngā kupu whakataki o tēnei niupepa

 

e te Hupirimi Kooti. No te mutunga o te Whakawa Korona mo te weranga o te whare ka puta te kupu whakapae a Te Tiuri na taua tangata ano, na Te Rehutai, i tahu. No te whakawakanga i te Hupirimi Kooti i te marama o Hune, ka whakina ano e Tuari raua ko Poata o raua hara, engari ka huna tonu a Te Rehutai. Ka tu a Poata hei Kai-whaki-korero ki te Kooti mo te taha ki te Karauna, ka tino whakaaturia e ia to raua tangohanga moni ko Te Rehutai i te 30 o nga ra o Aperira. Heoi ano, whakataua ana te he ki taua tangata, ki a Te Rehutai, mo runga i nga whakapae e rua mo nga tangohanga tahae i nga moni. Engari ko te whakapae mo tona tahunga i te whare ki te ahi, kahore ano tena i whakawakia i runga i tetahi mahi pohehe a Te Karani Tiuri, kua waihotia tena ma te nohoanga a te Hupirimi Kooti i a Hepetema whakawa ai. Ka whakataua e te Tiati te whiu mo Poata Wetini kia ono marama ki te Whare - herehere ki Mautitini (Maungawao) noho ai, ki reira mahi ai i nga mahi taimaha, kuru kohatu, aha ranei. Ka mea te Tiati ko te take i whakamamatia ai te whiu mo Poata, ko tana whakitanga i tona hara me tona tuunga ki te whaki-korero ki te Kooti mo te hara o Te Rehutai, engari me tupato ia a muri atu, kaua ia e whakarongo ki te korero whahawai a te tangata. Kua whakataua te whiu mo Tuari kia . kotahi tau ki taua Whare herehere noho ai. Engari ka whakataua e te Tiati te whiu kino mo Te Rehutai, i te mea kua kitea ko ia te tangata nana i whakawai ona hoa, kia kotahi tau me te hawhe mo tetahi o ona hara, kia kotahi tau me te hawhe mo tetahi, hui katoa, e toru tau. Ka puta hoki tenei kupu a te Tiati, Katahi te tahae nanakia rawa ko tenei; he tahae i nga moni a te Kawanatanga, he tahae hoki i nga hea whenua o etahi atu tangata Maori. Ki taku whakaaro, me tino takahi rawa tenei tu ahua hara kia kore. Na, he whakaatu atu tenei kia haere te rongo o te mahi kino o aua tangata ki nga iwi katoa o te motu nei. Kei mahara te tangata mahi pera e kore ia e mau. He ringa roa ta te Ture. E kore hoki te hara e warewarengia, ahakoa pahemo ana nga tau maha a. Heoi ano.

 

"Na TE HONIHANA

 

" (H. D. JOHNSON)."

 

He Whaikorero Ataahua na Te Kawhe (Mr. J. B. Gough) mo runga i te Waimaori.

 

Ko tenei ngongi i whakaraweketia e te Atua Te Ora Tonutanga mo Ana tamariki - kahore i hangaa e Ia i roto i te kakaho rino e hono tonu ana te koropupu, kahore i mahia i runga i nga ahi paoa, he mea puru rawa ki nga hau paihana, tawhiotia i te piro me nga haunga ruaki o nga mea metoa, e kore to koutou Matua i te Rangi e mahi i te tino pia o te oranga - te Wai piata rawa, i ena wahi, erangi e hangaa ana e Ia i nga wahi matomato i nga wharua me he karahe te ahua i te wahi e marara haere ana nga tia whero i te wahi e arohaina e te tamaiti hei kaainga takaro mona, koia te kaainga, koia te wahi i puna ake ai i raweke ai taua honu e Te Atua, i raro, i raro rawa, i nga wharua hohonu rawa i te wahi e kohumuhumu ana te puna i te wahi e umere ai nga kare rere iti, i runga ano i nga teitei o nga maunga, i te wahi e tu maaro mai ana nga toka o te whenua, a, kanapa mai ana me he koura i te whitinga o te ra, i te wahi hoki e noho taumarumaru ana nga kapua o te awha, i te wahi e parekara angaranga nga marangai o te whatitiri, i nga wahi tawhiti noa atu i te moana whanui i te moana maaka rawa i te wahi o te awha takirikiri e whakatangi i tona putorino, i te wahi e rere mai ana nga ngaru i runga i to ratou karekare ngahau, me to ratou harurutanga, para, ana e ratou te haerenga huarahi a Te Atua - ko te wahi tenei i puna ai i hanga ai e Te Atua, te honu o te oranga - ko tenei ia te Wai homai oranga. Ina ka kitea i whea ranei i whea ranei, he mea ataahua rawa e hikohiko ana e ura ana i te pata tomairangi, e waiata haere ana i te ua o te raumati e kanapa ana i te rei o te haupapa, kia ahua ai nga rakau katoa e tu tawhio ana i te ngahere ano he mea e ora ana, kakahu rawa ki nga kakahu piata rite ana ki nga kowhatu utu nui, he mea ano ka horahora rawa, te arai koura ki runga i te ra ina ka torengi me he tawhetawhe ma rawa e kore nei e tatahi nga whenu he mea ano ka noho tawhio te kohu me he kakahu i runga i taua ariki o waenga po (ara te marama). Takaro ana i nga wai taheke, e moe ana i te Haupapa maaro, e kanikani ana i te pokaka whatu no te rangi, e whakakopa marire ana aana arai hukarere kanapa tawhio noa te te ao hotoke, e whatu ana i nga karupango he tini nei nga kara, ara te aniwaaniwa o te rangi, taua whitiki anahera no te hope o te rangi, ko ona whenu kei te pata ua o te whenua, ko ona aho koia pu pu nga hihi o te ra he mea kotingotingo ki nga puawai whakate-rangi ra te ringaringa e mau nei te niu miharo o te kohiku. I nga wa katoa e pumau ana tona ataahua, to tenei wai whakamoemiti o te oranga. Kahore he paihana e pupu ana i ona tahataha, e kore tona huka e kawe mai i te Porangi me te Kohuru, kahore he tohu toto i taua ngongi piata, kahore he Poaru motea kahore he pani mate kai, kahore he roimata wera rawa a ratou e kitea i nga hohonutanga o taua honu piata, kahore he wairua tangi wehi mai ona i te marua o te tangata hau rangi me ona kupu kangaa no te auetanga ake tonu atu. Kia kaha kia uaua e hoa ma to koutou kii mai. E pai ana ranei koutou ki te hokohoko ki te kurutete i tenei mea ataahua mo taua ngongi Rewera - ara te Waipiro ?