Nama 37
19010301

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA, i enei korero. Hei a taua anake hei te Maori te painga o tenei whakaaro, hei nga hapu katoa o. te motu. Ahakoa ka tu te kura ki Akarana ka ahei nga tamariki o nga hapu katoa te haere ki taua kura, a ma ratou e korero ki o ratou iwi te ahua o te whakama- haratanga ki te Kuini. Ko nga painga o tenei tu whakamaharatanga hei nga kanohi, hei nga tinana, hei nga hinengaro, hei nga wairua, hei te iwi katoa. Ma te pai o nga whaea, ka pai ai nga tamariki ma te pai o nga tamariki (ina pakeke) ka pai ai nga matua, ma te pai o nga matua, ka pai ai te iwi nui. I panuitia e matou i tera tau i te NAMA 28 te whai-korero a te Kawana mo tenei kura, i mea ai ia he mea pai rawa te whakaako i nga tamariki wahine ; i panuitia ano e matou i te NAMA 34, nga korero mo "Nga Whaea," no ratou nei te mana nui ki te whakatupu tamariki. Kua timata te kohi a te pakeha mo te kura hei painga nei mo te Maori anake, kaati kia kaha — kia tino kaha — te kohi a te Maori, a nga hapu, a nga whanau, a nga matua a nga tamariki, me kohi katoa, ahakoa iti, kia kite ai te pakeha e mamae ana o tatou ngakau, katahi ka wetewetengia a ratou putea. Ka panuitia e matou nga moni katoa e hoatutia ana mo tenei kura. Me tuku mai ki a matou ki nga minita ranei o koutou takiwa, pakeha Maori ma ratou e tuku. E aru i te tauira a Airini Tonore. Nana tonu tetahi o nga kohikohi tuatahi, £100. Ta te rangatira pai! Na TE PIPIWHARAUROA.

TE KURA KOTIRO MAORI o KUINI WIKITORIA. Ko TE TONO A TE PIHOPA O AKARANA KI TE IWI PAKEHA. TERA te tangata i nga wahi huhua e • whiriwhiri mo te whakaara i tetahi mea tika hei Whakamaharatanga Pumau ki to tatou Kuini aroha kua mate nei. He whakaatu tenei i tetahi whakaaro e maharatia ana he mea tino tika rawa, he whakaaro hoki e kore e hapa te hihiko o nga tangata katoa o tenei koroni ki te tautoko. E meinga ana kia whakaturia he Kura mo nga Kotiro Maori, kia pera me te kura i Hukarere, Nepia, kua kitea nei tona tino painga, otira kua kitea he iti rawa mo nga motu e rua : ia tau ia tau he ki tonu, e kore e taea te whakaae nga tamariki katoa e hiahia ana kia uru mai. I etahi tau ruarua kua pahure nei, ka timataria te korero mo te whakatu i tetahi kura ki Akarana, hei whakamahara- tanga mo te Taimana Tiupiri o te Kuini, a e huaina taua kura ko te Kura Kotiro o Kuini Wikitoria. Otira i te mea ko te iwi katoa kua whiwhi ki te painga i te iwi Maori e meinga ana ma te koroni katoa tenei mahi e hapai, kaua ma Akarana anake ; kia £10,000 te moni hei kohikohinga kia pai ai te timatanga o te kura. I whiriwhiria tenei take i te turanga ki Nepia o te Hinota Nui o te Hahi o Ingarangi; i whakaaetia hoki tenei motini:— "E tino whakaae ana tenei Hinota mo te whakaaro kia hangaia he kura mo nga Kotiro Maori ki Akarana, kia huaina ko te Kura o Kuini Wikitoria hei Whakamaharatanga Pu- mau ki Niu Tireni ki to tatou Kuini aroha kua mate nei, e mea ana hoki tenei Hinota kia tautokona tenei take e nga tangata katea o te Hahi o Niu Tireni. E hiahia ana matou kia hohoro te whakarite i tenei take, na konei matou ka tono ki te iwi katoa o tenei whenua kia awhina." Ko nga take tenei i tohe ai matou kia hapai- nga tenei whakaaro:—

(1). He take kaha he mea e tau ana ki runga i a tatou kia whakaakona o tatou tuahine Maori ki nga tikanga Karaitiana. Kua kitea te nui me te pai o te whakaako i nga tamariki tane i etahi wahi o enei motu, otira kahore i te kaha te whakaako i nga tamariki wahine. Kahore he take e tika ai ta tatou tatari kia pai te ahua o nga tangata o te kainga ki te kore e whakaakona nga wahine mo enei whaka- tupuranga e tu mai nei, ki te matauranga Karaitiana; ko tenei anake hoki te mea hei hiki i te tangata. (2) He iti noa iho te mahi a nga wahine pakeha i enei tau kua pahure nei, ki o ratou taina Maori. Kati ko tenei te huarahi hei whakaputanga ma ratou i to ratou aroha i te mea e taea ana te mahi. (3) He kura mo nga tamariki wahine Maori te whakamaharatanga tino tika atu mo to tatou Kuini aroha, ka rite ki te hiahia o tona ngakau, ara ko te painga mo ia iwi mo ia iwi i raro i tona mana. (4) Kua whakaritea ko Akarana te wahi tino rite hei tuunga mo te kura no te mea:— (a) nui atu nga Maori kei tenei porowini (18,000) ko waenganui hoki tenei o etahi hapu nunui; (e) he iti rawa nga mahi kura i tenei