Nama 173
191210

whārangi 4  (12 ngā whārangi)
titiro ki te whārangi o mua3
5titiro ki te whārangi o muri


 
4 TE PIPIWHARAUROA. No.173 HE MIHI. KO te mihi tenei a te Pihopa ki te pou- aru, ki nga whanaunga ki te Pariha o Nikora Tautau ka mate nei: He kore noku e tae atu ki Ite nehu i a Nikora i mea ai ahau ki te Atirikona mana taku mihi nei e whakapuaki ki a koutou. Ahakoa ko te tinana e kore e tae atu ko toku wairua kei kona i a koutou e nehu ana i Nikora, kua tangohia wawetia atu na e te Atua i tana mahi o konei ki tetahi atu mahi pai atu ki tona rangatiratanga ki te rangi. Ka nui ra toku aroha ki to koutou aitua— to tatou aitua, ara te ngaronga o Nikora he maha noa atu na ona tau e kauwhau pono ana i te Rongopai, i arohaina ra e tana iwi e ona rangatira hoki i roto i te Ariki. Kua ngaro noa atu na to koutou papa, to koutou kai-arahi pono—kei te noho pani kou- tou. He ahakoa ra kia mahara koutou ki te kupu " kia ora katoa ki te Atua." Kei te ora tonu a Nikora ki taku mahara ka inoi tonu ia mo koutou, ka whakaaro tonu ki a koutou, ka hiahia tonu kia aru pono koutou i a Te Karaiti, kia u tonu hoki ki tona tinana ki te Hahi. He aha na te mahi ma koutou kia Nikora? Kia kaua koutou e mea heoi ano te mahi he tangi. Kia mau to koutou mahara ki ana kupu aroha, ki ana whakahau, ki tana mahi pono i ta te Atua i pai ai. Kia puta hoki to koutou uaua kia piri tonu ki nga mea—a, ahakoa kua ngakau kore koutou ki te Atua ki te mahi ki a ia, kia whakarerea te pena kia •timata tonu inaianei te mahi Karaitiana. Ko te kupu tenei a te Wairua tapu ki a tatou i a tatou e whakaaro ana ki a Nikora. "Haere koe kia pera ano tau mahi." Kia aroha ki te Atua kia mahi ki a ia—kia pera me ia i aroha ra i mahi ra. Kia mahara koutou tera ano tatou e kite i a ia he kanohi he kanohi—ka whakama hoki koutou ki te wareware koutou ki ana kupu. Kati ko taku inoi tenei mo koutou. Ma te Atua koutou e manaaki, e whakamarie mana hoki koutou e whakakaha kia tika ai a koutou mahi kia pera ai me a taua pononga kia aroha ai hoki koutou ki a Te Karaiti kia pera me ia i aroha ra. Na to koutou matua i roto i te Atua. Na A. W. WAIAPU. TE KARETI MAORI O WAERENGA- A-HIKA. HE mea tono mai ta tatou mokai e te Mahita o te Kareti o Waerenga-a-hika kia whakaatu ki nga rohe katoa e haere ai ia i enei korero e whai ake nei, hei whakaatu i te ahua o taua kura. E ki ana mai te mahita ka nui te ruma i taua kura mo nga tamariki e hiahia ana kia whiwhi ki te matauranga. Ko nga tamariki e ahei ana kia tono ruma mo ratou i tenei kareti hei nga mea i pahi i te karaihe toru i etahi atu kura, engari ko nga mea i pahi i te karaihe wha nga mea tino pai rawa. E whakaakona ana tenei kura nga ahuatanga o te mahi ahuwhenua—ara te taha o te ahu- whenua e pa ana ki te whakatipu i nga tu ahua kai katoa, i nga mahi whakatipu rakau hoki. Te ahua o te mahi i te oneone, te pou i nga tu ahua kai katoa, me nga mahi hoki e pai ai te tipu o aua kai, e akona pataitia ana i roto i tenei kura. Te wa tika mo te pou rakau, te wa tika mo te tapatapahi i nga manga, me te tapahi tika i nga manga e oti katoa ana te tohutohu ki nga tamariki. I tua atu o enei mahi, tera ano tetahi atu mahi, ko nga naahi kamura. Ko nga mahi aringa enei e mahie i roto i tenei kura. Ko nga mahi kura i ro whare ko enei:— Te Reo Ingarihi, mahi whika, nga ture o te mahi ngaki whenua, me nga tikanga ngawari hoki o te taha ki te ora mo te tinana. E homai ana e te Tari mo te Taha Maori e rima nga karahipi hei whainga atu ma nga tamariki o te karaihe wha, engari ma nga mea kei raro iho i te 15 nga tau. Ko nga tamariki e hiahia ana ki te uru mo tetahi o enei whaka- matautau me matua tuku atu he whakaatu ki te tino kai whakamatautau mo nga Kura Maori. Ko nga tamariki e hiahia ana ki te tono ruma mo ratou i tenei kura, me hohoro te tuku mai i a ratou tono ki te Mahita. Ko te ra timatanga mo te kura hei tera tau hei te 22 o nga ra o Pepuere. Ki te hiahia nga matua o etahi tamaiti, o etahi tamariki ranei, kia kaua e akona tana tamaiti, a ratou tamariki ranei ki te mahi i nga whenua engari ki enei whaka- matautau; ara. Junior Civil Service and Ma- triculation, e taea ano tera. Kia mohio mai nga matua o nga tamariki e taea ana ano enei whakamatautau nunui e nga tamariki o tenei kura he pera ano hoki me nga mea e taea ana e te kura o Te Aute. Heoi ano. Na M. W. BUTTERFIELD, B.A., B.D.