Nama 69
190311

whārangi 2  (12 ngā whārangi)
titiro ki te whārangi o mua1
3titiro ki te whārangi o muri


 
TE PIPIWHARAUROA,

2. "Ka mea ki nga tangata,, Haere mai." Ko te tohu tuarua tenei o te Whakapono Ora. I kitea e te wahine he mea nui, na reira hohoro tonu tana haere ki te tiki i tona iwi kia haere mai ki a Ihu. E te hoa mehe- mea he mea nui a Ihu ki a Koe, he hoa aroha nou, e kore e hapa tou hiahia kia mohio hoki era atu tangata ki a Ihu, mehemea kua inu koe i te wai ora a kua whakamatau ki tona reka, kua tata tou ngakau, kua whakaorangia tou wairua, e kore e hapa tou whai kia ora hoki era atu tangata kia haere mai ki a Ihu kia inu hoki ratou i te wai ora i inu ra koe. Mehemea he whakapono tou me toku, kei te tohe ranei taua ki o taua whanaunga, ki o taua hapu, ki o taua iwi, kia haere mai ki a Ihu? Ma te mohio o te tangata ki a Ihu i te tuatahi e marama ai tana ki ki te tangata, Haere mai, kia kite i te tangata i korerotia mai ai ki a au nga mea katoa i mea ai ahau." "A he tokomaha nga Hamari o taua pa i whakapono ki a ia, mo te ki a te wahine i mea ra, I korerotia mai e ia ki a au nga mea katoa i mea ai ahau." He wahine nui te wahine o Hamana, he tino mihinare, he tino apotoro. Kia rite hoki to taua whakapono ki tona, a kia rite hoki nga tohu o to taua whakapono ki o tona, ara:—

(1). Kia whakarerea te ipu.

(2). Kia mea ki te tangata, Haere mai.

Tahuri e te hoa, tahuri ki te Atua. "Rapua a Ihowa i tona kitenga ai; karangatia atu kei tata ana ia," kei ngawari ana ranei tou nga- kau, kei ora ana koe. E inu i te wai ora, kua inu hoki ahau, kia rite ai te kupu a o taua tupu- na, " Waiho maana, haere maana."

TE WHAKAPONO O WAIKATO.

KI TE ETITA O TE PIPIWHARAUROA.

HE panui i kitea iho e au i TE PIPIWHA- RAUROA No. 68. He whakaaturanga na te Rev. Nikora Tautau i a Ngatitamaoho kua kohi moni hei hanga whare karakia. A, e whakaatu ana ano hoki te Rev. Honore nei no te tau 1863 ra ano i mutu ai te karaka o Waikato. A, ka 40 rawa nga tau kore rawa tetahi whare karakia i tu mo roto o Waikato. Na enei kupu ahau i mahara ai he mea tika ano kia ata whakatikatikaia enei kupu.

No te mea hoki e tino mohio pono ana ahau i mau tonu nga tangata o roto o Waikato ki te karakia i muri mai o te tau 1863. Nga

minita o roto o Waikato ko te Rev. Heta Tarawhiti, ko te Rev. Hohua Moanarua o te Hahi Ingarangi. Ko nga minita Weteriana ko Rev. W. Patene, Rev. Hami Ngaropi i tino kaha tonu nga iwi kupapa ki te karakia he tino tapu nga wiki, waruwaru ai nga riwai i nga rahoroi kia motuhake te wiki hei karakia anake hei kura hapati hoki, no te tau 1872 ka hinga nga whare karakia tawhito. Ka hanga ano e Hohua Moanarua tetahi whare karakia hou ki Wharoa i muri o tena tau.

A, i te tau 1873 ka hanga ano tetahi whare karakia e Heta Tarawhiti ratou ko ona iwi ki Taupiri. Ko nga hapu enei na ratou i hapai taua whare karakia, ko Ngati Whawhakia Ngatitu, Ngatihuakore, Ngatitai, Ngatihua katoa, Ngatiwhauroa, Ngatihanui.

Ko te Rev. B.Y.Ashwell, te minita pakeha e awhina tonu ana i enei iwi. I neke atu ia i Taupiri ki Hopuhopu i kaha tonu enei minita ki te kauwhau haere i roto o Waikato puta atu ki a Ngatihaua i Tamahere me nga wahi katoa o roto o Waikato. I whakarongo tonu te iwi ki enei minita tae noa iho ki te hekenga atu o Rev. B.Y.Ashwell ki Akarana i te tau 1879 A, he maha nga taitamariki taitama- hine i whakapakia e Pihopa Kaui ki roto i taua whare karakia i Taupiri i tu ano hoki he kura Kawanatanga i roto i taua whare, nui atu nga tamariki i kura ko R O. Stewart me Mere P. Tarawhiti nga kai whakaako o aua tamariki. I kaha tonu te karakia o roto o Waikato tae noa mai ki te tau 1886, no tenei tau katahi ka timata te marara o nga tangata ki te rapu i etahi atu akoranga o te ao, ka riro etahi hei Momona, hei tohunga maori, hei haurangi, hei hauhau, hei noho noa iho, no tena tau ano hoki ka nekehia a Rev. K. Tara- whiti mo Te Pourewa Punui. I kite a te Rev. T Hapimana i taua whare karakia. No te tau 1892 nei ano ka hinga taua whare a ko te pere o taua whare, he pere nui e taea whakauauatia ana te hapai e te tangata kotahi. Kua hoatu taua pere e H. Tarawhiti mo te whare karakia i hanga e Hapimana ma ki te Pourewa a ki taku mohio kei reira ano i tenei ra. E tika ana ano a Rev. Nikora Tautau kia pohehe no te mea he tino tauhou a ia ki Waikato i tae mai ia i muri o te tau 1886.

Kua marara ke nga hipi a, ko nga hepara kua koroheke rawa, no reira ehara taku i te whakahe engari he whakamarama kia mohio ai nga tauhou.

Heoi ano

Na ROKA 1-1. HOPERE. Taupiri.