Pukapuka 0, Nama 72
18880218

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


Tirohia ngā kupu whakataki o tēnei niupepa

 

whenua, he toka hei hanga i nga parepare toruarua, nga maioro, nga koki, nga kahupapa, me a ratou taita, kia oti ena katahi pea ka tapoko nga kaipuke ki taua wahi kuiti, mehemea kahore enei mahinga i uta e oti e kore rawa nga kaipuke manuao e whaiwahi ki nga pu o taua pa notemea ki tu tetahi o aua kaipuke i te mataa kotahi ka totohu iho.

 

E kii ana ki te mea ka puta he whawhai ka tahuri a Parani ki te awhina i a Ruhia, kua mohio taua iwi ki te kaha kore o a ratou manuao a kua tuku atu o ratou panui kia tere mai a ratou manuao, kei tenei wahi kei tena wahi o te ao kia whakaemi mai ki Parani notemea e kore nga kaipuke o te kaainga e kaha ki nga kaipuke o Itari, kei tenei iwi nga manuao tino kaha o te ao, ki te mea ka tahuri a Parani ki te awhina i a Ruhia ka tu ano a Itari hei hoa riri ki a ia.

 

Notemea he takarua tenei ki aua whenua, te rongo ai tatou kua timata taua whawhai. Otira ehara i te hanga te mahi tinihanga, e kii tahi ana kahore he whawhai kahore he whawhai, he rongomau ana he wa rangimarie, otira kahore tetahi e whakapono ana. Tirohia a Tiamani kua whakaemia nga hoia e rua miriona ki ia wahi ki ia wahi o nga rohe e tuhono ana kia Parani me era atu kaainga e patata ana ki a ia. Otira keihea te iwi e noho mangere ana i tenei wa kei te mahi tonu nga iwi katoa ki te hanga kaipuke ki hanga paura mataa purepo Raiwhara me nga rakau katoa o te pakanga, kei te mahi hoki i nga kai, miiti, pihikete, paraoa, aha noa aha noa, mo roto mo te tinana, mo waho ko nga paraikete, nga kakahu, me nga teneti he maha noa atu nga ahua.

 

Waihoki, e ahu whaka-te-rangi ana ki nga paruuna (balloon) e hanga mai ana i ia wahi i ia wahi a ka penei ratou me he manu e noho whakatopa ana kia kitea nga mahi o te hoa riri i ana pa, i ana matua, i ana tanatoto, i ana haupapa, me nga Tatauranga. Ka mataara ano ki nga whaitaua he aha ranei te mea e ngaro i nga kanohi o aua manu ko nga huarahi o nga whakariki ka kitea, ko nga whakarua e kore e ahei notemea ka powhiritia e nga tangata katoa o te paruuna ki ta ratou ake iwi penei e kore e tupono nga mahi o te hoa riri tena ra to hanga hei te roro! Akuanei pea ka tatau aua manu ki waenga o te rangi me he kahu e whawhai ana tetahi ki tetahi, kowai ranei e kaha ki te whakahaere i nga tini rerenga keetanga o te whawhai i enei ra o te mohiotanga me te matauranga, "Kia rahi te hinganga o nga marohirohi," ina ka timataria te pakanga.

 

Kua hoki mai a tatou manuao i Poihakena a Te Karaiopi (Calliope), Te Nerehona (Nelson), Te Rapiti (Rapid), me Te Reiwena (Raven), i te tutuu ngarahu enei kaipuke hei manaakitanga ki Poihakena mo te huringa o te rau tau tuatahi i nohoia ai tena whenua e te Pakeha, i tukua atu nga panui ki nga koroni katoa kia ahu mai a ratou Kawana me nga mema o nga Paramete hei manuhiri ki tenei hakari nui whakaharahara, katahi nei ka kitea peneitia ki tenei moana, ara te Moana Marino, he mea turama taua kaainga puta noa he mano he mano o nga tangata no tenei kaainga no tera kaainga no tenei whenua me tera whenua i tae ki reira matakitaki ai ki nga mea miharo i ruia noatia atu hei tirohanga ma te tangata, otira nohea e taea he te kupu tangata kia whakahaerea nga tini mea ahuareka; i tu ano he matakitakinga ma nga iwi otira kei a ia anake tona ahua ara te whakaaringa o enei mea o enei mahi hemo ana te hinengaro i te koa i te hari keihea hoki he putanga, hee noa iho ana te manawa i enei tu mahi, ko enei mea ataahua e hangai ana ki nga huarahi o te whawhai.

 

Waihoki tenei nga whaikorero mo te Iupiri o te Popi (ara te Rangatira o nga Katariko) he nui rawa ana te pai, e hangai ana tenei i nga huarahi o te whawhai.

 

Waihoki me mahara ano tatou ki te kii o te Runga Rawa, "Naku nga kingi i kingi ai, naku nga rangatira i whakatakoto ai i te tika."

 

Waihoki e kite ana tatou i te pono o enei korero whakatetangata i uru ai ki nga kupu a Horomona, " He pono ki te akina te waiu ka puta mai te pata, ki te akina te ihu ka puta mai te toto ki te akina ano te riri ka puta mai he whaiwhai."

 

Mahia e koe te mahi e tika ana aua atu te tukunga iho.

 

Ko nga takuta pai: Ko Takuta kai tika, ko Takuta hari koa, ko Takuta nohomarire.

 

Kati ano te tangata e tino mohio ana ki te wahi kinitanga o te hu, koia anake e kakahu ana i taua hu.